وردەکاریی گیانلەدەستدانی ئەو هاونیشتمانییەی هەواڵی برینداربوونی کچەکەی بیست

رووداو دیجیتاڵ

هاونیشتمانییەک بە جەڵتەی دڵ کۆچی دوایی کرد، بەڵام مردنەکەی لە تۆڕە کۆمەڵایەتییەکان دەنگی دایەوە و گوترا دوای بیستنی تووشبوونی کچێکی بە رووداوی هاتووچۆ مردووە، بەڵام برایەکی ئەمە رەت دەکاتەوە.

ئازاد ئەحمەد، تەمەنی 40 ساڵە و دانیشتووی شارۆچکەی چەمچەماڵە، ئەمڕۆ بە جەڵتەی دڵ کۆچی دوایی کرد. پێش ئەم رووداوە، کچێکی ئۆتۆمبێل لێی داوە و چووە بۆ نەخۆشخانە بۆلای، بەڵام دوای ئەوە گیانی لەدەستداوە.

محەممەدی برای ئازاد، لەوبارەوە قسەی بۆ رووداو کرد و گوتی: "براکەم نەخۆشییەکانی بەرزە پەستانی خوێن و پرۆستاتی هەبووە و پێشتریش نەشتەرگەری کردنەوەی قەفەزی سینگ (دڵ)ی بۆ کراوە، بۆیە مردنەکەی بە رووداوی کچەکەیەوە گرێ نادەین."

محەممەد گوتی: "براکەم سەردانی کچەکەی کردووە لە نەخۆشخانە و بە چاوی خۆی بینیویەتی کە سەلامەتە و تەندروستیی زۆر باشە، بەڵام دوای گەڕانەوە جەڵتەی دڵ لێی داوە و دوای گەیاندنی بە نەخۆشخانە گیانی لەدەستداوە."