رووداو دیجیتاڵ
بە بەشداریی عەلی فالح زەیدی، سەرۆکوەزیرانی عێراق، چوارچێوەی هاوئاهەنگی کۆبوونەوەیەکی "بەپەلە"ـی ئەنجامدا و تێیدا هێرشەکانی ئەمریکا و سعودیەی بۆ سەر خاکی عێراق بە "پێشێلکارییەکی ئاشکرای سەروەریی وڵات" ناوبرد.
ئێوارەی دوێنێ چوارشەممە، 29ی تەممووزی 2026، عەلی فالح زەیدی لە کۆشکی حکومەت میوانداریی سەرکردەکانی چوارچێوەی هاوئاهەنگی کرد بۆ تاوتوێکردنی دوایین هێرشە ئاسمانییەکان کە هێزەکانی حەشدی شەعبیان لە چەند ناوچەیەکی عێراق کردە ئامانج.
چوارچێوەی هاوئاهەنگی لە راگەیێندراوێکدا بە "تووندی سەرکۆنەی" ئەو هێرشانەی کرد کە بوونە هۆی شەهید و برینداربوونی ژمارەیەک لە ئەندامانی حەشدی شەعبی.
لە بەشێکی پەیامەکەیان ئاماژەیان بەوەکردووە: "ئەم هێرشانە پێشێلکارییەکی ئاشکرای سەروەریی عێراق و پیرۆزیی خاکەکەیەتی، کە تەواو پێچەوانەی بنەماکانی یاسای نێودەوڵەتی و پەیمانی نەتەوە یەکگرتووەکانە."
کۆبوونەوەکە سەرسوڕمانی خۆی لەم هێرشانە دەربڕی، بەتایبەتی کە حکومەتی عێراق "سیاسەتێکی دەرەکیی هاوسەنگ" پەیڕەو دەکات و هەوڵی بنیاتنانی باشترین پەیوەندی و هاوبەشی لەگەڵ وڵاتانی دراوسێ و کۆمەڵگەی نێودەوڵەتی دەدات.
لە بەشێکی دیکەی راگەیێندراوەکەدا جەخت کرایەوە: "دەستدرێژی بۆ سەر ئاسایش و سەروەریی عێراق لە ژێر هەر پاساوێکدا بێت رەتکراوەیە."
چوارچێوەی هاوئاهەنگی دووپاتیکردەوە کە رێگە نادەن عێراق بکرێتە گۆڕەپانێک بۆ یەکلاکردنەوەی ململانێ ناوچەیی و نێودەوڵەتییەکان.
لە کۆتایی راگەیێندراوەکەدا هۆشداری درایە ئەمریکا و سعودیە کە ئەم جۆرە هێرشانە خزمەت بە هەوڵەکان بۆ هێورکردنەوەی قەیرانەکان ناکات، بەڵکو دەبێتە هۆی ئاڵۆزتربوونی دۆخەکە و هەڕەشە لە ئاسایش و سەقامگیریی تەواوی ناوچەکە دەکات.
