رووداو دیجیتاڵ
کەشناسیی هەرێمی کوردستان رایگەیاند، لە پێنجشەممە 05ی ئەم مانگەوە شەپۆلێکی بارانبارین تەواوی هەرێمی کوردستان دەگرێتەوە و بارانی بەلێزمە دەبارێ. کەشناسێک پێشبینی دەکات، جگە لە بەشێکی دەشتی هەولێر، کەرکووک و گەرمیان، لە ناوچەکانی دیکە پەڵە بدات.
کەشناسیی هەرێمی کوردستان ئەمڕۆ سێشەممە 03-11-2026 رایگەیاند: "لە بەیانیی رۆژی پێنجشەممە 05-11-2026ـەوە ناوچەکەمان دەکەوێتە ژێر کاریگەریی درێژبوونەوەی نزمەپاڵەپەستۆی دەریای نێوەڕاست و تاوەکو یەکشەممە 08-11-2026 کەشی ناوچەکەمان ناجێگیر دەبێت و شەپۆلێکی بارانبارین سەرجەمی ناوچە جیاجیاکان دەگرێتەوە".
بەگوێرەی راگەیێندراوەکەی کەشناسیی هەرێمی کوردستان، شەپۆلەکە بەمشێوەیە دەستپێدەکات: "رۆژی پێنجشەممە 05-11-2026 شێوازی دابارین بە نمەباران و بارانی پچڕپچڕ دەبێت، لە کاتی جیاجیادا پێشبینیی بارانبارین لەسەر هەندێک ناوچە هەیە لەبەر ئەوەی کاریگەریی ئەم نزمەپاڵەپەستۆیە لاوازە بۆ ئەم رۆژە؛ هەینی و شەممە و یەکشەممە کاریگەریی شەپۆلی بارانبارین زیاد دەکات و شێوازی دابارین دەگۆڕێت بۆ بارانی مامناوەند و هەورە برووسکە و لێزمەبارانی ناوبەناو و لەناکاو".
کەشناسیی هەرێمی کوردستان ئاماژەی بەوە کردووە، "بەگوێرەی پێشبینییەکان چالاکبوونی نزمەپاڵەپەستۆی دەریای نێوەڕاست لەگەڵ زیادبوونی بارانبارین دەکەوێتە رۆژی شەممە 07-11-2026 واتە زۆرترین ماوەی دابارین لەم رۆژە دەبێت؛ خێرایی با هەندێک کات زیاد دەکات و هەورە برووسکە دەبێت و پلەکانی گەرما نزم دەبنەوە؛ ئەگەری بەفربارین لەسەر لووتکەی شاخە سنوورییەکان هەیە".
بەگوێرەی کەشناسیی هەرێمی کوردستان، رۆژی یەکشەممە 08-11-2026 لە ئێوارەدا کاریگەریی ئەم شەپۆلە کۆتایی دێت.
د. لوقمان موفتی، شارەزای کەشناسی، ئەمڕۆ سێشەممە بە تۆڕی میدیایی رووداوی گوت: "ئێوارەی ئەمڕۆ تاوەباران ناوچەکانی نێوەڕاستی عێراق دەگرێتەوە، ئەگەر هەیە هەندێک تاوەباران بگاتە ناوچەکانی کەرکووک و گەرمیان".
ئەو کەشناسە پێشبینی دەکات، لە پێنجشەممە تاوەکو یەکشەممە باشووری کوردستان بکەوێتە ژێر کاریگەریی نزمەپەستانێکی کلاسیکیی دەریای نێوەڕاست و بارانبارین زۆربەی ناوچەکانی بگرێتەوە".
لوقمان موفتی هەروەها پێشبینی دەکات، "لە زۆربەی هەرێمی کوردستان پەڵە بدات، جگە لە بەشێکی ناوچەکانی دەشتی هەولێر، کەرکووک و گەرمیان".
موفتی دەڵێت، بەگوێرەی پێشبینییەکان رۆژانی شەممە و یەکشەممەی داهاتوو ئەگەری بەرزبوونەوەی ئاو و لافاو لە ناوچە نزمەکانی هەرێمی کوردستان هەیە.
