رووداو دیجیتاڵ
راوێژکاری ئاسایشی نیشتمانیی عێراق و هەڵسوڕێنەری کاروباری باڵیۆزخانەی ئەمریکا تاوتوێی سنووردارکردنی چەکیان لە دەستی دەوڵەت کرد و بەگوێرەی راگەیێندراوی ئاسایشی نیشتمانیی عێراق، ئەو بەرپرسەی ئەمریکا ستایشی راگەیێندراوەکەی هاوپەیمانیی چوارچێوەی لەبارەی سنووردارکردنی چەک کردووە.
کۆبوونەوەکەی نێوان قاسم ئەعرەجی، راوێژکاری ئاسایشی نیشتمانیی عێراق و جۆشوا هاریس، هەڵسوڕێنەری کاروباری باڵیۆزخانەی ئەمریکا لە بەغدا، رۆژی سێشەممە 2ی حوزەیرانی 2026 بوو.
بەگوێرەی راگەیێندراوی راوێژکارێتی ئاسایشی نیشتمانیی عێراق، لەو کۆبوونەوەیەدا جۆشوا هاریس ستایشی راگەیێندراوەکەی هاوپەیمانیی چوارچێوەی هاوئاهەنگی کردووە تایبەت بە سنووردارکردنی چەک لە دەستی دەوڵەت و بە "گۆڕانکارییەکی جۆری" ناوی بردووە، لەپێناو سەربەخۆیی و سەروەریی داهاتووی عێراق.
لە 1ی حوزەیرانی 2026دا هاوپەیمانیی چوارچێوەی هاوئاهەنگی رایگەیاند، پاڵپشتیی دابڕاندنی دەستەی حەشدی شەعبی لە لایەنە سیاسییەکان دەکات و بڕیاری جەنگ و ئاشتی بەدەست دامەزراوە فەرمییەکانی دەوڵەتەوەیە و هەر کردەوەیەک لەدەرەوەی ئەوە بە دەرچوون لە یاسا هەژمار دەکرێ.
چوارچێوەی هاوئاهەنگی سەرۆکوەزیرانی عێراقی سەرپشک کرد لە گرتنەبەری رێکار و بڕیاری پێویست لەوەی کە پەیوەندیدارە بە سنووردارکردنی چەک بەدەستی دەوڵەتەوە.
راوێژکارێتی ئاسایشی نەتەوەیی عێراق رایگەیاند، هەڵسوڕێنەری کاروباری باڵیۆزخانەی ئەمریکا پاڵپشتیی حکومەتی ئەمریکای بۆ حکومەتی عێراق دووپات کردەوە و رایگەیاند، وڵاتەکەی هاوکاریی عێراق دەکات بۆ ئەوەی ئابووری و بووژاندنەوەی ببێتە بزوێنەرى کارا بۆ عێراق و خەڵکەکەی.