رووداو دیجیتاڵ
وەزیری ناوخۆی تورکیا رایگەیاند، وڵاتەکەی ستراتیژییەتێکی گشتگیر پەیڕەو دەکات کە ئامانجی چارەسەرکردنی کێشەی کۆچی نایاساییە لە سەرچاوەی کێشەکەوە.
ئێوارەی رۆژی پێنجشەممە، 8-10-2026 مستەفا چیفتچی لە ئەسینای پایتەختی یۆنان، لەگەڵ سانۆس پلێڤریس، وەزیری کۆچ و پەنابەریی ئەو وڵاتە کۆبووەوە.
چیفتچی رایگەیاند، بەڕێوەبردنی کۆچ لەپێش هەموو شتێکەوە بۆ پاراستنی ئاسایشی تورکیایە و گوتی: " وڵاتەکەمان کردووەتە شوێنێک کە کۆچبەرانی نایاسایی نەتوانن بە ئاسانی بێنە ناویەوە، ئەگەریش هاتن، نەتوانن دەربچن، بە ئاسوودەیی بگەڕێن و بە ئاسوودەیی کار بکەن، ئەگەریش دەستگیرکران، دیپۆرت دەکرێنەوە."
وەزیری ناوخۆی تورکیا ئاماژەی بەوەش کرد، تورکیا ستراتیژییەتێکی پێنج قۆناخی پەیڕەو دەکات کە لە وڵاتی سەرچاوەوە دەستپێدەکات و هەر لەوێش کۆتایی دێت. لەو چوارچێوەیەدا، تورکیا کار بۆ پێشکێشکردنی هاوکاریی مرۆیی و ئەنجامدانی چالاکیی گەشەپێدان لەو وڵاتانەدا دەکات کە سەرچاوەی کۆچی نایاسایین.
لەبارەی تووندکردنی رێکارەکان چیفتچی گوتی: "پێداچوونەوە بە سیاسەتی ڤیزەی خۆماندا دەکەین و رێکارەکانی پێدانی بە هاووڵاتییانی ئەو وڵاتانەی کە کۆچی نایاساییان لێوە دەکرێت، تووندتر دەکەین."
چیفتچی جەختی لەوە کردەوە، بەڕێوەبردنی کۆچ تەنیا بریتی نییە لە دوورخستنەوەی کۆچبەرانی نایاسایی لە سنوورەکان، بەڵکو ستراتیژییەتێکی گشتگیرە کە پشتگیری لە کۆچی رێکخراو دەکات و هەوڵدەدات کێشەی کۆچی نایاسایی لە رەگ و ریشەیەوە چارەسەر بکات.
وەزیری ناوخۆی تورکیا ئاماژەی بەوەش کرد، تورکیا سیستەمی ئاسایشی تووندتر لەسەر سنوورەکانی دادەمەزرێنێت و بە نوێترین تەکنەلۆژیا پەرەیان پێدەدات، هاوکات گرنگییەکی تایبەتیش بە بەرەنگاربوونەوەی قاچاخچییانی مرۆڤ دەدات.
بەپێی ئاماری فەرمی، لە کانوونی دووەم بۆ کۆتایی ئابی 2026، 5 هەزار 984 کۆچبەری نایاسایی لە سنوورە ئاوییەکانی نێوان تورکیا و یۆنان، لەلایەن هێزەکانی پاراستنی کەناراوەکانی دەریایی تورکیا دەستبەسەرکراون.
