رووداو دیجیتاڵ
بەڕێوەبەری گشتیی مانگی سووری پارێزگای ورمێ دەڵێت، تیمەکانیان دوای هەوڵێکتی زۆر، تەرمی یەکێک لە بێسەروشوێنبووانی لافاوەکەی سەلماسیان دۆزیوەتەوە؛ ئاماژە بەوەش دەکات، ژمارەی قوربانیان گەیشتووەتە سێ کەس.
ئەمڕۆ هەینی، حەمید مەحبووبی، بەڕێوەبەری گشتیی مانگی سووری پارێزگای ورمێی رۆژهەڵاتی کوردستان سەبارەت بە لافاوەکەی سەڵماس رایگەیاند، دوای 14 کاژێر گەڕان، تیمەکانیان تەرمی کەسێکی دیکەیان دۆزیوەتەوە.
بەگوتەی حەمید مەحبووبی، تەرمی قوربانییەکە لە نزیک گوندی کانیانی سەر بە شارەکە و هەشت کیلۆمەتر دوورتر لەو شوێنەی کە دوایین جار لێی بینراوە، دۆزراوەتەوە.
بەڕێوەبەری گشتیی مانگی سووری پارێزگاکە ئەوەشی خستەڕوو، بە دۆزینەوەی تەرمەکە، ئێستا ژمارەی گیانلەدەستدراوان گەیشتووەتە سێ کەس.
هاوکات کەسێکی دیکە تاوەکو ئێستا بێسەروشوێنە. حەمید مەحبووبی دەڵێت: ''بە هەموو توانا و کەرەستەی بەردەست، گەڕان بەدوایدا بەردەوام دەبێت''.
شەوی پێنجشەممە، 22ی تشرینی 2026، شەپۆلێکی بارانی بەخوڕ و تەرزە ناوچەکانی باکووری پارێزگای ورمێی رۆژهەڵاتی کوردستانی گرتەوە و لە پێنج گوندی سەر بە شاری سەڵماس، رێگەی سەرەکیی نێوان سەڵماس و خۆی و گوندێکی سەر بە شاری ماکۆ لە باکووری پارێزگای ورمێ لافاو دروستبوو.
جیا لە گیانلەدەستدانی سێ کەس و بێسەروشوێنبوونی کەسێک، ئاو چووەتە نێو ژمارەیەکی زۆر لە ماڵەکان و زیانێکی زۆریش بە ئۆتۆمبێلەکان گەیشتووە.
