رووداو دیجیتاڵ
گوتەبێژی وەزارەتی پلاندانانی عێراق رایگەیاند، چوار بنکەی پشکنینی زێڕ لە فڕۆکەخانەکانی عێراق کراونەتەوە، هەر کاتێکیش دەستەی گومرگ داوای کردنەوەی بنکەی دیکە لە هەولێر و سلێمانی بکات، "ئامادەین بۆ دابینکردنی ئامێر."
ئەمڕۆ سێشەممە،17-12-2024، عەبدولزەهرە هینداوی، گوتەبێژی وەزارەتی پلاندانی عێراق بە تۆڕی میدیایی رووداوی راگەیاند: "ماوەی دوو مانگە دوو بنکەی پشکنینی زێڕ لە فڕۆکەخانەکانی بەغدا و نەجەف کراونەتەوە و رۆژانە بە باشترین ئامێرە پێشکەوتووەکانی جیهان پشکنین دەکەن، لە هەموو جیهان تەنیا سێ وڵات ئەم ئامێرانە بەکار دەهێنن".
ئەم ئامێرانەی داندراون رێگری دەکەن لە هاوردەکردنی زێڕی ساختە و کارەکانیش زوو تەواو دەکات و مۆری لێ دەدات.
هینداوی لەبارەی فڕۆکەخانەکانی کەرکووک و بەسرەش گوتی، "ئامێرەکان بۆ ئەم دوو فرۆکەخانەیە دانراون و ئێستا کارمەندان لە دەرەوەی وڵات راهێنانیان پێدەکرێت و بەمزووانە لەم دوو فڕۆکەخانەیەش دەکەونە کار".
گوتەبێژی وەزارەتی پلاندانانی عێراق لەبارەی دانانی سیستمەکە لە فڕۆکەخانەکانی هەولێر و سلێمانی، ئاماژەی بەوەدا، "تاوەکو ئێستا دەستەی گومرگەکانی عێراق داوای لێ نەکردووین، هەر کاتێک ئەوان داوای بکەن، لە ماوەیەکی کەمدا بۆیان دابین دەکەین."
.jpeg&w=3840&q=75)
