رووداو دیجیتاڵ
بڕیارە لە ئەمڕۆوە لە کاتی نەبوونی کارەبای نیشتمانیدا، موەلیدە ئەهلییەکانی سلێمانی کارەبا بدەنە هاوبەشان.
فازڵ عومەر، قایمقامی سلێمانی بە تۆڕی میدیایی رووداوی گوت: "بەگوێرەی رێککەوتن لەگەڵ کۆمەڵەکەیان، دەبێت لە ئەمڕۆوە موەلیدەکان کارەبا بدەنە هاووڵاتییان".
عوسمان محەممەد، سەرۆکی کۆمەڵەی موەلیدە ئەهلییەکانی سلێمانی، ئەمڕۆ سێشەممە 10-11-2026 بە تۆڕی میدیایی رووداوی گوت: "بەفەرمانی قایمقامییەت، لە ئەمڕۆوە لە نەبوونی کارەبای نیشتمانیدا موەلیدەکان لە کاژێر 06:00ی بەیانی بۆ بۆ 08:00 و 04:00ی ئێوارە تاوەکو کاژێر 01:00ی شەو دەبێت کار بکەن".
لەبارەی کرێی ئەمپێرەوە عوسمان محەممەد گوتی: "بە ئێمە گوتراوە تاوەکو هەینی کار بکەین، ئەگەر کارەبا چاک نەبوو شەممە نرخی ئەمپێرمان بۆ دیاری دەکرێت؛ ئەگەریش چاک بوو گوایە پارەی خەڵکمان لایە و نابێت پارە کۆ بکرێتەوە".
هەروەها قایمقامییەتی هەڵەبجە لە راگەیێندراوێکدا داوا لە هاونیشتمانییان دەکات، لە هەر گەڕەکێک لە نەبوونی کارەبای نیشتمانیدا موەلیدەکان کاریان نەکرد ئاگاداریان بکەنەوە.
لە هەولێر لە دوێنێوە موەلیدەکان کار دەکەن؛ خۆران خۆرانی، سەرۆکی ئەنجوومەنی باڵای موەلیدە ئەهلییەکانی پارێزگای هەولێر بە تۆڕی میدیایی رووداوی گوت، دوێنێ لەگەڵ پارێزگای هەولێر کۆبوونەتەوە و بڕیاریان داوە بۆ ئەم دۆخە خشتەیەک بۆ کارکردنی موەلیدە ئەهلییەکان دابنێن و لە ئەمڕۆوە بچێتە جێبەجێکردنەوە.
بەگوێرەی خشتە نوێیەکەی هەولێر، بەیانیان لە کاژێر 07:00ی بەیانی تاوەکو 09:00ی بەیانی؛ هەروەها نیوەڕوان لە کاژێر 01:00ی پاشنیوەڕۆ تاوەکو 01:00ی شەو لە نەبوونی کارەبای نیشتمانیدا موەلیدەکان دەبێت کارەبا بدەنە هاوبەشان.
لەبارەی نرخی ئەمپێری موەلیدەشەوە سەرۆکی ئەنجوومەنی باڵای موەلیدە ئەهلییەکانی پارێزگای هەولێر گوتی: "نرخ دیاری نەکراوە، بەڵام پێشتر لە زۆرینەی گەڕەکەکان بۆ 160 کاژێر کارکردنی موەلیدە بۆ یەک ئەمپێر 10 هەزار دینار وەرگیراوە، بۆ ئەم خشتەیە دواتر نرخی نوێ رادەگەیێندرێت".
لە دهۆک پێش کەمبوونەوەی زیاتری کارەبا، موەلیدەکان بەردەوام بوون لە کارکردن و مانگانە لە کۆتایی مانگەکەدا بەگوێرەی کاژێرەکانی کارکردن پارەی ئەمپێر دیاری دەکرێت.
شەوی یەکشەممە 08-11-2026 بە درۆن هێرشکرایە سەر کێڵگەی کۆرمۆر لە سنووری چەمچەماڵ، لە ئەنجامدا بەرهەمهێنانی گاز لە کێڵگەکە راگیرا.
دوای هێرشەکە هەردوو وەزارەتی سامانە سرووشتییەکان و وەزارەتی کارەبای حکومەتی هەرێمی کوردستان لە راگەیێندراوێکی هاوبەشدا رایانگەیاند: "کاژێر 11:00ـی شەو لە کردەوەیەکی تیرۆریستیدا هێرش کرایە سەر کێڵگەی کۆرمۆر. هەردوو وەزارەتی سامانە سرووشتییەکان و وەزارەتی کارەبا لە هەوڵدان بۆ ئەوەی هێرشە تیرۆریستییەکە کەمترین کاریگەریی لەسەر کاژێرەکانی پێدانی کارەبا هەبێت لەسەر هاوبەشانی کارەبا و بە زووترین کات بارودۆخی کارەبا ئاسایی بێتەوە".
