رووداو دیجیتاڵ
سەرۆکایەتیی شارەوانیی هەولێر رایگەیاند، بە هاوکاریی رێکخراوێک نووسینی سەر دیواری قوتابخانەکان دەسڕنەوە و لە جیاتی ئەوە بە وێنە و درووشم دیوارەکە دەنەخشێنن.
هەولێر دابەشی سەر شەش شارەوانی کراوە، هەڵمەتەکە لەلایەن شارەوانیی شەشەوە جێبەجێ کراوە. ئەندازیار چاپووک عەبدولعەزیز سدیق، بەڕێوەبەری شارەوانیی شەش، ئەمڕۆ هەینی بە تۆڕی میدیایی رووداوی گوت: "شارەوانیی هەولێر هەر شەش شارەوانییەکەی راسپاردووە دیواری قوتابخانەکان خاوێن بکرێنەوە و بنەخشێندرێن".
چاپووک عەبدولعەزیز گوتی: "ئێمە وەکو یەکەم شارەوانی دەستمان بە هەڵمەتەکە کردووە و تەواوی شارەوانییەکان دەگرێتەوە، ئامانجمان خاوێنکردنەوەی دیوارەکانە لە درووشمە ناشایستە و ناشیرینەکان و نەخشاندنیانە بە درووشمی پەروەردەیی؛ ژینگەیی و ئاڵای کوردستان".
بەڕێوەبەری شارەوانیی شەش لە هەولێر ئاماژەی بەوە کرد، "تاوەکو یەک قوتابخانە مابێت هەڵمەتەکە بەردەوام دەبێت، هەفتەی داهاتوو لە شارەوانییەکی دیکە دەستپێدەکات".
ئەمڕۆ هەینی 18ی ئەیلوول، سەرۆکایەتیی شارەوانیی هەولێر لە راگەیێندراوێکدا رایگەیاند: "بەبۆنەی دەستپێکردنەوەی وەرزی نوێی خوێندن و لە پێناو بەرزکردنەوەی ئاستی هۆشیاریی ژینگەیی و پاراستنی سیمای شارستانیی شارەکەمان، بەڕێوەبەرایەتیی شارەوانیی شەش بە هاوکاریی رێکخراوی (مایپڵ تری)، هەڵمەتێکی فراوانی پەروەردەیی و ژینگەیی ئەنجام دا".
لەبارەی هەڵمەتەکەوە شارەوانیی هەولێر دەڵێت: "بە هاوکاریی رێکخراوەکە هەڵدەستین بە سڕینەوە و پاککردنەوەی سەرجەم ئەو نووسراو و دروشمە نەشیاوانەی لەسەر دەرگا و دیواری قوتابخانەکاندا هەن، کە سیمایەکی ناشیرینیان بە ناوەندەکانی خوێندن بەخشیوە".
شارەوانیی هەولێر ئاماژەی بە قوتابخانەیەک کردووە و دەڵێت: "لە قوتابخانەی ئامەدی بنەڕەتیی تێکەڵاو لە گەڕەکی نەورۆز، چەندین وێنە و دروشمی نەتەوەیی و ئاڵای پیرۆزی کوردستان نەخشێنران، کە ئەمەش کاریگەریی ئەرێنی دەبێت لەسەر دەروون و هۆشیاریی قوتابییان و جوانترکردنی رووکاری قوتابخانەکە".
