رووداو- هەولێر
ئوسامە نوجێفی، جێگری سەرۆك كۆماری عێراق لە هەڤپەیڤینێكدا لەگەڵ (تۆڕی میدیایی رووداو) ئاشكرای دەكات كە حەیدەر عەبادی سەرۆك وەزیرانی عێراق داوای هاوپەیمانێتی لێكردووە بۆ هەڵبژاردنی داهاتوو، بەڵام دەڵێت بە مەرج پشتیوانی لە ویلایەتی داهاتووی عەبادی دەكەن. ئوسامە نوجێفی لەبارەی كێشەكانی نێوان هەولێر و بەغداش دەڵێت ئەوان دژی گشتپرسی بوون و دادگای فیدراڵیش ئەو پرسەی یەكلایی كردووەتەوە، بەڵام دژی هەندێك لە هەنگاوەكانی بەغدان بەرامبەر هەرێمی كوردستان. نوجێفی پێیوایە هەولێر و بەغدا لە چەند رۆژی داهاتوودا دەست بە گفتوگۆ دەكەن.
رووداو: با لە دوایین سەردانەكەتان بۆ واشنتن دەستپێبكەین. راتانگەیاند كە پشتیوانی لە ویلایەتی دووەمی حەیدەر عەبادی دەكەن، بۆچی پشتیوانی لێ دەكەن؟
نوجەیفی: بۆچوونەكانی بەڕێز عەبادی نزیكە لە بۆچوونە گشتییەكانمان. هەروەها سەركەوتنی زۆری بەدەستهێنا. بەڵام پشتیوانیكردنمان لە بەڕێز عەبادی مەرجدار دەبێ.
رووداو: مەرجەكانتان چین؟
نوجەیفی: دەبێ دانوستاندن بكرێت پەیوەست بەشێوازی بەڕێوەبردنی وڵات دوای هەڵبژاردن. لە سەپاندنی ئەمن و ئاسایش، لە كۆنترۆڵكردنی چەك بەدەستی گرووپەكانەوە، پێدانی ماف بە سەرجەم پێكهاتەكان، رێگری لە گرووپی چەكداری كە بیەوێ خۆی بەسەر خەڵكدا بسەپێنێ و دروستكردنی هاوسەنگی لە پەیوەندییەكانی دەرەوە.
رووداو: مەبەستت چەكی كام گرووپە، حەشدی شەعبی؟ یەكێك لە مەرجەكانتان هەڵوەشاندنەوەی حەشدی شەعبییە؟
نوجەیفی: ئێمە لە سەرەتای داڕشتنی یاسای حەشدی شەعبی، دژی بووین، چونكە پێمانوایە دامەزراندنی هێزێكی سەربازیی لەپاڵ سوپای عێراق، دەبێتە هۆی ناسەقامگیریی ئەمنی لە داهاتوودا. یاساكە پەسەند كرا، بەڵام بەدروستی جێبەجێ نەكرا. ئێستاش پەیوەندی لە نێوان ژمارەیەك سەركردەی سیاسی لەگەڵ چەند یەكەیەكی چەكداری هەیە و خۆشیان وەك پارتێكی فەرمی تۆمار كرد بۆ ئەوەی بەشداربن لە هەڵبژاردن. بۆیە دەبێت حەشد بخزێندرێتە نێو سوپا و پۆلیسی عێراقی و بەیەكجارەكی لە پرۆسەی سیاسی دووربخرێتەوە. كێشە لەوەدایە زۆربەی ئەو گرووپانە عەقائیدین. ئەمانە بەشێوەیەكی رێكخراو لەنێو ئەم گرووپانەدا 30 بۆ 40 ساڵە بەردەوامن لە كاركردن. ئەمەش یەكێكە لە كێشەكان، چونكە لە هەڵبژاردنەكاندا دەستوەردانی زۆر دەكەن و هەوڵی سەپاندنی ئیرادە دەدەن لە هەندێك ناوچەی دیكە و دەشكرێت ئەنجامەكانیش بگۆڕن و دەستكاری بكەن.
لە رۆژانی داهاتوودا بەغدا و هەولێر دەست بە گفتوگۆ دەكەن
رووداو: هیچ ئەگەرێك و چوارچێوەیەكتان هەیە بۆ هاوپەیمانییەكی سیاسی لەگەڵ حەیدەر عەبادی؟
نوجەیفی: تاوەكو ئێستا دانوستاندن نەكراوە، بەڵام پەیامێكی بەڕێز عەبادیم پێگەیشت لە رێگەی چەند كەسایەتییەكی گرنگ، خۆشحاڵی خۆی راگەیاندبوو بۆ گفتوگۆكردن لەبارەی هەڵبژاردن، منیش پێمڕاگەیاند كە دەبێت دانوستاندن و گفتوگۆ بكەین.
رووداو: ژمارەیەك سەركردەی سوننە بەهۆی هێزەكانی حەشدی شەعبییەوە لە ناوچەكانی سوننە داوای دواخستنی هەڵبژاردنیان كردووە، ئەوە داوای ئێوەشە؟
نوجەیفی: دەبێت هەڵبژاردن لەكاتی خۆی بەڕێوەبچێ. ئەمە مەسەلەیەكی دەستوورییە، بەڵام ئەگەر دۆخەكە گونجاو نەبێت، پێموایە سووربوون لەسەر ئەنجامدانی هەڵبژاردن لە كاتی ئەم جۆرە كێشانە، هەڵەیە. ئەنجوومەنی وەزیران بڕیاری گەڕاندنەوەی ئاوارەكانی بۆ سەر ماڵ و حاڵی خۆیان داوە. هەروەها بڕیار درا لەسەر ئاساییكردنەوە و سەقامگیریی ئەمنی، ئەمەش مانای پاشەكشەی هێزەكانی حەشدی شەعبییە كە بەهۆی ئۆپەراسیۆنەكانەوە هاتنە ناوچەكانمانەوە، بۆیە ئەگەر ئەمانە نەكرێن، هەڵبژاردن مایەی گاڵتەجارییە. ئێستا كاتەكە گونجاو نییە بۆ هەڵبژاردن، بەڵام بەڵێنمان پێدراوە ئەم دۆخە لەم چەند مانگەی داهاتوودا چارەسەر بكرێ.
- بڕیارەكەی ترەمپ لەبارەی قودسەوە رۆڵی ئێران بەهێزتر دەكات
رووداو: پێتانوایە هاوپەیمانی هێزە سوننەكان بەم پێكهاتەی ئێستایانەوە بەردەوام بن، بەتایبەتی لەگەڵ سەرۆكی ئەنجوومەنی وەزیران؟
نوجەیفی: هەموو هێزە سوننەكان لەژێر چەتری هاوپەیمانی هێزە نیشتمانییەكانی عێراق كۆبوونەتەوە. ئەم هاوپەیمانێتییە پێڕەوی نێوخۆی هەیە و من و بەڕێز جبووریش لەم هاوپەیمانییەداین. ئێستا هەوڵ دەدرێت میكانیزمێك بدۆزرێتەوە بۆ پرسی هەڵبژاردنەكان. ئایا بەیەك لیست یان چەند لیستێك بەشداربن دواتر لە یەك چوارچێوە كۆبكرێنەوە. لە رۆژانی داهاتوودا كۆبوونەوەی چڕ دەكرێن بۆ گەیشتن بەم میكانیزمە. بەشێوەیەكی گشتی دۆخی سوننە زۆر باشترە لە دۆخی پێشتر بەوەی چوارچێوەیەكی رێكخراو هەیە و یاسا كۆیاندەكاتەوە.
رووداو: رێگری لە حەشدی شەعبی بۆ بەشدارینەكردنیان لە هەڵبژاردن، یەكێكە لە مەرجەكانتان بۆ چوونە نێو هاوپەیمانێتی لەگەڵ حەیدەر عەبادی؟
نوجەیفی: ئەمە مەرجێكی دەستوورییە، نەك تەنیا مەرجی ئێمە بێت، تەنانەت بەڕێز عەبادی چەندینجار لە بۆنەی جیاوازدا باسی لەو پرسە كردووە. ناكرێت ئێمەش بیكەینە مەرجێك بەسەریدا، چونكە خۆی پابەندە بەمە.
رووداو: ئەی كۆمەڵگەی نێودەوڵەتی و ئەمریكا هیچ گەرەنتییەكیان لەو رووەوە پێداون؟
نوجەیفی: هیچ گەرەنتییەك نییە، ئەمریكییەكان نیگەرانن بەهۆی هەندێك رەفتار. وەك دەستوەردانی ئێران و هەندێك ئەجێندای سەیر و سەمەرە كە هەژموونیان بەسەر عێراقدا سەپاندووە. ئێمەش كۆكین لەگەڵیان لەبارەی هەندێك پرس. هەروەها ناكۆكین لەبارەی هەندێك پرسی دیكە.
رووداو: چین ئەو پرسانەی ئێوە لەگەڵ ئەمریكا ناكۆكن لەسەری؟
نوجەیفی: وەك دەزانرێت، سیاسەتی گشتیی ئەمریكا كێشەی تێدایە. بۆ نموونە دوا بڕیارەكەی چەند رۆژێك لەمەوبەری سەرۆكی ئەمریكا كارەساتە بۆ ناوچەكە. رۆڵی ئێرانی بەشێوەیەكی زۆر فراوان بەهێزتر كرد. هاوكات توندئاژۆییشی بە ئاستێكی زۆر فراوان بەهێز كرد. ئەمەش پرسێكە ئێمە بەتوندی رەتیدەكەینەوە
لە بەری راستی مووسڵ 11 هەزار خانوو بە تەواوی رووخاون
رووداو: با بگەڕێینەوە سەر باسی دۆخی نەینەوا، ئێستا دۆخی پارێزگای نەینەوا چۆنە؟
نوجەیفی: دوو رۆژ لەمەوبەر سەردانی مووسڵم كرد. ژیان لە بەری چەپ ئاسایی بووەتەوە، جموجۆڵی بازرگانی هەیە و ئارامی پێوەدیارە، بەڵام خزمەتگوزارییەكان زۆر سست و لاوازن. لە بەری راست كارەساتێكی تەواو مرۆیی هەیە. هەندێك ناوچە هەیە بەتەواوەتی وێران بووە و هیچ خزمەتگوزاری نییە و كارگێڕییەكی لاوازی هەیە. هیچ هەنگاوێك نەنراوە بۆ گەڕاندنەوەی دۆخی ئاسایی شارەكە. كەمتەرخەمییەكی زۆر لە حكومەتی خۆجێیی هەیە، هەرچۆنێك بووایە دەكرا دەست بە خزمەتگوزاری بكەن، هەروەها پشتگوێخستن و فەرامۆشكردنیش هەیە لەلایەن حكومەتی فیدراڵی، تەنیا هەندێك هەوڵی ئەملا و ئەولای پەرتەوازە هەیە و هیچ دەرەنجامێكیشی بۆ چارەسەركردنی كێشەكانی مووسڵ نەبووە. پێویستە هەرچی زووە، ئەم كێشانە چارەسەر بكرێن، بەپێچەوانەوە كارەساتێكی گەورە روودەدات.
رووداو: راپۆرت و هەواڵی رۆژنامە بیانی و نێودەوڵەتییەكان هەیە لەبارەی كوشتنی دەیان هاووڵاتی مەدەنی لە پارێزگای نەینەوا و پێشێلكاریی مافی مرۆڤ، تا چەند ئەم هەواڵانە راستن؟
نوجەیفی: بێگومان راپۆرتی زۆر هەن لەبارەی كوشتار و بەشێكیان لە دەرەوەی دەسەڵاتی شەرعی روودەدەن. بەتایبەتی تۆڵەسەندنەوە لەلایەن خەڵكی مەدەنییەوە دژ بەهەندێك كەس كە گومانی داعشبوونیان لەسەرە یان داعش بوون. بەشێكی ئەو پێشێلكارییە لەلایەن هێزە ئەمنییەكانەوە روویداوە. هەروەها لەلایەن حەشدی شەعبیش روویداوە و ئەمانەش لێكۆڵینەوەیان تێدا دەكرێت. ناكرێت هێزی ئەمنیی چەكدار یان لایەنێكی یاسایی بەبێ دادگایی خەڵك بكوژێ.
رووداو: كێ بەرپرسیاری ئەم پێشێلكارییانەیە؟
نوجەیفی: بەدڵنیاییەوە، پێشێلكاری رێكخراو و بە بەرنامە لەسەر ئاستی سوپا و هێزە چەكدارەكان نییە. بەڵام لەلایەن هەندێك ئەفسەر و ئەندامانی حەشدی شەعبی و كەسانی هۆزەكان و تەنانەت خەڵكی مەدەنیشەوە پێشێلكاری و یاساشكێنی كراوە.
رووداو: كام هێزی چەكدار لە مووسڵە؟ حەشدی شەعبی لەنێو مووسڵن؟
مووسڵ زۆر لەوە گەورەترە بەشیعە بكرێت
نوجەیفی: لەنێو مووسڵ پاسەوانی نەینەوا هەیە كە خەڵكی مووسڵن و لە حەشدی شەعبی تۆماركراون، بەڵام لەژێر فەرماندەیی هێزە چەكدارەكانی عێراقدان. چەند گرووپێكی بچووكی حەشدیش هەن كە هی مووسڵن. هەروەها سوپای عێراق و پۆلیسی فیدراڵی و پۆلیسی ناوخۆ هەن. حەشدی شەعبی لە دەرەوەی مووسڵن. هەروەها لە شارۆچكە و شارەدێیەكان هەن كە حەشدی باشوور و ناوەڕاستن.
رووداو: هەندێك لە خەڵكی مووسڵ دەڵێن لە شارەكەیاندا سیاسەتی بەشیعەكردن هەیە؟
نوجەیفی: لەوانەیە تۆزێك زێدەڕۆیی لەمبارەیەوە هەبێت. زۆربەی ئەوانەی دۆخەكەیان بۆ گونجاوە گەڕاونەتەوە، زۆربەی ئەوانەی ناگەڕێنەوە، بەهۆی نەبوونی ماڵ و خانووە. تەنیا لە بەری راستی مووسڵ 11 هەزار خانوو بە تەواوی رووخاون. واتە لانیكەم 11 هەزار خێزان ناتوانن بگەڕێنەوە. هەروەها هەندێك پێشێلكاری هەن. ناشكرێت بڵێین ئەمن و ئاسایش 100% دابین كراوە، بەڵام ئەو پروپاگەندەیە بنەمای نییە كە دەڵێت مووسڵ رووبەڕووی سیاسەتی بەشیعەكردن دەبێتەوە. مووسڵ زۆر لەوە گەورەترە بەشیعە بكرێت.
رووداو: هیچ پلانێك و بودجەیەكی دیاریكراوی باش هەیە بۆ دووبارە ئاوەدانكردنەوەی مووسڵ؟
نوجەیفی: تاوەكو ئێستا شتێكی گرنگ نییە، ئەوانەی كراون كاری لاوەكین و تاوەكو ئێستا ئامرازەكانی ژیانی بۆ دابین نەكراوە.
رووداو: نەبوونی بودجەیەكی تایبەتی باش بۆ مووسڵ هۆكاری گەڕاندنەوەی پرۆژەی بودجە بوو بۆ سەرۆكایەتی ئەنجوومەنی وەزیران؟
نوجەیفی: بەڵێ پەرلەمانتارانمان پرۆژەی بودجەیان رەتكردەوە، چونكە هیچی ئەوتۆی بۆ ئاوەدانكردنەوەی مووسڵ لەخۆنەگرتبوو. ئەمە جگە لە مووچەی فەرمانبەران و پێداویستییەكانی دیكە كە پەیوەندیدارە بە گەشەپێدانی هەرێمەكان و چەندین پرسی دیكەی خزمەتگوزاری. بۆیە لە یەكەم دانیشتندا بایكۆتمان كرد.
رووداو: هیچ پلانێكی كوتلەی كوردی و سوننە هەبوو بۆ رەتكردنەوەی بودجە؟
نوجەیفی: بەڵێ، رەتكردنەوەی بودجە بەشێوەیەكی هاوبەش بوو، بەڵام هۆكارەكان جیاواز بوون.
رووداو: كێ بەرپرسە لە مانەوەی دۆخی مووسڵ وەك خۆی؟
نوجەیفی: بێگومان نەبوونی پلانێكی حكومی بۆ گەشەپێدانی پارێزگاكە، دابیننەكردنی پارە و بودجە نە لە بودجەی گشتی و نە لە كۆمەڵگەی نێودەوڵەتی، هەروەها گەندەڵیی زۆر گەورە كە دزەی كردووەتە نێو بەشەكانی حكومەتی خۆجێیی لەو پارانەی بۆیان دابینكرابوو. هەر بەهەمان هۆكاریشەوە بەشێكی زۆری هاوكاری و یارمەتییە نێودەوڵەتییەكان سڕكران.
رووداو: ئەنجوومەنی پارێزگای نەینەوا، پارێزگاری لەكار لادا، بەڵام دادگای فیدراڵی بڕیارەكەی ئەنجوومەنی پارێزگای رەتكردەوە، كاری پارێزگار چۆن هەڵدەسەنگێنن؟
نوجەیفی: رەتكردنەوەی بڕیارەكە شكڵی بوو. چونكە شێوازی دانیشتنەكە گونجاو نەبوو، واتە پرسی لێپێچینەوە نەبوو. پێموایە دووبارە بڕیاری لەكارلادان بۆ پارێزگار دەدرێت. ئێمە بەهیچ شێوەیەك لە كارەكانی پارێزگار رازی نین و پێمانوایە كەسێكی گونجاو نییە بۆ بەڕێوەبردنی پارێزگایەكی وەك نەینەوا.
رووداو: حەیدەر عەبادی باسی دادگایی نووری مالیكی دەكات لەسەر بەدەستەوەدانی پارێزگای نەینەوا. پێتانوایە ئەم كارە بكات، پشتیوانی لێدەكەن؟
نوجەیفی: ئەو، لە هیچ بۆنەیەكدا بەهیچ شێوەیەك ناوی بەڕێز مالیكی نەهێناوە، بەڵام ئاماژەی بەوەدا كە كێ هۆكار بووە لە داگیركردنی مووسڵ و ئێمەش پشتیوانی لە لێكۆڵینەوەیەكی واقیعی و راستگۆ دەكەین لەلایەن چەند لایەنێكی رێگەپێدراوی راستەقینە كە بتوانێت لەگەڵ هەموو كەسە پەیوەندیدارەكان لێكۆڵینەوە بكات.
رووداو: لەگەڵ نووری مالیكیش؟
نوجەیفی: لەگەڵ ئەسیل نوجەیفیش. هیچ لاریمان نییە. پێمانوایە حكومەتی پێشوو هۆكاری شكست و داگیركردنی مووسڵ بوو. بەشێك لە فەرماندە سەربازییەكانیش بە ئەنقەست رێگەیان خۆشكرد بۆ رادەستكردنی پارێزگاكە. ئێمە لەگەڵ لێكۆڵینەوەین و لەگەڵ ئەوەین هەموو ئەو كەسانەی تێوەگلاون راپێچی دادگا بكرێن و سزای دادپەروەرانە بدرێن لە زووترین كاتدا.
رووداو: بۆچی ئەم لێكۆڵینەوانە وەستاون؟
نوجەیفی: دۆخی سیاسی لە بەغدا رێگرە، جۆرێك لە كێبڕكێ هەیە و جۆرێك لە هاوسەنگی هەیە رێ لە سەرۆكوەزیران و پەرلەمان و دادگا دەگرن ئەم پرسە یەكلایی بكاتەوە. پێمانوایە دەبێت لایەنی سەربەخۆ و بێلایەنی بەهێز هەبێت ئەم كەیسە زۆر ئاڵۆزە یەكلایی بكاتەوە.
رووداو: دەگوترێت ئەگەر هەڵبژاردن لە كاتی خۆیدا بكرێ، عەبادی سەرناكەوێت بەڵكو مالیكی بەهۆی پشتگیریكردنی لەلایەن حەشدی شەعبی سەردەكەوێت؟
نوجەیفی: بەڕێز عەبادی ئێستا لەوپەڕی بەهێزیدایە، سەركەوتنەكانیشی دیارن لە رووبەڕووبوونەوەی تیرۆر، بەڵام كێشەی زۆر لە وڵاتدا هەیە. لەوانەیە لەم چەند مانگەی داهاتوودا كۆتاییان بێت و لەلایەن ركابەرانی بەڕێز عەبادییەوە بقۆزرێتەوە وەك كەیسەكانی ئابووری، خزمەتگوزاری و چەندین پرسی دیكە. ئێستا ئەو بەهێزە، بەڵام لەوانەیە لە رۆژانی داهاتوودا سست ببێتەوە، پێموایە بەڕێز مالیكیش لە داهاتوودا كێشەی زۆری بۆ دروست بكرێت بەهۆی چەندین كەیسی جیاوازەوە.
رووداو: ئێوە لە ماوەی رابردوودا سەردانی بەڕێز مەسعود بارزانیتان كرد، هیچ نامەیەكتان لە بەغداوە پێبوو بۆ بارزانی یان هیچ دەستپێشخەرییەكتان هەبوو؟
نوجەیفی: سەردانەكەم بۆ لای بەڕێز بارزانی سەردانێكی سیاسی بوو، هیچ نامەیەكم پێنەبوو، بەڵام پێگەم وەك جێگری سەرۆككۆمار و سەرۆكی حیزبی موتەحیدون، ویستم لەگەڵ بەڕێز بارزانی رەوشی كوردستان و پەیوەندی لەگەڵ بەغدا و رێگاكانی بەردەست بۆ چارەسەری لەگەڵ تاوتوێ بكەم.
رووداو: عەبادی دەستپێشخەرییە هاوبەشەكەی ئێوەی لەگەڵ بەڕێز ئەیاد عەلاوی رەتكردەوە كە تایبەتە بە چارەكردنی كێشەكان لەگەڵ حكومەتی فیدراڵ، دەڵێن ئەوان پێویستیان بە نێوەندگیری نییە، باشە بۆچی تائێستا دانوستاندنی لەگەڵ هەرێمی كوردستان نەكردووە؟
نوجەیفی: بێگومان دۆستی زۆر هەن بۆ هەردوولا، هەوڵی دۆزینەوەی زەمینەیەكی هاوبەش دەدەن بۆ دانوستاندن، دواترینیان دەستپێشخەرییەكەی فەرەنسا بوو پێش چەند رۆژێك، هەروەها گفتوگۆ هەن لە نێوان هەردوولا، بەتایبەت لە پرسی سەربازی، دیدار لە نێوان فەرماندەكانی سوپای عێراق و پێشمەرگە لەبارەی دەروازە سنوورییەكان هەبوو، بەڵام چەند مەرجێك هەن بەڕێز عەبادی بۆ دانوستاندن دایناون و هەرێمی كوردستانیش دەستی گرتووە بە چەند پرسێكەوە و رازی نابێ تێپەڕێندرێن، بەهەرحاڵ دوا بڕیاری قبوڵكردنی بڕیاری دادگای فیدراڵ ئەرێنی بوو، دەرگاش لە پێش گفتوگۆ واڵا دەكات، بە باوەڕی من لە رۆژانی داهاتوودا بەغدا و هەولێر دەست بە گفتوگۆ دەكەن. من گەشبینم لە ماوەی كەمی داهاتوودا رێككەوتنێكی سەرەتایی بەدیدێت لەبارەی چۆن تێپەڕاندنی ئەم كێشەیە.
رووداو: واتا ئێوە لەگەڵ مەرجەكانی حەیدەر عەبادین سەبارەت بە هەڵوەشاندنەوەی ئەنجامی گشتپرسی؟
دووبارە بڕیاری دەستلەكاركێشانەوە بۆ پارێزگاری مووسڵ دەردەچێ
نوجەیفی: ئێمە بێگومان دژی گشتپرسین، چونكە زێدەڕۆیی كرایە سەر ناوچە كێشە لەسەرەكان و درانە پاڵ هەرێمی كوردستان. بڕیارێك هەبوو بۆ راگەیاندنی دەوڵەت بەو هەموو ناوچانەوە، ئەمەش پێچەوانەی دەستووری عێراقە. ئێمە دژی ئەم پرسەین، بەڵام بڕیاری دادگای فیدراڵی یەكلاكەرەوەیە و هەمووان دەبێ پابەندی بن.
رووداو: بۆچی ئێوە پاڵپشتی بڕیارەكانی دادگای فیدراڵی دەكەن سەبارەت بەم پرسە بەتەنیا، پرسی دیكە هەن وەك قەدەغەكردنی گەشت لە فڕۆكەخانەكانی هەرێمی كوردستانەوە دادگای فیدراڵی تائێستا قسەی لەبارەوە نەكردووە؟
نوجەیفی: ئێمە لەگەڵ گفتوگۆ و نەسەپاندنی سزاین بەسەر گەلی كورد، تەنانەت پێش گشتپرسیش. ئێمە پێمانوایە دەرفەتێك هەیە بۆ چارەسەركردنی پرسەكان بەشێوەیەكی دۆستانە، چونكە ئێمە یەك گەلین، دادگای فیدراڵی گشتپرسی و لێكەوتەكانی و بڕیارەكانی هەڵوەشاندەوە و دەبێ حكومەتی فیدراڵ ئێستا كێشەی دەروازەكان چارەسەر بكات.
رووداو: كەواتە لە چەند رۆژی داهاتوودا جموجۆڵ و كۆبوونەوەی نوێ دەبینین؟
نوجەیفی: چەند رۆژێكی دیكە سەرۆكایەتی كۆمار كۆدەبێتەوە، سەرۆككۆمار و جێگرانی سەرۆك دواتر كۆبوونەوەیەكی هەموو سەركردە سیاسییە سەرەكییەكان لە وڵات دوای هەفتەیەك لە سەرۆكایەتی كۆمار بەڕێوەدەچێ، دەكرێ هەموو ئەم پرسانە تاوتوێ بكرێن و هەوڵی لێكتێگەیشتن بدەین لە نێوان بەغدا و هەولێر بۆ دۆزینەوەی چارەی خێرا بۆ قەیرانەكە.
رووداو: هێزێكی توركی لە باشیكە، ئەم پرسە بەكوێ گەیشت، حكومەتی فیدراڵ داوای دەرچوونی ئەو هێزانەی دەكرد و توركیا سوور بوو لەسەر مانەوە و دژی ئەوە بوو حەشدی شەعبی بچێتە ناوچەكانی تەلەعفەر و مووسڵ، بەڵام ئەوەی روویدا روویدا، چۆن دەڕواننە هێزەكەی توركیا لەوێ، ئایا ئەنقەرە و بەغدا گەیشتوونەتە رێككەوتنێك؟
ئوسامە نوجەیفی: پێموایە دانوستاندن لە نێوان حكومەتی عێراق و حكومەتی توركیا كرا، سەردانی فەرمیی گرنگیش هەبوون، پێموایە ئێستا دواخراوە بەهۆی ئەو دۆخەی كە هەیە، پرسی پارتی كرێكارانی كوردستان، گشتپرسیی كوردستان، پرسی لەناوبردنی پاشماوەكانی تیرۆر كە هێشتا كۆتایی نەهاتووە، بۆیە ئێستا بێدەنگی بەرامبەر پرسەكە هەیە.
هاوكاری هەیە بۆ دوورخستنەوەی پەكەكە لە عێراق
رووداو: رێككەوتنی نێوان حكومەتی بەغدا و ئەنقەرە لەبارەی پارتی كرێكارانی كوردستان لە شنگال و مەخموور چییە؟
ئوسامە نوجەیفی: من وردەكاریم لا نییە، من بەشێك نیم لە ئەنجوومەنی وەزیران، ئەم پرسەش پەیوەندە بە ئەنجوومەنی ئاسایشی نیشتمانی هەیە، دەكرێ رێككەوتنی تایبەت هەبن، بەڵام هاوكاری هەیە بۆ وەستاندنی چالاكییەكانی ئەم حیزبە و دوورخستنەوەی لە خاكی عێراق.
.jpg&w=3840&q=75)
