.jpg&w=3840&q=75)
رووداو دیجیتاڵ
سەرۆکی هەرێمی کوردستان بە فەرمی بانگهێشتکراوە بۆ تاران و بڕیارە زنجیرەیەک کۆبوونەوە لەگەڵ بەرپرسانی باڵای ئەو وڵاتە بکات.
رۆژی چوارشەممە، 1ـی تەممووزی 2026، عەبدوڵڵا ئاکرەیی، بەرپرسی نووسینگەی پارتی دیموکراتی کوردستان لە تاران، بە تۆڕی میدیایی رووداوی راگەیاند: "نێچیرڤان بارزانی، سەرۆکی هەرێمی کوردستان بە فەرمی لەلایەن مەسعود پزیشکیان، سەرۆککۆماری ئێرانەوە بانگهێشتکراوە".
بەرپرسی نووسینگەی پارتی لە تاران رایگەیاند: "سەرۆکی هەرێمی کوردستان لەگەڵ بەرپرسانی باڵای ئەو وڵاتە کۆدەبێتەوە، لەوانە سەرۆککۆماری ئێران، سەرۆکی پەرلەمان، وەزیری دەرەوە و سەرۆکی ئەنجوومەنی باڵای ئاسایشی نیشتمانی."
دوایین سەردانی نێچیرڤان بارزانی، سەرۆکی هەرێمی کوردستان بۆ ئێران، 17ـی ئایاری 2025 بوو کە بۆ بەشداریکردن لە "کۆڕبەندی دیالۆگی تاران" گەیشتە تارانی پایتەختی ئێران. رۆژی دواتر لە پانێلێکی تایبەتدا لە کۆڕبەندەکە قسەی کرد و باسی لە چەندین بابەتی پەیوەست بە ناوچەکە کرد؛ لە نێویاندا پەیوەندیی "مێژوویی" نێوان هەرێمی کوردستان و کۆماری ئیسلامیی ئێران.
هەروەها سێشەممە، 30-07-2024 لە کاتی رێوڕەسمی سوێندخواردنی مەسعود پزیشکیان سەرۆککۆماری ئێستای ئێران لە تاران بەشدار بوو، هەروەها لە سەرەتای ئابی 2021 لە رێوڕەسمی سوێندخواردنی ئیبراهیم رەئیسی، سەرۆککۆماری پێشووی ئێران لە تاران ئامادە بوو.