رووداو دیجیتاڵ
سەرۆکوەزیرانی عێراق بڕیاریدا پشکی کەرکووک لە کارەبا و سووتەمەنی زیاد بکرێت و "بەپەلە دۆسیەی هەڵبژاردنی پارێزگار یەکلایی بکرێتەوە".
عەلی زەیدی ئەمڕۆ سێشەممە بڕیاریدا بە "زیادکردنی پشکی پارێزگای کەرکووک لە وزەی کارەبا بە جۆرێک کە پێداویستییەکانی هاووڵاتییان دابین بکات و کاتژمێرەکانی پێدانی کارەبا باشتر بکات، لەگەڵ زیادکردنی پشکی تەرخانکراوی سووتەمەنی بۆ موەلیدە ناحکومییەکان بۆ دەستەبەرکردنی بەردەوامیی کارکردنیان".
سەرۆکوەزیرانی عێراق هەروەها بڕیاریدا "پەلە بکرێت لە یەکلاکردنەوەی دۆسیەی هەڵبژاردنی پارێزگاری کەرکووک و کۆتاییهێنان بە بۆشایی ئیداری، بەپێی رێککەوتنەکانی نێوان پێکهاتەکانی پارێزگاکە".
دەقی راگەیێندراوەکەی نووسینگەی راگەیاندنی سەرۆکوەزیران:
سەرۆکی ئەنجوومەنی وەزیران بەڕێز عەلی فالح زەیدی، فەرمان دەکات بە زیادکردنی پشکی کەرکووک لە کارەبا و سووتەمەنی و یەکلاکردنەوەی دۆسیەی پارێزگار
سەرۆکی ئەنجوومەنی وەزیران، بەڕێز عەلی فالح زەیدی، ئەمڕۆ سێشەممە، سەرۆکایەتیی کۆبوونەوەیەکی فراوانی کرد بۆ تاوتوێکردنی رەوشی پارێزگای کەرکووک، بە ئامادەبوونی بەڕێزان جێگری سەرۆکی ئەنجوومەنی وەزیران بۆ کاروباری ئابووری و وەزیرانی ناوخۆ و داد و وەزیری دەوڵەت بۆ کاروباری دەرەوە و سەرۆکی دەستەی حەشدی شەعبی و بەڕێوەبەری نووسینگەی فەرماندەی گشتیی هێزە چەکدارەکان و سەرۆکی دەزگای ئاسایشی نیشتمانی و سەرۆکی فراکسیۆنی پارتی دیموکراتی کوردستان لە ئەنجوومەنی نوێنەران.
لە کۆبوونەوەکەدا، تاوتوێی دۆخی گشتیی پارێزگای کەرکوک و دۆسیە ئیداری و خزمەتگوزاری و ئەمنییە پەیوەندیدارەکان و پێداویستییەکانی هاووڵاتییان لە پارێزگاکەدا کرا.
بەڕێز سەرۆکی ئەنجوومەنی وەزیران فەرمانی کرد بە زیادکردنی پشکی پارێزگای کەرکووک لە وزەی کارەبا بە جۆرێک کە پێداویستییەکانی هاووڵاتییان دابین بکات و کاژمێرەکانی پێدانی کارەبا باشتر بکات، لەگەڵ زیادکردنی پشکی تەرخانکراوی سووتەمەنی بۆ مۆلیدە ناحکومییەکان بۆ دەستەبەرکردنی بەردەوامیی کارکردنیان، هەروەها پەلەکردن لە یەکلاکردنەوەی دۆسیەی هەڵبژاردنی پارێزگاری کەرکووک و کۆتاییهێنان بە بۆشایی ئیداری، بەپێی رێککەوتنەکانی نێوان پێکهاتەکانی پارێزگاکە.
بەڕێز زەیدی، فەرماندەییی ئۆپەراسیۆنەکان و دەزگا ئەمنییەکانی راسپارد بۆ گرتنەبەری رێکارە پێویستەکان بە مەبەستی سەقامگیرکردنی ئاسایش و ئارامی، هەروەها مامەڵەکردن لەگەڵ خۆپیشاندانەکان بەپێی دەستوور و یاسا و دەستەبەرکردنی پاراستنی خۆپیشاندەران و موڵک و ماڵی گشتی و تایبەت.
هەروەها بەڕێزیان رێنماییی دا بە رەوانەکردنی دۆسیەی نرخی مۆلیدە ئاهلییەکان بۆ دەستەی دەستپاکی، بە مەبەستی لێکۆڵینەوە و وردبینی لە سەرپێچییە پەیوەندیدارەکان و گرتنەبەری ڕێکاری یاسایی پێویست.
بەڕێز سەرۆکی ئەنجوومەنی وەزیران جەختی لەسەر گرنگیی بەدواداچوونی مەیدانی بۆ ئەم دۆسیانە کردەوە، لەگەڵ کارکردن بۆ باشترکردنی ئاستی خزمەتگوزاری و گەشەپێدان لە پارێزگاکە و وەڵامدانەوەی داواکارییە رەواکانی هاووڵاتییان، بە جۆرێک کە سەقامگیری بەهێز بکات و بەردەوامیی کاری دامەزراوەکان و پێشکەشکردنی خزمەتگوزارییەکان دەستەبەر بکات.
•••••
نووسینگەی راگەیاندنی سەرۆکی ئەنجوومەنی وەزیران
3ی تشرینی دووەمی 2026
