فەرماندەی سێنتکۆم: ژیریی دەستکرد لە جەنگی ئێراندا کاژێری بۆ کردووین بە چرکە

رۆژی چوارشەممە، 11ی ئاداری 2026، ئەدمیراڵ براد کوپەر، فەرماندەی سێنتکۆم لە ڤیدیۆیەکدا دوایین پێشڤەچوونە سەربازییەکانی لە جەنگی ئێراندا خستنەڕوو. 

براد کوپەر لە گوتارێکدا وردەکاریی هێرشەکانی ئەمریکای خستەڕوو و رایگەیاند: "هێزەکانی ئەمریکا بەردەوامن لە پیشاندانی هێزێکی وێرانکەر دژی رژێمی ئێران. هێزی شەڕکەری ئێمە لە گەشەکردندایە و هێزی ئێرانیش لە پاشەکشەدایە. ئامانجی ئێمە لەناوبردنی توانای ئێرانە بۆ هەڕەشەکردن لە ئەمریکا و دراوسێیەکانی."

فەرماندەی سێنتکۆم هێرشەکان وەک "خێرا، داینامیکی و یەکلاکەرەوە" وەسف دەکات و دەڵێت لە یەکەم 24 کاژێری هەڵمەتەکەوە، هێرشە مووشەکی و درۆنییەکانی ئێران بە شێوەیەکی بەرچاو کەمیان کردووە.

رۆژی 28ی شوبات، ئەمریکا و ئیسرائیل هێرشیانکردە سەر ئێران و دواتر ئەویش بە مووشەک و درۆن وەڵامیدانەوە. ئێران وەکو بەشێک لە وەڵامەکەی هێرشیکردە سەر وڵاتانی کەنداویش. 

دوێنێ، دان کەین، سەرۆکی دەستەی ئەرکانی هاوبەشی سوپای ئەمریکا رایگەیاند، "تاوەکو ئێستا زیاتر لە پێنج هەزار ئامانجمان لە ناو خاکی ئێران پێکاوە. هێرشە مووشەکییەکانی ئێران 90٪ و هێرشی درۆنەکانیان 83٪ کەمی کردوو". 

لەبارەی باڵادەستی دەریایی، فەرماندەی سێنتکۆم ئاشکرای کرد کە توانیویانە دوایین دانە لە هەر چوار کەشتییە جەنگییەکەی جۆری 'سولەیمانی' لەناو ببەن، کە بە تەواوی ئەو پۆلە کەشتییە لە جەنگەکەدا لەنێوبراون. 

ئەو جەختی لەوەش کردەوە، وێنە مانگییە دەستکردەکان پیشانی دەدەن کە چەندین کەشتی جۆری 'جاماران' و 'بایندەر' و کەشتیی قاچاخی درۆن لە بەندەری چابەهار و نزیک تەنگەی هورمز بە تەواوی تێکشکێنراون. ئامانجی ئەم ئۆپەراسیۆنانە کۆتاییهێنانە بە توانای ئێران لە "بێزارکردنی کەشتیوانی لە تەنگەی هورمز".

لە رۆژی دووەمی جەنگەکەوە، ئێران تەنگەی هورمزی داخستووە و هۆشداریشیداوە بە هەر کۆمپانیا و وڵاتێک کە بیەوێت کەشتییەکانی بەو ناوچەیەدا تێپەڕێنێت. 

بەپێی گوتەکانی فەرماندەکەی سێنتکۆم، هێزە ئەمریکییەکان بە شێوەیەکی سیستماتیک ژێرخانی سەربازیی ئێران هەڵدەوێشێننەوە. 

کوپەر رایگەیاند، "شەوی رابردوو، هێزی بۆمبهاوێژمان لە کارگەیەکی گەورەی بەرهەمهێنانی مووشەکی بالیستییان دا." ئەمە نیشانەی ئەوەیە کە تەنیا هێرش ناکرێتە سەر ئەو مووشەکانەی ئەمڕۆ دەتەقێنرێن، بەڵکو کار دەکرێت بۆ لەناوبردنی هەڕەشەکانی داهاتووش لە رێگەی لێدان لە ناوەندە پیشەسازییەکانی بەرگرییان.

لە بەشێکی دیکەی گوتەکانیدا، فەرماندەی سێنتکۆم ئاماژەی بە بەکارهێنانی تەکنەلۆژیای نوێ کرد و گوتی: "جەنگاوەرەکانمان سوود لە جۆرەها ئامرازی پێشکەوتووی ژیریی دەستکرد وەردەگرن." ئەم سیستەمانە یارمەتی فەرماندەکان دەدەن لە چرکەیەکدا بڕیاری زیرەکتر بدەن، بە جۆرێک ئەو پرۆسانەی پێشتر چەند کاژێرێکیان دەویست، ئێستا لە چرکەیەکدا دەکرێن. 

هەروەها تیشکی خستە سەر رۆڵی "هێزی بۆشایی ئاسمان" کە وەک هۆکارێکی سەرەکی لە دابەزاندنی تواناکانی ئێران و پاراستنی هێزە ئەمریکییەکان کار دەکەن.

"من ئەدمیرال براد کوپەرم لێرە لە فەرماندەیی ناوەندیی ویلایەتە یەکگرتووەکانی ئەمریکا، کە سەرکردایەتی ئەو هێزانە دەکەم کە ئۆپەراسیۆنی تووڕەیی داستانئاسا جێبەجێ دەکەن. سەرەتا دەمەوێت بزانن کە ئێمە بەردەوام خێزانی قارەمانە کوژراوەکانمان و هاوتیمە بریندارەکانمان لە بیر و نزاکانماندایە. 

هەروەها دەمەوێت سوپاسی خێزانی 50 هەزار سەربازە ئەمریکییە نێر و مێیەکان بکەم، کە لە رۆژهەڵاتی ناوەڕاست و دەوروبەری جێگیرکراون. من سوپاسگوزاری قوربانیدانی بێوێنەی ئێوەم و دەزانم کە ئەمریکییەکان لە سەرتاسەری وڵات ئێوەیان لە دڵدایە. با بە هەڵسەنگاندنی گشتی خۆم بۆ ئۆپەراسیۆنی تووڕەیی داستانئاسا دەست پێبکەم. بە کورتی، هێزەکانی ئەمریکا بەردەوامن لە پیشاندانی هێزێکی شەڕکەری وێرانکەر دژی رژێمی ئێران. پێشتر ئەمەم گوتووە بەڵام شایەنی دووبارەکردنەوەیە؛ هێزی شەڕکەری ئەمریکا لە گەشەکردندایە و هێزی شەڕکەری ئێران لە پاشەکشەدایە. ئێمە لەسەر ئامانجە سەربازییە زۆر روونەکانمان بەردەوامین بۆ لەناوبردنی توانای ئێران لە پیشاندانی هێز دژی ئەمریکییەکان و دراوسێیەکانی. هەموو رۆژێک بە تووندی لە مووشەکە بالیستییەکان و درۆنەکانی ئێران دەدەین. تاوەکو ئێستا، زیاتر لە پێنج هەزار و 500 ئامانجمان لە ناوەوەی ئێران پێکاوە، لەوانە زیاتر لە 60 کەشتی، بە بەکارهێنانی جۆرەها سیستەمی چەکی ورد. هەر دوێنێ، شەپۆلی هێرشەکانمان نزیکەی هەموو کاژێرێک بوو کە لە شوێن و ئاراستەی جیاوازەوە دەچوونە ناو ئێران. هەروەها دوایین دانەمان لە هەر چوار کەشتییە جەنگییەکەی جۆری 'سولەیمانی' لەناو برد؛ ئەوە تەواوی پۆلێک لە کەشتییە ئێرانییەکانە کە ئێستا لە جەنگەکەدا لەنێوبراون. من هێرشەکانمان بە خێرا، داینامیکی و یەکلاکەرەوە وەسف دەکەم. لە یەکەم 24 کاژێری ئەم هەڵمەتەوە، هێرشە مووشەکی و درۆنییەکانی ئێران بە شێوەیەکی بەرچاو کەمیان کردووە، بەڵام شایەنی ئاماژە پێکردنە کە هێزە ئێرانییەکان بەردەوامن لە بە ئامانجگرتنی ئەنقەستی سڤیلە بێتاوانەکان لە وڵاتانی کەنداو، لە کاتێکدا لە پشت گەلەکەی خۆیانەوە خۆیان دەشارنەوە و لە شارە قەرەباڵخەکانی ئێرانەوە هێرشەکان ئەنجام دەدەن. بێگومان، ئەو هێزانەی ئۆپەراسیۆنی تووڕەیی داستانی جێبەجێ دەکەن تەنیا بەرگری لە هەڕەشەکانی ئێران ناکەن، بەڵکو ئێمە بە شێوەیەکی سیستماتیک تێکیاندەشکێنین لە رێگەی لێدان لە مووشەک و درۆنەکانیان و هەروەها لێدان لە ناوەندە پیشەسازییەکانی بەرگرییان. هەر شەوی رابردوو، هێزی بۆمبهاوێژمان لە کارگەیەکی گەورەی بەرهەمهێنانی مووشەکی بالیستییان دا وەک نموونەیەک. کەواتە تەنیا پەیوەندی بەوەوە نییە کێ ئەمڕۆ تەقەمان لێدەکات، بەڵکو پەیوەندی بە لەناوبردنی هەڕەشەکە لە داهاتووشدا هەیە. با ئێستا هەندێک لە ئەنجامەکانی هەوڵە مەزنەکانی هێزە هاوبەشەکانی ئەمریکاتان پیشان بدەم. لێرەدا کەشتییەکی جەنگی ئێرانی جۆری 'جاماران'، کەشتییەکی گەورەی دەورییە، کەشتییەکی قاچاخی درۆن و چوار کەشتی دیکەی شەڕکەر دەبینن کە لە بەندەری چابەهار لە دەریای عومان لەنگەریان گرتووە، رۆژێک پێش ئەوەی ئۆپەراسیۆنی تووڕەیی داستانئاسا دەست پێبکەین. لێرەش هەمان بەندەر دەبینن دوای چوار رۆژ؛ هەموو کەشتییەکان لە کار خراون. ئەم کەشتییە جۆری 'بایندەر' لێی دراوە و وەرگەڕاوە. لێرە نموونەیەکی تر هەیە؛ دوو کەشتی شەڕکەری ئێرانی دەبینن کە لە بنکەیەکی دەریایی ئێران لە نزیک تەنگەی هورمز لەنگەریان گرتووە تەنیا چەند کاژێرێک دوای دەستپێکردنی هەڵمەتەکە. لێرەش دەبینن دوای سێ رۆژ چۆن بوونەتە خەڵوز دوای ئەوەی بە چەکی ورد لێمان دان. بۆ چەندین ساڵ رژێمی ئێران هەڕەشەی لە کەشتیوانی بازرگانی و هێزەکانی ئەمریکا کردووە لە ئاوە نێودەوڵەتییەکاندا. ئەرکی ئێمە کۆتاییهێنانە بە توانای ئەوان لە پیشاندانی هێز و بێزارکردنی کەشتیوانی لە تەنگەی هورمز. لە ئاسمانەوە، ئێمە سەرکەوتوو بووین لە کۆکردنەوەی هێزێکی ئاسمانی بە شەپۆلی فڕۆکە جەنگییە پێشکەوتووەکان کە گوشاری بەردەوام لەسەر دوژمن دروست دەکەن. باڵادەستی ئێمە هەوڵێکی تەنیا نییە، بەڵکو بەڵگەیە بۆ هێزی هاوپەیمانییە پۆڵایینەکانمان. ئێمە بەردەوامین لە هاوئاهەنگی نزیک و کاریگەر لەگەڵ ئیسرائیل لەم ئۆپەراسیۆنە زۆر گەورەیەدا، هەروەها هاوئاهەنگی دەکەین و شان بە شان خزمەت دەکەین لەگەڵ هەموو هاوبەشەکانمان لە رۆژهەڵاتی ناوەڕاست. ئێمە لەسەر رێگەیەکین بۆ لەناوبردنی توانای ئێران لە هەڕەشەکردن لە ئەمریکییەکان و دۆستەکانمان و ئەمەش لە رێگەی تێکەڵەیەک لە کوشندەیی، وردی و داهێنانی خێرا بەدی دەهێنین. با تیشک بخەمە سەر چەند نموونەیەک، لانیکەم ئەوانەی کە نهێنی نین، لەسەر ئەوەی چۆن کاریگەری کوشندە بە رێگەی تەواو نوێ بەدی دەهێنین. یەکەم، جەنگاوەرەکانمان سوود لە جۆرەها ئامرازی پێشکەوتووی ژیریی دەستکرد وەردەگرن. ئەم سیستەمانە یارمەتیمان دەدەن لە چرکەیەکدا بە ناو بڕێکی زۆر لە زانیاریدا بگەڕێین، تاوەکو سەرکردەکانمان بتوانن بڕیاری زیرەکتر و خێراتر بدەن پێش ئەوەی دوژمن بتوانێت وەڵامی هەبێت. مرۆڤەکان هەمیشە بڕیاری کۆتایی دەدەن لەسەر ئەوەی چی بپێکن و چی نەپێکن و کەی بیپێکن، بەڵام ئامرازە پێشکەوتووەکانی ژیریی دەستکرد دەتوانن ئەو پرۆسانەی کە پێشتر چەند کاژێرێک و هەندێک جار چەند رۆژێکیان دەویست، بگۆڕن بۆ چرکە. من بەردەوام سەرسامم بە هەموو بەشەکانی سوپای ئەمریکا. تەواوی تیمەکە کارێکی نایاب دەکەن. ئۆپەراسیۆنەکانی لێدان لەلایەن هێزە هاوبەشەکانمانەوە بەردەوامن. من وای دەبینم کە ئێمە بە روونی باڵادەستی ئاسمانیمان بەسەر ناوچە فراوانەکانی ئێراندا هەیە. ئێمە توندترین چەتری بەرگری ئاسمانی تێکەڵاومان لە رۆژهەڵاتی ناوەڕاست هەیە و ئۆپەراسیۆنە بەرگرییەکانی تیمەکانی سوپا، هێزی دەریایی، هێزی ئاسمانی، هێزی مارێنز و هێزی بۆشایی ئاسمان بە شێوەیەکی شکۆدار کار دەکەن. تێبینییەک لەسەر هێزی بۆشایی ئاسمان؛ باڵادەستی بۆشایی ئاسمانمان هۆکارێکی سەرەکی بووە لەم جەنگەدا. هێزی بۆشایی ئاسمان دوو شت دەکات کە جیهان نایبینێت: یەکەم، تواناکانی ئێران دادەبەزێنێت و دووەم، یارمەتی پاراستنی هێزە ئەمریکییەکان دەدات. لە کۆتاییدا، سەرەڕای ئەم پێشکەوتنە سەرسوڕهێنەرە، بە هەڵەدا نەچن، ئێمە زۆر وریایین و من ناتوانم لەوە زیاتر شانازی بە تیمی ئۆپەراسیۆنی تووڕەیی داستانئاساییەوە بکەم و دەزانم گەلی ئەمریکاش هەمان شانازییان هەیە. بۆ هەموو جەنگاوەرەکانمان لەوێ، تکایە لەسەر ئەم کارە نایابانە بەردەوام بن. زۆر سوپاس."