رووداو دیجیتاڵ
نووسینگەی عەلی زەیدی دەڵێت: سەرۆکوەزیرانی عێراق و سەرۆکی ئەمریکا بە تەلەفۆن قسەیان کردووە و زەیدی جەختی لەوە کردووەتەوە "نابێت خاکی عێراق بۆ هێرشکردنە سەر وڵاتانی دراوسێ بەکاربێت".
دەقی راگەیێندراوەکەی نووسینگەی زەیدی:
سەرۆک وەزیران بەڕێز عەلی فالح ئەلزەیدی، ئەمڕۆ پێنجشەممە، پەیوەندییەکی تەلەفۆنی لەگەڵ سەرۆکی ویلایەتە یەکگرتووەکانی ئەمریکا بەڕێز دۆناڵد ترەمپ ئەنجامدا، لە میانی پەیوەندییەکەدا تاوتوێی دوایین پێشهاتەکانی ناوچەکە، گۆڕانکارییە ئەمنییەکان، و ئاسۆی قۆناغی داهاتوو کرا.
لە پەیوەندییەکەدا باس لە گرنگیی هەماهەنگی و راوێژکاریی نێوان هەردوو وڵات کرا بەرامبەر بە ئاڵنگارییە هەنووکەییەکان، و کارکردن لەسەر پاڵپشتیکردنی سەقامگیریی هەرێمایەتی، و زاڵکردنی زمانی دیالۆگ و دیپلۆماسی لە چارەسەرکردنی قەیرانەکاندا، بە جۆرێک کە یارمەتیدەر بێت بۆ کۆنترۆڵکردنی گرژییەکان و ڕێگریکردن لە فراوانبوونی بازنەی ململانێکان.
بەڕێز سەرۆک وەزیران جەختی لەسەر هەڵوێستی عێراق کردەوە بۆ ڕێزگرتن لە سەروەریی وڵاتان، و بەکارنەهێنانی خاکەکەی وەک بنکەیەک بۆ دەستدرێژیکردنە سەر وڵاتانی دراوسێ، هەروەها پێویستیی پەنابردنە بەر چارەسەری ئاشتییانە و دیالۆگی بنیاتنەر، بە شێوەیەک کە ئاسایشی ناوچەکە و سەقامگیریی گەلەکانی بپارێزێت.
هەردوولا جەختیان لەسەر گرنگیی بەردەوامیی پەیوەندیی نێوان هەردوو وڵات کردەوە، و هەماهەنگیکردنی هەڵوێستەکان لەسەر پرسە جێی بایەخە هاوبەشەکان، بەجۆرێک کە پەیوەندییە دووقۆڵییەکان بەهێزتر بکات و خزمەت بە بەرژەوەندییە هاوبەشەکان بگەیەنێت.
