رووداو دیجیتاڵ
هێزە تایبەتەکانی ئیسرائیل بە هێلیکۆپتەر لە رۆژهەڵاتی لوبنان دابەزین و زنجیرەیەک بۆردوومانی چڕیان کردە سەر شارۆچکەی نەبی شیت، کە بە قەڵای حیزبوڵڵا دادەنرێت. لە ئەنجامدا 41 کەس کوژران، بەڵام ئۆپەراسیۆنەکە شکستی هێنا لە دۆزینەوەی روفاتی رۆن ئاراد، فڕۆکەوانی ئیسرائیلی کە لە ساڵی 1986ـەوە بێسەروشوێنە.
وردەکاریی ئۆپەراسیۆنەکە
شارۆچکەکە بووەتە وێرانە. هێزەکانی ئیسرائیل جلی سوپای لوبنانیان لەبەر کردبوو و ئۆتۆمبێلی فریاکەوتنی ساختەیان بەکارهێنابوو، کە هاوشێوەی ئەو ئۆتۆمبێلانە بووە کە حیزبوڵڵا بەکاریان دێنێت.
حیزبوڵڵا دەڵێت کاژێر 10:30ی شەو هەستیان بە دزەکردنی 4 هێلیکۆپتەر کردووەو پێکدادان دروست بووە. دواتر ئیسرائیل بۆ رزگارکردنی هێزەکەی، 40 جار ناوچەکەی بۆردوومان کردووە.
ئامانجەکە چی بوو؟
سوپای ئیسرائیل دانی بەوەدا نا، کە ئامانجیان دۆزینەوەی بەڵگە بووە لەسەر رۆن ئاراد، بەڵام هیچ شتێکیان دەست نەکەوتووە.
بەرپرسێکی حیزبوڵڵا دەڵێت ئیسرائیلییەکان هەوڵیان داوە گۆڕێک لە گۆڕستانی بنەماڵەی شوکر هەڵبدەنەوە، چونکە گومانیان هەبووە پەیوەندی بە دۆسیەکەوە هەبێت.
کوژراوان
بەپێی وەزارەتی تەندروستیی لوبنان، لەم هێرشەدا 41 کەس کوژراون و 40ی دیکەش بریندارن. لە سەرەتای جەنگەکەوە تاوەکو ئێستا نزیکەی 300 کەس لە لوبنان کوژراون.
هاوژینی ئاراد: ژیانی سەربازەکان مەخەنە مەترسییەوە
هاوژینی رۆن ئاراد سوپاسی سوپای کرد، بەڵام داوای کرد چیدیکە ژیانی سەربازەکان نەخەنە مەترسییەوە تەنیا بۆ دۆزینەوەی ئێسک و پروسکی مێردەکەی.
ئەم رووداوە لە کاتێکدایە شەڕ لە لوبنان فراوان بووە، دوای ئەوەی حیزبوڵڵا بۆ تۆڵەسەندنەوەی کوژرانی عەلی خامنەیی دەستی بە هێرشی مووشەکی کرد بۆ سەر ئیسرائیل.
.jpg&w=3840&q=75)
