رووداو دیجیتاڵ
بەڕێوەبەری سایلۆی کەرکووک دەڵێ، بڕی زیاتر لە 49 ملیار دینار وەک بەشێکی دیکە لە شایستە داراییەکانی ساڵی رابردووی جووتیارانی کەرکووک لەم هەفتەیەدا دابەش دەکرێ.
حەسەن حەمدی، بەڕێوەبەری سایلۆی کەرکووک، رۆژی دووشەممە، 24ـی ئابی 2026، بە رووداوی راگەیاند: "بڕی 49 ملیار و 28 ملیۆن دینار بۆ شایستەی گەنمی جووتیارانی کەرکووک تەرخانکراوە و بڕیارە رۆژانی چوارشەممە و پێنجشەممە (26 و 27ـی ئاب) دەست بە خەرجکردنی بکرێ."
حەسەن حەمدی روونیکردەوە کە ئەم بڕە پارەیە بەشێکە لە قەرزی ساڵی رابردووی جووتیاران.
پێشتر 125 ملیار دینار لای حکومەت مابوو، بەم خەرجکردنە، بڕی 76 ملیار دینار لە شایستە داراییەکانی ساڵی پار دەمێنێتەوە.
بەڕێوەبەری سایلۆی کەرکووک ئاماژەی بەوەش کرد، ئەم ساڵ بڕی 490 هەزار تۆن گەنم لە جووتیارانی ناوەوە و دەرەوەی پلان وەرگیراوە.
نرخی ئەم ساڵیش بەمشێوەیە بوون: هەر تۆنێک گەنمی ناو پلان بە 700 هەزار دینار و دەرەوەی پلان بە 500 هەزار دینار وەرگیرا.
حکومەتی عێراق ساڵانە لە وەرزی دروێنەدا گەنمی جووتیاران بە نرخێکی پاڵپشتیکراو وەردەگرێ، بەڵام بەهۆی کێشەی کەمیی نەختینە (سیولە) لە وەزارەتی دارایی، زۆرجار پێدانی پارەی جووتیاران بۆ چەند مانگێک یان ساڵێک دوادەکەوێ.
ساڵی رابردوو تێچووی هەر تۆنێک گەنم 850 هەزار دینار بوو، دواکەوتنی ئەم پارەیە بارگرانییەکی زۆری بۆ جووتیاران دروست کردووە کە پێویستیان بە پارەی بەردەستە بۆ کڕینی تۆو و ئامادەکاری بۆ وەرزی نوێی چاندن.
