رووداو دیجیتاڵ
ئەمڕۆ لە شاری هەولێر پەردە لەسەر پەیکەری ژینوا لادرا، پەیکەرەکە بۆ رێزگرتنە لە گیانی شەهیدانی هێرشەکەی سەر ماڵی شەهید پێشڕەو ئاغا دزەیی لە ساڵی 2024 و تەواوی شەهیدانی کوردستان.
پەیکەرەکە بە سەرپەرشتیی ناوەندیی کوردستان بۆ هونەر و کولتوور و بنەماڵەی شەهید پێشڕەو ئاغا و لەسەر راسپاردەی باراڤ بارزانی و رۆژ پێشڕەو ئاغا دروست کراوە.
لە بناخەی پەیکەرەکەدا داروپەردووی خانووە وێرانبووەکەی شەهید پێشڕەو دزەیی بەکارهاتووە، بە ئامانجی "بەرزڕاگرتن و بە نەمری هێشتنەوەی شەهیدانی ئەو کارەساتە."
لە شەوی 15ـی کانوونی دووەمی 2024، سوپای پاسدارانی ئێران هێرشێکی مووشەکی کردە سەر ماڵی پێشڕەو دزەیی، سەرمایەداری شاری هەولێر. لە هێرشەکەدا خۆی و کچێکی، لەگەڵ میوان و کارگوزارێکی ماڵەکەی گیانیان لەدەستدا، هاوژین و دوو منداڵی دیکەیشی برینداربوون.
پەیکەرەکە لەنێو پڕۆژەی ئیمپایەر لە هەولێر دانراوە و سیداد بارزانی، نوێنەری سەرۆک بارزانی، باراڤ بارزانی، بنەماڵای پێشڕەو دزەیی و پارێزگاری هەولێر و ژمارەیەک بەرپرسی حکومی ئامادەبوون.
بیرۆکەی پەیکەرەکە لەلایەن هونەرمەند وەلید ستی دانراوە و لەلایەن پەیکەرتاش غازی عەبدال بەرواری دروستکراوە.
