زانکۆی کوردستان - هەولێر بڕوانامە دەبەخشێتە نزیکەی 700 دەرچوو؛ 90٪ـیان هەلیکاریان بۆ دەستەبەر دەبێت

رووداو دیجیتاڵ

زانکۆی کوردستان - هەولێر ئاهەنگی دەرچوونی بۆ نزیکەی 700 قوتابی لە قۆناغەکانی بەکالۆریۆس و ماستەر بەڕێوەبرد؛ ئیدارەی زانکۆکە رایدەگەیێنێت کە ساڵانە گرەنتی دەکەن 90٪ـی دەرچووەکانیان هەلی کاریان دەستبکەوێت و ئامادەی بازاڕی کار بن.

رۆژی پێنجشەممە، زانکۆی کوردستان - هەولێر، ئاهەنگی دەرچوونی بۆ قوتابییەکانی بەڕێوەبرد و تێیدا نزیکەی 700 قوتابی بڕوانامەیان پێبەخشرا؛ لەو ژمارەیە 295 قوتابیان بڕوانامەی بەکالۆریۆس و 401ـیشیان بڕوانامەی ماستەریان وەرگرت.

سۆناتا سەلام، یەکێک لە دەرچووانی بەشی بەڕێوەبردنی کارە کە بڕوانامەی ماستەری بەدەستهێناوە، بە شانازییەوە باس لە کۆتاییهاتنی هیلاکییەکانی دەکات: «بەڕاستی زۆر زۆر هیلاک بووم، ئەمڕۆ بە یارمەتیی دایکم بڕوانامەکەم وەرگرت، دایکیشم لەگەڵمدا زۆر هیلاک بوو. پشت بە خودا بەتەمام دکتۆراش تەواو بکەم و ببمە دکتۆر سۆناتا».

لای خۆیەوە، مەی کەریم، دایکی سۆناتا، بە دڵخۆشییەوە ئاماژەی بەوە کرد کە لە کاژێر 5:00ـی بەیانییەوە لەگەڵ کچەکەیدا بەپێوەیە و تەنانەت نانیشی نەخواردووە تاوەکو بە ئاسوودەیی بیبینێت؛ ئەو هیواخوازە کچەکەی بگاتە بەرزترین پلە و وەک پرۆفیسۆرێک بیبینێت.

لە بەشێکی دیکەی ئاهەنگەکەدا، روخسار عومەر، دەرچووی ماستەر لە بەشی ژمێریاری و دارایی، هەستی خۆی دەردەبڕێت و دەڵێت: «وەکو دایکم گوتی هەستەکە پێناسە ناکرێت و زۆر خۆشە. ماندووبوونێکی زۆرمان چەشت، بەبێ دایکم و هاوژینەکەم بێگومان بۆم تەواو نەدەکرا». نادین سەید گوڵ، دایکی روخساریش گوتی: «ئەمڕۆ میوانم لە دەرەوەی وڵاتەوە هاتووە و کچە گەورەکەم گەڕاوەتەوە، بەڵام لەبەر خاتری روخسار بەجێمهێشتوون و هاتوومەتە ئێرە».

رەیان نەجار، دەرچووی پزیشکیی گشتییە لە زانکۆکە، باسی لە سیستەمی خوێندنی زانکۆی کوردستان کرد: «زانکۆی کوردستان یەکێکە لە زانکۆ هەرە باشەکان، بەتایبەتی سیستەمی خوێندنەکەی وات لێدەکات کە زۆر پابەند بیت و نەتوانیت پشتگوێی بخەیت». هاوکات مەحموود عەباس، دەرچووی بەشی بەڕێوەبردنی کار، پەیامێکی نیشتمانیی هەیە و دەڵێت: «ئەو جلەی لەبەرمانە، ئەو کڵاوەی لەسەرمانە و ئەو بڕوانامەیەی وەرمانگرتووە، تەنیا بۆ جوانی نییە، بەڵکو دەبێت بیرکردنەوەمان بۆ خزمەتکردنی وڵات بێت».

زانکۆی کوردستان - هەولێر لە ساڵی 2006 دامەزراوە و ئێستا لە 4 کۆلێژ و 67 بەش پێکدێت. لە ماوەی 20 ساڵی رابردوودا هەزار و 680 دەرچووی هەبووە و ئیدارەی زانکۆکە جەخت لەوە دەکاتەوە کە بۆ هەر ساڵێکی خوێندن، 90٪ـی دەرچووەکانیان کاریان دەستدەکەوێت یان گرەنتیی هەلی کاریان دەکرێت.

د. زانا ئیبراهیم، سەرۆکی زانکۆی کوردستان - هەولێر، لەبارەی ئامانجی زانکۆکەیانەوە رایگەیاند: «کوردستان ئەمڕۆ پێویستی بە دەستی کارێکە کە لێهاتوویی هەبێت، توانای خۆگونجاندن و فێربوونی بەردەوامی هەبێت. ئەمە بەتایبەتی گرنگە لەژێر رۆشنایی ئەو گۆڕانکارییانەی لە بواری تەکنەلۆژیا و زانیاریدا روودەدەن». سەرۆکی زانکۆکە گوتیشی: «بۆ ئێمە گرنگە دەرچووەکانمان نەک تەنیا توانای کارکردنیان هەبێت، بەڵکو بتوانن گۆڕانکاری لە شوێنی کارەکانیاندا بکەن، ببنە سەرکردە لە بوارەکەی خۆیان و کەسانێک بن داهێنان بکەن».

زانکۆی کوردستان - هەولێر بڕوانامە دەبەخشێتە نزیکەی 700 دەرچوو؛ 90٪ـیان هەلیکاریان بۆ دەستەبەر دەبێت

رۆمانی "کۆنسێرت بۆ کەڕان"ـی هنێر سەلێم لە هەولێر بڵاوکرایەوە

سوپای عێراق لەبەردەم قوتابخانەیەکی کچان لە کەرکووک بارەگا دروست دەکات

کێشەکانی بەغدا رێگرن لە دانانی پارێزگاری نوێی کەرکووک و شارەکە لە بۆشایی ئیداریدایە

بابەتی پەیوەندیدار

رۆمانی "کۆنسێرت بۆ کەڕان"ـی هنێر سەلێم لە هەولێر بڵاوکرایەوە

سوپای عێراق لەبەردەم قوتابخانەیەکی کچان لە کەرکووک بارەگا دروست دەکات

کێشەکانی بەغدا رێگرن لە دانانی پارێزگاری نوێی کەرکووک و شارەکە لە بۆشایی ئیداریدایە

ئەمەنەش ببینە

ئەمەنەش ببینە