رووداو دیجیتاڵ
سەرۆکی پەرلەمانی تورکیا رایگەیاند، کارەکانی پێکهێنانی لیژنەی چاودێری لە چوارچێوەی پرۆسەی چارەسەری گەیشتوونەتە دوایین قۆناخ و بەمزووانە دەست بە کارەکانی دەکات، جەختیشی کردەوە کە پێویست بە لیژنەیەکی فراوان ناکات.
ئەمڕۆ پێنجشەممە، 19ـی تشرینی دووەمی 2026، نوعمان کورتوڵموش، سەرۆکی پەرلەمانی تورکیا لە کۆنگرەیەکی رۆژنامەڤانیدا لە پەرلەمانی تورکیا سەبارەت بە میکانیزمی پێکهێنانی لیژنەی چاودێری بۆ پرۆسەی چارەسەری گوتی: "لە کارەکاندا گەیشتووینەتە دوایین قۆناخ. لیژنەکە ئەرکی چاودێری و بەدواداچوونی دەبێت و لە ماوەیەکی زۆر کورتدا دەست بە کارکردن دەکات."
سەبارەت بە ژمارەی ئەندامان و بەشداریی پارتە سیاسییەکان لە لیژنەکەدا، سەرۆکی پەرلەمان گوتی: "پێویست بە لیژنەیەکی فراوان ناکات و ژمارەیەکی گونجاو دیاری دەکرێت. نووسراو بۆ پارتەکان دەنێرم بۆ دیاریکردنی ژمارەی ئەندامان. تاوەکو ئێستا وەڵامێکی فەرمیم لەبارەی پێدان یان نەدانی ئەندام وەرنەگرتووە."
کورتوڵموش ئاماژەی بە پرۆسەی چارەسەری کرد و گوتی: "ئەو پرۆسەیە بە ویژدانی گەل و عەقڵی دەوڵەت دروستبووە. کەس مافی ئەوەی نییە لە قۆناخەکانی داهاتوودا زیان بەم پرۆسەیە بگەیێنێت."
سەرۆکی پەرلەمانی تورکیا داواشی لە لایەنەکان کرد گوتاریان بگونجێنن و گوتی: "گرنگ ئەوەیە هەمووان زمانەکەیان راست بکەنەوە. بە زمانە سیاسییە کۆنەکان بەڕێوەبردنی قۆناخی داهاتوو ئاسان نابێت. با هیچ کەسێک بە زمان و شێوازێکی دابەشکارانە قسە نەکات."
پێکهێنانی لیژنەی چاودێری لە چوارچێوەی یاسای ژمارە (7595)ـی تایبەت بە پرۆسەی چارەسەرییە کە لە پەرلەمانی تورکیا لە ئابی 2026ـدا بە پشتیوانیی 467 پەرلەمانتار پەسندکرا. ئەو لیژنەیە بۆ چاودێریکردنی جێبەجێکردنی یاساکەیە بەتایبەتیش لە دیاریکردنی چارەنووسی ئەو گەریلایانەی پەکەکە کە دوای چەکدانان و هەڵوەشاندنەوە دەگەڕێنەوە تورکیا.
نوعمان کورتوڵموش لە ماوەی چەند رۆژی رابردوودا سەردانی هەریەک لە پارتەکانی جەهەپە، رێگەی نوێ، دەم پارتی، ئاکپارتی، مەهەپە، ئیی پارتی و پارتی نوێی کرد بۆ تاوتوێکردنی ئامادەکارییەکانی دامەزراندنی ئەو لیژنەیە.



