رووداو دیجیتاڵ بە ئامادەبوونی نێچیرڤان بارزانی، سەرۆکی هەرێمی کوردستان، زانکۆی ئەمریکیی کوردستان لە دهۆک، ئاهەنگی دەرچوونی بۆ 123 خوێندکاری قۆناخی بەکالۆریۆس لە چوار کۆلێژی جیاواز ساز کرد، کە بەشێکیان بە زەماڵە خوێندوویانە. دوای چوار ساڵ خوێندن، دارین، دوایین وێنەکانی یادگاریی لەگەڵ هاوڕێکانیدا دەگرت. ئەو یەکەمی کۆلێژی ئەندازیارییە لە زانکۆی ئەمریکیی کوردستان لە سێمێل. لەگەڵ 122 خوێندکاری دیکەدا خوێندنیان تەواو کرد و بڕوانامەی بەکالۆریۆسیان بەدەستهێنا. دارین تەمیم، دەرچووی زانکۆی ئەمریکیی کوردستان-دهۆک، دەڵێت، "زۆر خۆشحاڵم کە ئەمڕۆ لەگەڵ هاوکارەکانمدا ئاهەنگی دەرچوون دەگێڕین." دەرچووان لە چوار کۆلێژی جیاوازن: ئەندازیاری، پەرستاری، بازرگانی، هەروەها هونەر و زانست. لەو ژمارەیە، 79 دەرچوویان بە سکۆلەرشیپ وەرگیراون و 50 لەوانە سکۆلەرشیپی تەواویان هەبووە و هیچ بڕە پارەیەکیان نەداوە. ئەحمەد حوسێن، دەرچوویەکی دیکەی زانکۆی ئەمریکیی کوردستان-دهۆکە و باس لەوە دەکات، "هەستێکی زۆر تایبەتە کە دوای چەندین ساڵ ماندووبوون، ئەمڕۆ بەری رەنجی خۆمان دەبینینەوە." دارڤان ئەیاد، دەرچووی زانکۆی ئەمریکیی کوردستان-دهۆک، دەڵێت، "ئەمە سەرەتای قۆناخێکی نوێیە لە ژیانماندا و هیوادارین بتوانین خزمەت بە وڵاتەکەمان بکەین." سیما ساڵح، دەرچووی زانکۆی ئەمریکیی کوردستان-دهۆک، دەڵێت، "خۆشحاڵم کە لەگەڵ خانەوادەکەمدا ئەم یادە جوانە پیرۆز دەکەم." لە رێوڕەسمەکەدا، سەرۆکی حکومەتی هەرێمی کوردستان پێشوازیی لە نێچیرڤان بارزانی، سەرۆکی هەرێمی کوردستان کرد، کە بۆ بەشداری لە ئاهەنگی دەرچوونەکەدا ئامادە بوو. لە کۆتایی ئاهەنگەکەدا، هونەرمەندی باکووری کوردستان، ئاینور دۆغان، بە گۆرانییەکانی، کەشێکی جیاوازی بەخشییە رۆژە تایبەتەکەی دەرچووان و خانەوادەکانیان.
کوردستان17-09-2026لیژنەی زیادەڕۆیی لە کەرکووک خانووی هاونیشتمانیانی رووخاند؛ دانیشتووان: "زەوی خۆمانە"
