رووداو دیجیتاڵ
تۆڕی میدیایی رووداو لە دووەم رۆژی شازدەیەمین پێشانگەی نێودەوڵەتیی بیناسازی، ئاوەدانکردنەوە، کارەبا و شارەوانیدا لە هەولێر، پرۆژەیەکی ئاوەڕۆی شاری هەولێر و گەشەسەندنی بەکارهێنانی وزەی خۆری بۆ بەرهەمهێنانی کارەبا لە هەرێمی کوردستان تاوتوێکرد.
لە بەرنامەیەکی تایبەتدا کە لە پێشانگەکە لەلایەن بەختیار عەبدولعەزیزەوە پێشکێشکرا، ئیسماعیل ئیبراهیم، ئەندازیاری ئاو و ئاوەڕۆ باسی لە پرۆژەیەکی ئاوەڕۆی هەولێر کرد، کە بەگوتەی خۆی بریتییە لە وێستگەیەکی چارەسەری ئاوەڕۆ کە بە دوو قۆناخ جێبەجێدەکرێت.
لە قۆناخی یەکەمدا بە توانای پاڵاوتنی 52 هەزار و 500 مەتر سێجا لە رۆژێکدا، لە تشرینی دووەمی 2023 دەستیپێکردووە و بە قەرزی ژاپۆنی لەرێگەی ئاژانسی جایکا دەکرێت کە لە 2014ـەوە دراوەتە هەرێمی کوردستان. سێ ساڵ بۆ تەواوکردنی پرۆژەکە دانراوە.
لە قۆناخی دووەمدا، بە توانای 210 هەزار مەتر سێجا لە رۆژێکدا چوار هێندەی قۆناخی یەکەم، لە 1ـی نیسانی 2024ـەوە دەستیپێکردووە، بە بودجەی حکومەتی هەرێمی کوردستان و بە گوژمەیەکی 579 ملیۆن دۆلار، دوو ساڵی بۆ دانراوە.
بەپێی ماستەرپلانی شاری هەولێر، ئەگەر تەواوی ناوچەی نێو بازنەی 120 مەتری خزمەتبکرێت، پێویستی بە توانایەکی 840 هەزار مەتر سێجا لە رۆژێکدا هەیە – واتە پرۆژەی ئێستا تەنیا بەشێکی سنووردار لەو پێویستییە دابیندەکات.
ئێستا لە هەرێمی کوردستان زیاتر لە دوو هەزار و 500 کیلۆمەتر تۆڕی ئاوی باران هەیە، بەڵام تۆڕێکی سەربەخۆی ئاوەڕۆی قورس نییە، کە هۆکاری سەرەکیی بۆنی ئاوەڕۆکانە.
گەڕەکە نزیکەکانی وێستگەکە – وەک نەورۆز، نیشتمان و کوردستان – یەکەمین گەڕەکن کە خزمەتدەکرێن، پاش تەواوبوونی وێستگەکە، تۆڕەکە قۆناخ بە قۆناخ فراواندەکرێت.
وزەی خۆر: خواستی زیاد، پێویستی بە سیستەمی یاسایی
رەوەز عەزیز، ئەندازیاری کارەبا ئاماژەی بەوەکرد کە هۆکاری زۆربەی ئاگرکەوتنەوەکانی کارەبا، دووربوونەوە لە ستانداردی ئەندازیاری لە دیزاین و دانانی سیستەمەکان، نەوەک تەنیا کوالیتیی مادەکان.
ئەو ئەندازیارە هەروەها رایگەیاند کە هێشتا سیستەمێکی یاسایی گونجاو نییە بۆ ئەوەی خاوەن باڵەخانەکان کارەبای زیادەی وزەی خۆر بگەڕێننەوە نێو تۆڕی نیشتمانی، هەرچەندە لە شارەکانی هەولێر، سلێمانی، دهۆک، هەڵەبجە و کەرکووک بڕێکی باش لە دانانی سیستەمی وەرگرتنی وزەی خۆر بەدیدەکرێت.
بەرهەمی نێوخۆیی و کوالیتی کۆنترۆڵ
سۆران یوونس، خاوەنی کۆمپانیای تاسەر (دامەزراوی ساڵی 1992)، بانگەشەی گرنگی کوالیتی کۆنترۆڵی تووندتری کاڵای هاوردەکراوی کرد و گوتی، لەسەر پێویستیی متمانەی نوێی بەکارهێنەران بۆ بەرهەمی نێوخۆیی، وەک مەرجێکی پێش پاڵپشتیکردنی کارگەکانی ناوخۆ.
هەردەوێڵ عەبدوڵڵا، ئەندازیاری تەلارسازی رایگەیاند، زیاتر لە 90%ـی پرۆژە تەلارسازییەکانی هەولێر بەدەستی ئەندازیاری کوردی جێبەجێدەکرێن، بەڵام کێشەی سەرەکی لە ئاستی کاری وەستاکاندایە، نەک ئەندازیاری؛ هەروەها باسی لەوەکرد کە تەلارسازیی هەولێر پێویستی بە شوناسێکی تایبەتە – وەک بەکارهێنانی خشتی هاوشێوەی قەڵای هەولێر.
