رووداو دیجیتاڵ
دوای زیاتر لە 20 رۆژ، ناونووسین بۆ حەجی ساڵی داهاتوو کۆتایی هات و زیاتر لە 76 هەزار فۆرمی داواکاریی لە هەرێمی کوردستان پڕکراونەتەوە.
نەبەز ئیسماعیل، گوتەبێژی وەزارەتی ئەوقاف و کاروباری ئاینیی هەرێمی کوردستان، سێشەممە 11ی ئابی 2026 بە تۆڕی میدیایی رووداوی گوت: "شەوی رابردوو کاژێر 12:00 ناو تۆمارکردن بۆ حەج کۆتایی هات و دەروازەی ئەلیکترۆنی داخرا".
ناونووسین بۆ حەج، ئەم ساڵ 21ی تەممووز دەستیپێکرد. لە ماوەی ناوتۆمارکردندا، 76 هەزار و 261 فۆڕمی داواکاری چوونە حەج تۆمار کراون.
کاروان ستوونی، گوتەبێژی بەڕێوەبەرایەتیی حەج و عومرەی هەرێمی کوردستان بە رووداوی گوت، "ئەوانەی تۆمار کراون وەکو فۆڕمە و لەنێویاندایە دوو بۆ سێ کەس هەن، بۆیە ژمارەی کەسەکان زۆر زیاترە لە ژمارەی ئەو داواکارییانەی پڕکراونەتەوە".
ئەم ساڵ بۆ ناو تۆمارکردن تەمەن نەکرا بە پێوەر، هەروەها ئەوانەی پێشتر حەجیان کردبوو مافی ئەوەیان نەبوو فۆڕم پڕبکەنەوە.
پار ناونووسین بۆ حەج، لە 11ی ئەیلوول دەستیپێکرد و 26ی هەمان مانگ کۆتایی هات. زیاتر لە 90 هەزار کەس داواکارییان لە رێگەی فۆرمی ئەلیکترۆنی پڕکردەوە، لەو ژمارەیە 5120 کەس بە تیروپشک ناویان دەرچوو.
ئەم ساڵ 7ی ئایار یەکەم گەشتی حاجیان لە هەرێمی کوردستانەوە بۆ رێوڕەسمەکانی حەج دەستیپێکرد و دوایین گەشت 17ی ئایار بوو.
.jpg&w=3840&q=75)
.jpeg&w=3840&q=75)
.jpeg&w=3840&q=75)