رووداو دیجیتاڵ
گوتەبێژی پارتی دیموکراتی کوردستان راگەیێندراوێکی لەبارەی کاراکردنەوەی پەرلەمان بڵاوکردەوە و دەڵێت: "کاراکردنەوەی پەرلەمان دژی هیچ و کەس و لایەنێک نییە و دەرگە کراوەیە بۆ هەمووان".
ئەمڕۆ چوارشەممە، 04-11-2026 پەرلەمانی کوردستان کاراکرایەوە و دەستەی سەرۆکایەتیی هەڵبژێردرا.
مەحموود محەممەد، گوتەبێژی پارتی دیموکراتی کوردستان دەڵێت: "ئەمە هەنگاوێکى درەنگ بوو، بەڵام پێویست بوو لەپێناو پاراستنى قەوارەى دەستووریى هەرێمى کوردستان. بەداخەوە دوو ساڵە بەهۆى بڕیارى سیاسیى سەرکردایەتى یەکێتیى نیشتمانی و نەوەى نوێ ئەم دامەزراوە شەرعییەى هەرێم کە نوێنەرایەتى دەنگ و ئیرادەى خەڵک دەکات پەک خرابوو".
مەحموود محەممەد لە راگەیێندراوەکەیدا دەڵێت: "ئەمڕۆ زۆرینەى پەرلەمانتاران لە فراکسیۆنەکان، بە هەستکردنیان بەرامبەر بە ئەرکى نیشتمانیان و رێزگرتن لە دەنگى خەڵک و پابەندییان بە سوێندى یاسایی، پرۆسەى دیموکراسییان سەرخست و کۆتاییان بەو بۆشاییە یاساییە و خۆسەپاندنى کەمینەیەکى سیاسى هێنا".
لە راگەیێندراوەکەی گوتەبێژی پارتیدا هاتووە، پەرلەمان لە کاتێکدا کاراکرایەوە کە "هەڕەشەى زۆر لە هەندێ پەرلەمانتار و کەسوکارییان کراوە، کە ئەمە ئاماژەیەکى مەترسیدارە و هەڕەشەیە لە دیموکراسى و ئیرادەى خەڵک و دەربڕى عەقڵیەتێکە کە خزمەت بە دیموکراتیزەکردنى بوارەکانى ژیانى کۆمەڵگاى کوردستان ناکات".
مەحموود محەممەد دەڵێت: "هیوادارین هەموو لایەک رێز لە ویست و ئیرادەى خەڵک و پڕۆسەی دیموکراسیی بگرن. پەرلەمانى کوردستان شوێنى راستەقینەى دانوستاندنى سیاسى و یاساییە و فاکتەرى یەکڕیزى و یەکگرتنى ناوخۆى کوردستانە".
گوتەبێژی پارتی ئاماژە بەوە دەدات، "کارابوونەوەى پەرلەمان دژى هیچ کەس و لایەنێک نییە و دەرگا کراوەیە بۆ هەموو لایەک و ئومێدەوارین دوابەدواى کاراکردنەوەى پەرلەمانى کوردستان، فراکسیۆنى لایەنەکانى دیکەش بڕیارى ئەرێنى بدەن و بەشداربن لە پاراستنى شەرعیەت و قەوارەى هەرێمى کوردستان".
لە کۆتایی راگەیێندراوەکەیدا هاتووە، "ئومێدەوارین دوابەدواى کاراکردنەوەى پەرلەمانى کوردستان، فراکسیۆنى لایەنەکانى دیکەش بڕیارى ئەرێنى بدەن و بەشداربن لە پاراستنى شەرعیەت و قەوارەى هەرێمى کوردستان، هەروەها ئەم هەنگاوە ببێتە هاندەر بۆ هەڵگرتنى بەرپرسیاریەتى هاوبەش لە بەرەوپێشبردنى هەرێمى کوردستان لەم قۆناخە هەستیارەدا و لێکنزیک کردنەوەى هەموو بۆچوونەکان بۆ خزمەتى خەڵک و ئاییندەى کوردستان.
