.jpg&w=3840&q=75)
رووداو دیجیتاڵ
لە خاڵێکی پشکنینی ناوچەی پورسەکلاری ئەنقەرە، کەسێک تەقەی لە پۆلیسێک کرد کوشتی، دواتریش هەوڵی خۆکوشتنی دا.
رووداوەکە کاژێر 11:20ی شەوی رابردوو 6-10-2026 لە ناوچەی پورسەکلار لە ئەنقەرە روویدا. لەوکاتەی تیمێکی پۆلیس لە خاڵێکدا سەرقاڵی پشکنین بوون، کەسێک لە ئۆتۆمبیل دابەزی و تەقەی لە پۆلیسێک کرد بە ناوی ئەحمەد تورکئۆغڵو.
تورکئۆغڵو بە سەختی بریندار بوو و دوای ئەوەی گواسترایەوە بۆ نەخۆشخانە، گیانی لەدەستدا.
یەعقوب جانبۆڵات، پارێزگاری ئەنقەرە رایگەیاند، تیمەکانی پۆلیس ئۆتۆمبێلێکیان راگرتووە کە سێ کەسی تێدابووە. لەو کاتەی پۆلیسێک و پاسەوانێکی شەو سەرقاڵی پشکنینی ناسنامەی سەرنشینانی ئۆتۆمبێلەکە بوون، ئەو کەسەی لە کورسیی دواوە دانیشتبوو لە ئۆتۆمبێلەکە دابەزیوە و دوو گوللـەی ناوە بە ئەحمەد تورکئۆغڵو-وە.
پارێزگاری ئەنقەرە هەروەها گوتی: "سەرەڕای هەموو هەوڵەکان، ئەحمەد تورکئۆغڵو گیانی لەدەستدا".
دوای ئەوەی ئەو کەسە تەقەی کردووە، هەوڵیداوە خۆی بکوژێت، بەڵام دەستگیرکراوە. جانبۆڵات ئاماژەیکرد، دوو سەرنشینەکەی دیکە رایان کردووە، بەڵام دواتر لەلایەن پۆلیسەوە دەستگیرکراون.
