رووداو دیجیتاڵ عەممار جبووری، پارێزگاری پێشووتری سەلاحەدین بە "تاوان"ی دەستکەوتنی پارە بە شێوەی ناڕەوا، بە حەوت ساڵ زیندانیکردن سزا درا. دەستەی دەستپاکیی عێراق لە راگەیێندراوێکدا ئاماژەی بەوە داوە کە ئەو سزایەی سەر عەممار جبووری، ئەمڕۆ یەکشەممە 16ی ئاب بە بێ ئامادەبوونی ئەو بەرپرسەی پێشوو خۆی دەرچووە. بەگوێرەی بڕیارەکە، عەممار جبووری یەک ملیار و 728 ملیۆن و 74 هەزار دیناری بە شێوەیەکی ناڕەوا دەستکەوتووە کە دەبێت بیگەڕێنێتەوە و ئەگەریش دەستگیرکرا، نابێت ئازاد بکرێ تاوەکو ئەو بڕە پارەیە نەگەڕێنێتەوە. یاسین داودی، ئەندامی ئەنجوومەنی پارێزگای سەلاحەدین بە تۆڕی میدیایی رووداوی راگەیاند، ئەو دۆسیەیەی پارێزگاری پێشووتری سەلاحەدین لە کاتێکدا بووە، ئەنجوومەنی پارێزگا نەبووە و پارە بەهەدەر دراوە. دادگەی تاوانەکانی گەندەڵی بڕیاری داوە کە دەست بەسەر موڵک و ماڵی عەممار جبووری و هاوژین و کوڕەکەیدا بگیرێ و مافیشی بە دەستەی دەستپاکی داوە کە داوای قەرەبووی لێ بکاتەوە. عەممار جبووری ساڵی 2018 وەک پارێزگار هەڵبژێردرا و لە ساڵی 2022 لەلایەن پەرلەمانەوە لە پۆستەکەی دوورخرایەوە و دواتر چووە دەرەوەی عێراق.
عێراق16-08-2026لە سەرەتای مانگی داهاتووەوە گومرگ و باجى پێشوەختەی کاڵای هاوردەکراو لە عێراق وەردەگیرێ
