رووداو- ئەنقەرە
رەجەب تەییب ئەردۆغان، سەرۆكکۆماری تورکیا ئەحمەد داودئۆغڵو، سەرۆكوەزیرانی پێشووی بۆ پێكهێنانی حکومەتی نوێی تورکیا راسپارد.
راسپاردنەکەی داودئۆغڵو پاش کۆبوونەوەیەکی یەک کاژێر و نیوی هات لە کۆشکی سەرۆکایەتیی تورکیا لەنێوان ئەردۆغان و داودئۆغڵودا.
لە هەڵبژاردنی 7 ی حوزەیرانی 2015 دا، هیچ پارتێکی سیاسی لە تورکیا نەیتوانی ژمارەی پێویستی کورسی بۆ پێکهێنانی حکومەت بەتەنها بەدەستبهێنێت. داوودئۆغڵو 45 رٶژی لەبەردەستدایە بۆ پێکهێنانی حکومەتی نوێ کە دەبێتە حکومەتی شەست و سێیەمین لە مێژووی کۆماری تورکیادا.
بەگوێرەی لێدوانێک لە نووسینگەی سەرۆکوەزیرانی تورکیاوە، داودئۆغڵو لەگەڵ هەر سێ حیزبەکەی دیکە، جەهەپە و مەهەپە و هەدەپە کۆدەبێتەوە
ئەگەر لە ماوەی ئەم 45 رۆژەدا داودئۆغڵو نەتوانێت حکومەتێکی هاوپەیمانی پێکبهێنێت، ئەوا سەرۆککۆماری تورکیا مافی ئەوەی هەیە کەسێکی دیکە رابسپێرێت یاخود بڕیاری ئەنجامدانی هەڵبژاردنی نوێ بدات.
