ئاگرەکەی هەولێر کۆنترۆڵکرا؛ زیانی ژینگەیی و مادی هەیە

رووداو دیجیتاڵ

لە گوندی مامزاوا لە سنووری هەولێر ئاگر لە پووش و پاوان کەوتەوە. بەرگریی شارستانی دەڵێ، ئاگرەکە تەشەنەی کردووە بۆ چەند کۆگایەکی کۆکردنەوەی کەرەستەی کۆن.

موقەدەم شاخەوان سەعید، گوتەبێژی بەرگریی شارستانیی هەولێر، ئەمڕۆ شەممە بە تۆڕی میدیایی رووداوی گوت: "ئاگرەکە سەرەتا پووش و پاوانی گوندەکەی گرتەوە و دواتر تەشەنەی کرد بۆ چەند شوێنێکی کۆکردنەوەی کەرەستەی کۆن".

گوتەبێژی بەرگریی شارستانی گوتی: "ئەو کەرەستانەی سووتاون بابەتی جۆراوجۆرن، لەوانە پێداویستییەکانی ماڵ وەک قەنەفە و هاوشێوەکانی، هەروەها ئاسن و جۆرەها بابەتی کۆنەی تێدا بووە کە زۆرینەیان بۆ ئەوە کۆکرابوونەوە بەکاربهێندرێنەوە".

موقەدەم شاخەوان گوتی: "ئاگرەکە کۆنترۆڵکرا؛ زیانی گیانی نەبووە، بەڵام زیانی مادی زۆر هەیە".

لێکۆڵینەوە بۆ هۆکاری ئاگرەکە و زانینی بڕی زیانەکان دەستیپێکردووە.