رووداو دیجیتاڵ
بەڕێوەبەرایەتیی کەشناسیی هەرێمی کوردستان پێشبینییەکانی بۆ کەشوهەوای ئەمشەو و پلەکانی گەرمای ناوچە جیاوازەکانی بڵاوکردەوە. شارەزایەکی کەشناسیش دەڵێت، لە رۆژانی داهاتوودا پلەی گەرما زیاتر دادەبەزن و کەشوهەوا بە ناجێگیری دەمێنێتەوە.
شەوی شەممە، 31ـی تشرینی یەکەمی 2026، بەڕێوەبەرایەتیی کەشناسیی هەرێمی کوردستان بڵاویکردەوە، ئەمشەو ئاسمانی زۆربەی ناوچەکانی هەرێمی کوردستان بە گشتی نیمچەهەور دەبێت و ئەگەری بارینی نمەبارانێکی کەم لە ناوچە شاخاوییەکانی هەردوو پارێزگای سلێمانی و هەڵەبجە هەیە.
سەبارەت بە رەوشی کەشوهەوا لە رۆژانی داهاتوودا، ئاسۆ کەمال، شارەزای کەشناسی بە تۆڕی میدیایی رووداوی راگەیاند: "لە رۆژانی داهاتوودا کەشوهەوا بە ناجێگیری دەمێنێتەوە، پلەی گەرما زیاتر دادەبەزێت و نمەبارانیش بەردەوام دەبێت."
ئەو شارەزایەی کەشناسی لەبارەی چۆنیەتیی دابەشبوونی بارانەکە باسی لەوە کرد: "ئەگەری بارانبارینەکە زیاتر لە ناوچە شاخاوییەکاندا دەبێت، بەڵام بەهۆی ئەوەی بارانی پاییزەیە، گشتگیر نییە، بۆیە لە سەرجەم ناوچەکان بە یەکسانی نابارێت و بەپێی ناوچەکان جیاوازی دەبێت."
پلەکانی گەرمای تۆمارکراوی ئێستا بە پلەی سیلیزی:
کەلار: 24
هەڵەبجە: 18
سۆران: 18
زاخۆ: 18
هەولێر: 17
دهۆک: 17
سلێمانی: 16
حاجی ئۆمەران: 11
