رووداو دیجیتاڵ
داواکاریی پەرلەمانتاران بۆ بەهەمیشەییکردنی فەرمانبەرانی گرێبەستی عێراق رەوانەی وەزارەتی دارایی فیدراڵ کراوە، بۆ ئەوەی لە پرۆژەیاسای بودجەی گشتیی 2027 جێگەی بکرێتەوە، کە ژمارەیان نزیکەی 250 هەزار کەسە.
جەمال کۆچەر، ئەندامی لیژنەی دارایی پەرلەمانی عێراق بە تۆڕی میدیایی رووداوی راگەیاند: بەشێک لە پەرلەمانتاران داواکاریی فەرمییان لە رێگەی سکرتاریەتی پەرلەمانەوە ئاراستەی وەزارەتی دارایی عێراق کردووە بۆ ئەوەی بەهەمیشەییکردنی فەرمانبەرانی گرێبەست لە پرۆژەیاسای بودجەی گشتیی 2027 جێگیر بکرێت.
یەکێک لەو نووسراوانەی کە لەو بارەیەوە ئاراستەی سەرۆکایەتیی پەرلەمان کراوە، لەلایەن عەبدولحەمزە خەفاجی، سەرۆکی فراکسیۆنی ئیرادەوە بە واژۆی دەیان پەرلەمانتارەوە ئاراستەی وەزارەتی دارایی کراوە، کە تێیدا داوا کراوە فەرمانبەرانی گرێبەست و ئەوانەی بە شێوەی مانگانە و کاتی دامەزراون، بکرێنە فەرمانبەری هەمیشەیی.
جەمال کۆچەر رایگەیاند، بڕیارێکی فەرمی لە پەرلەمانەوە دەرنەکراوە بۆ بەهەمیشەییکردنی گرێبەستەکان و تەنیا ئەو داواکارییانە ئاراستەی وەزارەتی دارایی کراون.
بەگوێرەی ئامارە نافەرمییەکان، ژمارەی گرێبەستەکان لە عێراق نزیکەی 250 هەزار کەس دەبن. هەروەها لە هەرێمی کوردستان 87 هەزار گرێبەست هەن.
.webp&w=3840&q=75)