.jpg&w=3840&q=75)
رووداو دیجیتاڵ
دەستەی دەستپاکیی عێراق رایگەیاند، هەوڵێکی گەورەیان بۆ بردنی نزیکەی تریلیۆنێک و نیو دینار لە هەردوو بانکی حکومیی لە بەغدا پووچەڵ کردووەتەوە، دوو کەسیش بەهۆی ئەو دۆسیەوە دەستگیرکراون.
بەگوێرەی راگەیێندراوێکی دەستەی دەستپاکیی عێراق، کە ئەمڕۆ پێنجشەممە 28-05-2026 بڵاویکردەوە، "تیمە مەیدانییەکانی بەڕێوەبەرایەتیی لێکۆڵینەوەی بەغدا، بە هاوئاهەنگیی راستەوخۆ لەگەڵ لایەنە دادوەرییەکان، لەنێو بانکی رافیدەین سێ تۆمەتباریان دەستگیر کردووە کە چەندین چەک و بەڵگەنامەی ساختەیان پێبووە بۆ راکێشانی پارە."
لە راگەیێندراوی دەستەکەدا هاتووە، دەست بەسەر 7 چەکی ساختەدا گیراوە، کە بەناوی هەردوو بانکی رافیدەین و رەشیدەوە ئامادەکرابوون و کۆی بڕی پارەکە دەگاتە نزیکەی (یەک تریلیۆن و 500 ملیار) دینار، تۆمەتبارەکان ویستوویانە بۆ بەرژەوەندیی خۆیان پارەکە رابکێشن. جگە لەو چەکانە، هێزەکان دەستیان بەسەر گرێبەستێکی فرۆشتنی سپاردەیەکدا گرتووە، کە بەناوی یەکێک لە تۆمەتبارەکانەوە بووە و بڕەکەی 612 ملیار دینار بووە.
دەستەی دەستپاکی رایگەیاندووە تۆمەتبارەکان دانیان بەوەدا ناوە کە ویستوویانە بە نایاسایی ئەو پارەیە رابکێشن، بەڵام دوای وردبینی لەگەڵ کارگێڕیی بانکی رافیدەین، دەرکەوتووە کە ئەو چەکانە ساختەن و هیچ بڕە پارەیەکی لەو شێوەیە لە هەژماری تۆمەتبارەکاندا نییە.
پەڕاوی لێکۆڵینەوە بۆ تۆمەتبارەکان رێکخراوە و بە بڕیاری دادوەری دادگای لێکۆڵینەوەی کەرخی دووەم، بەگوێرەی ماددەکانی 289 و 298 لە یاسای سزادانی عێراقی راگیراون تاوەکو رێکارە یاساییەکانیان بەرامبەر تەواو بکرێت.