خاوەن موەلیدەکانی تۆبزاوای کەرکووک هاتنە سەر شەقام و داوای گازوایل دەکەن

رووداو دیجیتاڵ

دژی نەبوونی کارەبای نیشتمانی و کارپێنەکردنی مۆلیدە ئەهلییەکان، ناڕەزایی هاووڵاتییان لە کەرکووک پەرەی سەندووە و هەر جارە و دانیشتووانی گەڕەکێک یان گوندێکی پارێزگاکە خۆپێشاندان دەکەن.

دانیشتووانی گوندی تۆپزاوا لە کەرکووک بەدەست نەبوونی کارەبای نیشتمانی و کارپێنەکردنی مۆلیدەکانەوە دەناڵێنن و چەند رۆژێکە ڕژاونەتە سەر شەقامەکان.

ئاراس مەحممەد، دانیشتووی گوندی تۆپزاوا لەبارەی دۆخی کارەباوە بە رووداوی راگەیاند: "کارەبای نیشتمانی پێنج خولەک هەیە و پێنج خولەک نییە، کارەبای مۆلیدەشمان هەر نییە. ئەم مانگە 11 هەزار دینار بۆ مۆلیدە هاتووه‌تەوە؛ ئەگەر مۆلیدە کار نەکات ئەوا پارەیە زۆرە. سێ شەوە خەڵک لەسەر شەقامەکان دەمێننەوە و بەیانیانیش دەچن بۆ کرێکاری."

هاوکات ئەحمەد عەباس، دانیشتوویەکی دیکەی گوندەکەیە و بە رووداوی گوت: "نە کارەبا هەیە نە ئاو، لەبەر بێ‌کارەبایی هیچ ئامێرێکمان کار ناکات و دوێنێ شەو لەبەر بێ‌کارەبایی و گەرما نەخەوتووم."

نرخی یەک ئامپێری کارەبای مۆلیدە لە کەرکووک 13 هەزار دینارە، بەڵام خاوەن مۆلیدەکانیش گلەیییان لە کەمیی بەشەگازوایل حکومی هەیە.

ئەدهەم ئەحمەد، خاوەن مۆلیدەیەک لەبارەی کێشەکانیانەوە بە رووداوی راگەیاند: "حەویجە 20 خولەک لێرەوە دوورە و یەک ئامپێر بە 18 هەزار دینارە. من یەک بەرمیل گازوایلم بە 300 هەزار دینار کڕیوە، 13 هەزار دینار بۆ ئامپێرێک هیچ نییە. رۆژانە لانی کەم 16 کاتژمێر کارەبا دەدەم و حکومەت نیوەی ئەوەشی پێ ناکرێت."

نەبوونی گازوایل بووەتە کێشەی سەرەکیی مۆلیدە ئەهلییەکان و بەرپرسانی ناوچەکەش ئاماژە بە بەربڵاویی کێشەکە دەکەن.

ئاڤێستا مەحممەد، قایمەقامی قەزای ناوەندیی کەرکووک لەبارەی گرفتەکەوە بە رووداوی گوت: "ئەو گازوایلەی بە مۆلیدەکان دەدرێت بەشی مانگەکەیان ناکات و دەبێت خۆیان لە بازاڕی رەش بیکڕن. زۆرێک لە خاوەن مۆلیدەکان ئەو کێشەیەیان هەیە و داوایان کردووە چارەسەرێکی ریشەیییان بۆ بدۆزرێتەوە."

نرخی یەک بەرمیل گازوایل لە بازاڕی رەشدا گەیشتووەتە 300 هەزار دینار و بە زەحمەتیش دەستدەکەوێت؛ بەپێی وتەی خاوەن مۆلیدەکان، ئەو بەشەگازوایل مانگانە حکومەت بە نرخی پاڵپشتیکراو پێیان دەدات، تەنیا بەشی یەک هەفتەی کارکردنیان دەکات.