فێستیڤاڵی هەناری هەڵەبجە چاوەڕێی میوانانی باشووری و ناوەڕاستی عێراقە

رووداو دیجیتاڵ 

هەڵەبجە لە رۆژی دووەمدا پێشوازی لە گەشتیاران و میوانانی فێستیڤاڵی هەنار دەکات، بەڕێوەبەری گەشتوگوزاری شارەکە دەڵێت، لە دووەم رۆژ و سێیەم رۆژی فێستیڤاڵدا چاوەڕوانی میوانانی شارەکانی باشووری ناوەڕاستی عێراق دەکەین. بەڕێوەبەری کشتوکاڵ دەڵێت:" ئەم ساڵ هەنارمان کەمە، بەڵام نموونەییە. "


رۆژی پێنجشەممە، 29ـی تشرینی یەکەمی 2026، لە دووەم رۆژی فێستیڤاڵی هەناردا پشووی فەرمی لە پارێزگای هەڵەبجە راگەیێندراوە، شارەکە دەیەوێت لە رۆژانی پشوودا پێشوازی لە سەتان هەزار گەشتیاری فێستیڤاڵە بکات. 

تۆڕی میدیایی رووداو لەگەڵ دەستپێکی دووەم رۆژی فێستیڤاڵی هەناردا، رووماڵێکی فراوانی فێستیڤاڵەکە دەکات ،محەممەد شێخ فاتیح پێشکێشکاری ئابووری لەگەڵ سازگار سەڵاح پەیامنێری رووداو، رووماڵی چوونی خەڵك بۆ فێستیڤاڵەکە و بازاڕی هەنار دەکەن 

چیا قاسم، بەڕێوەبەری گشتیی گەشتوگوزاری هەڵەبجە بە تۆڕی میدیایی رووداوی راگەیاند، فێستیڤاڵی ئەم ساڵ ئامادەکاری زیاتری بۆ کراوە، چونکە کاتێک فێستیڤاڵێک تەمەنی زیاتر دەبێت، چالاکییەکانی دەنگدانەوەی زیاتر دەبێت. " 

ئەم ساڵ 12 یەمین خولی فێستیڤاڵی هەناری هەڵەبجە لە چوار رۆژدا بەڕێوەدەچێت، چیا قاسم گوتی:" " ئەم کچە جوانەی ئێمە(فێستیڤاڵی هەنار) تەمەنی لە یەک ساڵەوە بووە بە 12 ساڵ ناوبانگی زیاتر دەڕوات، کۆمپانیا گەشتیارییەکان خواستی سەردانیکردنیان زیاتر دەبێت".

باسی لەوەشکرد، ناسنامەی فێستیڤاڵی ئەم ساڵ فێستیڤاڵێکی ژینگەدۆستە نابێت فلێسک بەکاربهێنرێت و دەبێت هەموو کەرەستە بەکارهاتووەکان دۆستی ژینگە بن. 

رونیشكردەوە، بڕیارە لە رۆژانی سێیەم و چوارەمی فێستیڤاڵەکەدا نزیکەی 20 کۆمپانیای گەشتیاری لە شارەکانی نێوەڕاست و خواروی عێراقەوە سەردانی فێستیڤاڵەکە بکەن، چونکە تیمی تایبەتیان بۆ راکێشانی گەشتیاران ناردووەتە بەغدا. 

بەگوێرەی وەزارەتی کشتوکاڵ، ساڵانە لە وەرزی پێگەیشتندا هەرێمی کوردستان نزیکەی 80 هەزار تۆن هەنار بەرهەمی دەبێت، زۆرینەی بەرهەمەکە لە سنووری پارێزگای هەڵەبجەیە کە دەگاتە نزیکەی 35 هەزار تۆن لەسەر رووبەری 10 هەزار 600 دۆنم زەوی. 

ستار مەحموود، بەڕێوەبەری گشتیی کشتوکاڵی هەڵەبجە بە رووداوی گوت،" ئەم ساڵ نزیکەی 20 هەزار تۆن هەنارمان دەبێت، لەگەڵ ئەوەی بڕەکەی کەمیکردووە، بەڵام کواڵیتییەکەی زۆر باشە و نموونەییە". 

بەڕێوەبەری کشتوکاڵی هەڵەبجە هۆکاری کەمی بەرهەمی ئەم ساڵی هەناری بۆ دابەزینی پلەکانی گەرما لە وەرزی بەهاردا گەڕاندەوە و گوتی،" بەهۆی ئەوەی هەنار لە سێ کاتدا گوڵ دەکات، لە کاتی یەکەمدا بەهۆی دابەزینی پلەی گەرما گوڵی نەکرد و تەنیا لە دوو کاتەکەی دیکەدا گوڵی کرد، ئەوەیش بڕەکەی کەمکردەوە، بەڵام کواڵیتیەکەی زۆر باشە". 

بە گوێرەی ئامارەکانی کشتوکاڵی هەڵەبجە ساڵانە 85 هەزار دۆنم زەوی بە گەنم دەچێندرێن کە بەرهەمیان دەگاتە 40 هەزار تۆن، جگەلەوەیش زیاتر لە 12 هەزار دۆنم باخی هەیە کە زۆرینەی هەنارە لەگەڵ نزیکەی 95 هەزار دار گوێز و چەند بەرهەمێکی دیکەی وەکو زەیتون. 

خاوەن پڕۆژەکان بەرهەمەکانیان لە فێستیڤاڵی هەنار دەفرۆشن