رووداو دیجیتاڵ
لە چوارچێوەی جێبەجێکردنی ستراتیژی چاکسازی لە پۆلیسی هەرێمی کوردستان، بەرپرسانی چوار بنکەی نموونەیی پۆلیس دەستنیشان کران؛ بۆ یەکەمجاریش ئەفسەرێکی ژن کرایە بەڕێوەبەری یەکێک لە بنکەکان.
رۆژی دووشەممە، 2ـی تشرینی دووەمی 2026، لە رێوڕەسمێکدا بەرپرسانی بنکە نموونەییەکانی پۆلیس لە چوار پارێزگاکەی هەرێمی کوردستان دەستنیشان کران، ئەمەش وەک دەستپێکی جێبەجێکردنی ستراتیژییەتی چاکسازی پۆلیس بۆ ساڵانی 2026 تاوەکو 2030.
بنکە نموونەییەکان لە کوێن؟
هەولێر: بنکەی نموونەیی پۆلیسی کەسنەزان
سلێمانی: بنکەی نموونەیی پۆلیسی سەیوان
دهۆک: بنکەی نموونەیی پۆلیسی نزارکێ
هەڵەبجە: بنکەی نموونەیی پۆلیسی ناوشاری هەڵەبجە
وەزارەتی ناوخۆ لە راگەیێندراوێکدا رایگەیاند بڕیارە لە قۆناخەکانی داهاتوودا ئەم پرۆژەیە ئیدارە سەربەخۆکانیش بگرێتەوە.
وەزارەتی ناوخۆ دەڵێ، وەک هەنگاوێکی نوێ لە رەچاوکردنی پێگەی ژنان لە سەرکردایەتیی پۆلیسدا، بۆ یەکەمجار ئەفسەرێکی ژن وەک بەڕێوەبەری بنکەی پۆلیسی کەسنەزان لە پارێزگای هەولێر دەستنیشانکرا.
ئامانج لە کردنەوەی ئەم بنکانە، وەک وەزارەتەکە ئاماژەی پێداوە، ئەوەیە ببنە ناوەندی تاقیکردنەوە و جێبەجێکردنی شێوازی نوێی کارکردنی پۆلیس و نوێکردنەوەی ئەرکەکانیان بۆ باشتر پێشکێشکردنی خزمەتگوزاری بە هاووڵاتییان، کە تێیاندا کۆمەڵێک لە دامەزراوەکانی سەر بە وەزارەتی ناوخۆ لە یەک بنکەدا کۆدەکرێنەوە.
پرۆژەی چاکسازیی پۆلیسی نیشتمانیی کوردستان لەسەر بنەمای درووشمی "رێز، هێز و متمانە» داڕێژراوە. بەپێی پلانەکەش دوای دەستنیشانکردنی بەڕێوەبەرەکان، لە هەنگاوی دواتردا ستافی بنکەکان دیاری دەکرێن بۆ ئەوەی لە سەرەتای ساڵی نوێدا بە شێوازێکی نوێ دەستبەکار بن.
.webp&w=3840&q=75)
