ئۆتۆمبێلێک لە راپەڕین وەرگەڕا؛ چوار ئەندامی یەک خێزان گیانیان لەدەستدا

رووداو دیجیتاڵ

بەهۆی رووداوێکی هاتووچۆوە لە دەڤەرین راپەڕین، چوار کەسی خێزانێک گیانیان لەدەستدا و دووانی دیکەش بریندارن.

سەرلەبەیانیی ئەمڕۆ سێشەممە، رووداوەکە لە لەسەر رێگای دەربەند لە گوندی قوڕەگۆ لە سنووری رانیە و قەڵادزێ بووە.

بەپێی زانیارییەکانی رووداو، لەنێو ئۆتۆمبێلەکەدا 6 کەس هەبوون، پیاوێک و دوو کوڕی، لەگەڵ بووکێک و دوو نەوەی.

پیاوەکە باپیرەیە (سمکۆ). کوڕێکی گەورەی (هێمن سمکۆ) خێزاندارە و هاوژینەکەی (ئامینە) و دوو منداڵیان (دیلا و میلا هێمن سمکۆ) لەگەڵ بووە. جیا لەوانیش، کوڕێکی دیکەیان (شاریان سمکۆ) لەنێو ئۆتۆمبێلەکەدا بووە.

ئەوانەی گیانیان لەدەستداوە تائێستا بریتین لە ئامینە (38 ساڵان)، دیلا (یەک ساڵ و نیو) و میلا (5 ساڵان) و شاریان (11 ساڵان).

ئۆتۆمبێلەکەیان جۆری تۆیۆتا کامری بووە. سمکۆ کە شۆفێرەکە بووە، لەگەڵ هێمنی کوڕی لەژێر چاودێریدان و بریندارن.

لە سەرەتادا، هاتووچۆی دەڤەرەکە گوتی، هۆکاری رووداوەکە تیژڕۆیی بووە.

رووداوەکە ببینە

بەپێی ئەو ڤیدیۆیەی دەست رووداو کەوتووە، ئەگەرچی وادیارە ئۆتۆمبێلەکە خێرا بێت، بەڵام ماتۆڕێکی سێ تایە دەچێتە رێگەیان و دەبێتە هۆی شڵەژانیان.