رووداو دیجیتاڵ
ئەندامێکی لیژنەی ئاسایش و بەرگریی پەرلەمانی عێراق دەڵێ، دۆسیەی جورف سەخر (جورف نەسر) جێگەی مشتومڕێکی تووندە و کراوەتە "ناوچەیەکی داخراوی دابڕاو." ئاماژە بەوەش دەکات، باس لەوە دەکرێ 40 هەزار چەکدار لەو ناوچەیەدا بن و چەکدارانی حیزبوڵڵاش ئەندامانی لیژنەیەکی حکومەتیان پشکنیوە.
مازن غەریب، ئەندامی لیژنەی ئاسایش و بەرگریی پەرلەمانی عێراق، لە بەرنامەی (رووداوی ئەمڕۆ)دا باسی لە دۆخی ناوچەی جورف سەخر کرد و رایگەیاند، ناوچەکە کراوەتە ناوچەیەکی داخراوی دابڕاو و گوتی، "تاوەکو ئێستا هیچ کەسێک نەیتوانیوە بچێتە جورف سەخر؛" ئاماژەی بەوەش کرد کە دۆسیەی جورف سەخر بە رێککەوتن چارەسەر دەکرێ نەوەک بە پێکدادانی چەکداری، چونکە دۆسیەکە تەواو پەیوەندیدارە بەنێوماڵی هێزە شیعەکان و هێزە شیعەکانیش نایانەوێ ناکۆکییەکانیان بگاتە ئاستی پێکدادانی چەکداری.
ئەندامەکەی لیژنەی ئاسایش و بەرگریی پەرلەمانی عێراق چەند زانیارییەکی لەبارەی جورف سەخر ئاشکرا کرد و گوتی، "بڕیاربوو لیژنەکەی حکومەت لە رۆژی 10ی ئەم مانگەدا سەردانی ناوچەکە بکات، بەڵام سەردانەکە بۆ 72 کاژێر دواخرا و ئێستاش هەندێک زانیاریی باس لەوە دەکەن کە لەماوەی ئەو 72 کاژێرەدا چەکدارانی حیزبوڵڵا خۆیان لە ناوچەی جورف سەخر رێکخستووەتەوە و بەشێک لە بەڵگەکانیان گواستووەتەوە تاوەکو دەستی لیژنەکە نەکەون."
هەر لە بەرنامەی (رووداوی ئەمڕۆ)دا مازن غەریب باسی لە وردەکاریی سەردانی لیژنەکەی حکومەتی عێراق بۆ ناوچەی جورف سەخر کرد و گوتی، "لیژنەکەی حکومەت بە 3 بازگەی حیزبوڵڵادا تێپەڕیون، لە بازگەی سێیەم هەموو ئەندامانی لیژنەکە بە وردی لەلایەن چەکدارەکانەوە پشکنراون و رێگەیان نەداون جگە لە ئەندامانی لیژنەکە هیچ شۆفێر یان وێنەگرێکی تیمەکە بچێتە ناوچەکە."
"لە کۆبوونەوەی لیژنەی ئاسایش و بەرگریی لەبارەی جورف سەخر، بەها ئەعرەجی، سەرۆکی هاوپەیمانێتی ئاوەدانکردنەوە و گەشەپێدان ئامادەبووە و لەوێ بە لیژنەکەی راگەیاندووە کە "بەپێی زانیارییەکان، زیاتر لە 40 هەزار چەکداری حیزبوڵڵا لە ناوچەی جورف سەخر هەن،" مازن غەریب وای گوت.
گوتیشی، "بەپێی ئەو بەڵگانەی دەست لیژنەی لێکۆڵینەوە کەوتوون کە لەلایەن حکومەتەوە راسپێردرابوون بۆ سەردانی جورف سەخر، لەوێ دوو پاڵاوگەی نەوت هەن. یەکێکیان گەورەیە و توانای پاڵاوتنی 4 هەزار بەرمیل نەوتی لە رۆژێکدا هەیە."
ئەمڕۆ سێشەممە ( 17ی تشرینی دووەمی 2026)، حەیدەر عەبوودی، گوتەبێژی حکومەتی عێراق، سەبارەت بە دۆسیەی بەقاچاخبردنی نەوت لە ناوچەی جروف سەخر رایگەیاند، "تێڕوانینی حکومەتی عێراق لەسەر بنەمای ئەو راستییانە بونیادنراوە کە لیژنەی لێکۆڵینەوە دەستنیشانی کردوون؛ هەروەها کامێراکانی وەزارەتی ناوخۆ راسپاردەکانی لیژنەی لێکۆڵینەوەیان پشتڕاستکردووەتەوە کە پشت بە راپۆرتی ئاژانسی هەواڵگری و لێکۆڵینەوە فیدراڵییەکان دەبەستێت و دەرکەوتووە بەقاچاخبردن و دزینی ئەم سەرچاوە سەرەکییە هەیە."
لە بەرامبەریشدا ئەبو تاڵب سەعیدی یەکێک لە سەرکردەکانی کەتیبەکانی حیزبوڵڵا لە لێدوانێکدا ئاماژەی بەوە کرد عێراق لەبەردەم قەیرانێکی گەورەدایە و هەندێک لایەن دەیانەوێ خوێنی هێزە ئەمنییەکان و حەشدی شەعبی بڕێژرێ.
سەرکردەکەی حیزبوڵڵا رەخنەی لە سەرۆکوەزیرانی عێراق گرت و بە "سەرکێشیکردن" تۆمەتباری کرد و گوتی، "بەداخەوە بە بڕیاری سیاسی و سەرکێشیی سەرۆکوەزیرانی ئێستا، دەیانەوێ پێکدادان لەنێوان رۆڵەکانی حەشدی شەعبی و کەتیبەکانی حیزبوڵڵا لەگەڵ هێزە ئەمنییەکان دروست بکەن، بەڵام بە ژیریی عاقڵمەندان ئەو خەونەیان نایەتە دی."



