رووداو دیجیتاڵ
سەرۆکی فراکسیۆنی سۆیانای کریستیان لە پەرلەمانی عێراق داوا لە سەرۆکوەزیران دەکات رۆژی 1ـی نیسان (جەژنی ئەکیتۆ) وەک پشوویەکی فەرمی بۆ هەموو عێراقییەکان بناسێنرێت، ئەوەش وەک رێزگرتنێک بۆ مێژوو و شارستانییەتی کۆنی وڵاتەکە.
کلدۆ رەمزی، سەرۆکی فراکسیۆنی سۆیانای کریستیان، رۆژی دووشەممە، 30ـی ئاداری 2026، بە تۆڕی میدیایی رووداوی راگەیاند: "نووسراوێکی فەرمیمان لە رۆژی 28ـی ئادار ئاراستەی محەممەد شیاع سودانی، سەرۆکوەزیرانی عێراقی کردووە، داوامان کردووە جەژنی ئەکیتۆ بکرێتە پشووی نیشتمانی بۆ هەموو پێکهاتەکان، نەوەک تەنیا بۆ کلد و ئاشوور و سریانەکان، بەڵام تاوەکو ئێستا وەڵاممان نەدراوەتەوە"
کلدۆ رەمزی دەڵێت: "جەژنی ئەکیتۆ یەکێکە لە کۆنترین جەژنەکانی مێژووی مرۆڤایەتی و رەگەکەی بۆ شارستانییەتەکانی بابل و ئاشوور لە وڵاتی نێوان دوو رووبار دەگەڕێتەوە؛ ئەو رۆژە بە هێمای دەستپێکی ساڵی نوێ و نوێبوونەوەی ژیان و پیت و بەرەکەت دادەنرێت."
سەرۆکی فراکسیۆنی سۆیانای کریستیان گوتیشی، ناساندنی ئەم رۆژە وەک پشووی فەرمی، دەبێتە هۆی بەهێزکردنی شانازیکردن بە مێژووی شارستانیی عێراق و چەسپاندنی بەهاکانی فرەیی و پێکەوەژیان، چونکە ئەمە جەژنێکی نیشتمانییە و رەنگدانەوەی ناسنامەی مێژوویی عێراقە.
ئێستا ساڵی 6776ـی بابلی ئاشوورییە، کریستیانەکان ساڵانە لە 1ـی نیسان کە دەکاتە سەری ساڵی نوێی بابلی ئاشووری ئاهەنگ دەگێڕن و خۆشی دەردەبڕن.
بەگوێرەی رۆژژمێری پشووەکانی حکومەتی هەرێمی کوردستان، ئەو رۆژە لە هەرێمی کوردستان پشووی فەرمییە.
