رووداو دیجیتاڵ
ئاژانسی هەواڵگری و لێکۆڵینەوەکانی سەر بە وەزارەتی ناوخۆی عێراق رایگەیاند، دەستیان بەسەر 20 درۆنی دروستکراوی ناوخۆییدا گرتووە.
وەزارەتی ناوخۆی عێراق لە راگەیێندراوێکدا ئاماژەی بەوە کردووە، ئەو درۆنانە لە دوو ئۆپەراسیۆندا لە بەغدا دەستیان بەسەردا گیراوە.
وەزارەتەکە دەشڵێت، چوار کەس دەستگیرکراون و لە کاتی لێکۆڵینەوەدا دانیان بەوەدا ناوە بازرگانییان بەو درۆنانەوە کردووە.
وەزارەتى ناوخۆى عێراق راگەیاند، ئەو کەسانە بەپێچەوانەى مەرج و رێکارەکانى لایەنە پەیوەندارەکان مامەڵەیان بەو درۆنانەوە کردووە.
رۆژی دووشەممە، 10ـی ئابی 2026، لیوا میقداد میری، سەرۆکی فەرمانگەی پەیوەندییەکان و راگەیاندن لە وەزارەتی ناوخۆی عێراق، لە کۆنفرانسێکی رۆژنامەڤانیدا لە باڵەخانەی وەزارەتی ناوخۆی عێراق رایگەیاند، ئەم ساڵ 49 فڕۆکەی بێفڕۆکەوان (درۆن) دەستیان بەسەردا گیراوە.
لیوا میقداد میری گوتی: "هەر درۆنێک بەبێ رەزامەندیی فەرمی و بۆ ئامانجی نائاشتییانە بەکاربهێنرێت، خاوەنەکەی بەپێی یاسای بەرەنگاربوونەوەی تیرۆر مامەڵەی لەگەڵدا دەکرێت."
