رووداو دیجیتاڵ
نەخۆشخانەی فێرکاریی رانیە دەڵێت، بەهۆی رووداوێکی هاتووچۆوە لە دەڤەرەکە، سێ کەس گیانیان لەدەستداوە و دوو کەسی دیکەش بریندار بوون کە یەکێکیان تەندروستیی ناجێگیرە.
سەرلەبەیانیی ئەمڕۆ سێشەممە، تەها محەممەد، بەڕێوەبەری راگەیاندنی تەندروستیی راپەڕین بە رووداوی گوت، "بەهۆی رووداوێکی هاتووچۆ لەسەر رێگای دەربەند - رانیە لە گوندی قوڕەگۆ، سێ کەس گیانیان لەدەستداوە کە ژنێک و دوو منداڵن و دوو کەسی دیکەش بریندارن و یەکێک لە بریندارەکانیش تەندروستیی ناجێگیرە".
ئەبوبەکر ئیسماعیل، پەیامنێری رووداو لە راپەڕین چووە شوێنی رووداوەکە و رووماڵی کرد.
لەوێ، عەلی عەبدوڵڵا ئیسماعیل، گوتەبێژی هاتووچۆی ئیدارەی راپەڕین بە رووداوی گوت، ئۆتۆمبێلەکە لە جۆری کامری بووە و وەرگەڕاوە.
ئەو دەڵێت، ئۆتۆمبێلەکە پێنج کەسی یەک ماڵباتی تێدا بووە، سیانیان گیانیان لەدەستداوە و دووانیان بریندارن.
ئەوانەی گیانیان لەدەستداوە و دایک و دوو منداڵین. دو منداڵەکە کوڕ و کچێکی تەمەن بچووکن. بریندارەکانیش باپیر و کچێکی دیکەیانن.
بە گوتەی گوتەبێژی هاتووچۆی ئیدارەی راپەڕین و بەپێی لێکۆڵینەوەی سەرەتایی، هۆکاری رووداوەکە تیژڕۆییە.
.jpg&w=3840&q=75)