رووداو دیجیتاڵ
وەرزی گەشتیارییە و زۆرترین گەشتیار لەنێوەڕاست و خوارووی عێراقەوە دێنە شارەکانی هەرێمی کوردستان. بەرپرسانی میوانخانە و هۆتێلەکان لە سێ پارێزگا دۆخەکەیان بەدڵە، بەڵام لە دهۆک دەڵێن، هەبوونی باخ کە خانووی مانەوەی تێدایە، بازاڕی هێندە لاوازکردوون پێشنیازی داخستنی هۆتێلەکان دەکرێ.
بەرپرسی کۆمەڵەی هۆتێل و چێشتخانەکانی هەولێر دەڵێ، 60%ـی هۆتێلەکان گەشتیاریان تێدایە. هەمان کۆمەڵە لە سلێمانی دەڵێ، هۆتێلێکی 40 ژووری نزیکەی 30 ژووری گەشتیاری تێدایە. گەشتوگوزاری هەڵەبجە ئاماژە بەوە دەکەن، لە چەند رۆژێکی هەفتەدا 100% شوێنەکانی ماوەنەی گەشتیاریان پڕ دەبێت. جیاواز لەوان، کۆمەڵەکەی دهۆک داوای چارەسەرێک لە بەرپرسانی حکومەتی هەرێمی کوردستان دەکات.
میوانخانەکانی هەولێر: دۆخی گەشتیاری باش بووە
زیرەک بیا ئیلیا، سەرۆکی کۆمەڵەی میوانخانە و چێشتخانەکان لە هەولێر، ئەمڕۆ بە تۆڕی میدیایی رووداوی گوت: "هاتنی گەشتیار بەراورد بە چەند هەفتەیەک لەمەوبەر باشتر بووە، بەڵام هاوشێوەی ساڵانی پێشوو نییە و ئێستا زیاتر هەفتانە سێ رۆژ دێن؛ پێنجشەممە، هەینی و شەممە".
بەگوێرەی ئاماری چێشتخانە و میوانخانەکان، لە سنووری پارێزگای هەولێر نزیکەی 445 هۆتێل و مۆتێل، 47 گوندی گەشتیاری و سەتان کەپری گەشتیاری هەن.
سەرۆکی کۆمەڵەی میوانخانە و چێشتخانەکان لە هەولێر گوتی: "بەگشتی رۆژانە نزیکەی 60%ـی هۆتێلەکان گەشتیاریان تێدایە، دۆخی چێشتخانە و رێستۆرانتەکان باشترە لە مانگەکانی رابردوو".
زیرەک بیا ئیلیا گوتی: "کەمبوونەوەی گەشتیاران لە هەفتانەی حەوت رۆژەوە بۆ سێ بۆ چوار رۆژ هۆکارێکی سەرەکیی دۆخی ناوچەکە و جەنگە، کە کاریگەریی زۆری لەسەر عێراق و هەرێمی کوردستانیش هەبووە".
بە گوتەی سەرۆکی کۆمەڵەی میوانخانە و چێشتخانەکان لە هەولێر، بەشێکی گەشتیارانی سنووری هەولێر لە پارێزگای نەینەواوە دێن و هەمان رۆژ، یان دوای یەک بۆ دوو رۆژ دەگەڕێنەوە سنووری خۆیان.
بەرپرسانی سلێمانی و هەڵەبجە: دۆخەکەمان بەدڵە
لە سلێمانی نزیکەی 380 هۆتێلی گەشتیاری، 50 هۆتێلی میللی، 8 هۆتێلی پێنج ئەستێرە و سەتان کابینە و کەپری گەشتیاری هەن.
مەحموود تۆفیق، سەرۆکی لقی سلێمانی کۆمەڵەی چێشتخانە و میوانخانەکان، ئەمڕۆ دووشەممە بە تۆڕی میدیایی رووداوی گوت: "بەگشتی دۆخی چێشتخانە و هۆتێلەکان باشە، چونکە وەرزی گەشتیارییە و رۆژانە گرووپی گەشتیاری و گەشتیاری جیاواز سەردانی سلێمانی دەکەن و دەمێننەوە".
بە گوتەی سەرۆکی لقی سلێمانی کۆمەڵەی چێشتخانە و میوانخانەکان، کاسبکارانی ئەو کەرتەی گەشتیاری لە دۆخەکە رازین؛ ئاماژەی بەوەشکرد: "هۆتێلەکان گەشتیاری باشیان تێدایە، بەڵام پڕ نین، بۆ نموونە، هۆتێلێک 40 ژووری هەبێ 25 بۆ 30ـی ژووری گەشتیاری تێدا دەبێت".
چیا قاسم، بەڕێوەبەری گشتیی گەشتوگوزاری هەڵەبجە، ئەمڕۆ بە تۆڕی میدیایی رووداوی گوت: "رۆژ هەیە هێندە گەشتیار زۆرە هەموو شوێنەکان پڕ دەبن. پێنجشەممە، هەینی و شەممەی هەموو هەفتەیە هۆتێل، مۆتێل، ڤێلای گەشتیاری و هەموو شوێنەکانی مانەوەمان 100% پڕ دەبن لە گەشتیار".
بەڕێوەبەری گەشتوگوزاری هەڵەبجە دەڵێ، ئاماری وردی سەردانی گەشتیارانیان بەردەست نییە، چونکە بە گوێرەی رۆژەکان ژمارەی گەشتیاران دەگۆڕدرێ؛ ئاماژەی بەوەشکرد: "کاتێک مووچە دوادەکەوێ، گەشتیاری نێوخۆییمان تەواو کەم دەبێتەوە و ئەوەی دەمێنێتەوە گەشتیارانی نێوەڕاست و خوارووی عێراقن".
میوانخانەکانی دهۆک: دۆخ خراپە و پێشنیازی داخستنی هۆتێلەکانمان دەکەین
شێخ ئیحسان عیسا، سەرۆکی لقی دهۆکی کۆمەڵەی چێشتخانە و میوانخانەکان بە تۆڕی میدیایی رووداوی گوت: "دۆخی هۆتێلەکان زۆر خراپە. باخەکانی شوێنی مانەوە پڕن لە گەشتیار. ئەو هۆتێل و مۆتێلانەی یاساییانە کاردەکەن گەشتیاریان بۆ ناچێ، دەبێت حکومەت ئەو کێشەیە چارەسەر بکات".
شێخ ئیحسان دەڵێ، ئەو باخانەی لە سنووری پارێزگای دهۆک کراونەتە شوێنی مانەوەی گەشتیاران "باج نادەنە حکومەت، پارەی ئاو و کارەبا نادەن، پارەی دەستبەری کۆمەڵایەتی نادەن و کەسیش نازانێ ئەوانی لێی دەمێننەوە کێن، بەڵام بۆ هۆتێلەکان بوونەتە کێشەی گەورە".
لە دهۆک نزیکەی 900 شوێنی گەشتیاری هەن و 145ـیان هۆتێلن، ئەمە جگە لە بوونی نزیکەی 250 ناوچەی گەشتیاری.
بەگوتەی سەرۆکی لقی دهۆکی کۆمەڵی چێشتخانە و میوانخانەکان، "ئەوانەی دەچنە باخەکانی شوێنی مانەوە و هۆتێلیان ناوێ، لە سنووری شارەکانی خۆیانەوە لە نێوەڕاست و باشووری عێراق هەموو خۆراکێک دەهێنن و هیچ سوودێکی بۆ ئابووری هەرێمی کوردستانیش نییە".
ئیحسان شێخ عیسا ئاماژەی بەوەکرد، بەشێکی خاوەن هۆتێلەکان پێشنیازیان کردووە هۆتێلەکان یەکجاری دابخەن بۆ ئەوەی لە دانی پاری باج و پارەی کارەبا و ئاوی رزگاریان ببێ.
