رووداو دیجیتاڵ
باڵیۆزی فینلاند لە عێراق رایدەگەیێنێت، لەم کاتەدا وڵاتەکەی هیچ پلانێکی بۆ کردنەوەی کۆنسووڵخانە لە هەولێر نییە، بەڵام جەخت دەکاتەوە کە ئەوە نابێتە رێگر لەبەردەم پەیوەندییەکانیان لەگەڵ هەرێمی کوردستان. لەبارەی دۆخی نێوخۆیی هەرێمی کوردستانیش دەڵێت، نزیکەی دوو ساڵ بەسەر هەڵبژاردندا تێپەڕیوە و پێویستە پەرلەمان کارا بکرێتەوە و حکومەت پێکبهێندرێت.
ئانتی پوتکۆنێن، باڵیۆزی فینلاند لە عێراق لە هەڤپەیڤینێکی تایبەتدا لەگەڵ تۆڕی میدیایی رووداو، تیشکی خستە سەر پەیوەندییەکانی وڵاتەکەی لەگەڵ هەرێمی کوردستان، پرسی ئەمنی، کۆچبەران و پێکهێنانی کابینەی نوێی حکومەتی هەرێمی کوردستان.
لەبارەی کردنەوەی کۆنسووڵخانەی وڵاتەکەی لە هەرێمی کوردستان هاوشێوەی زۆربەی وڵاتانی یەکێتیی ئەورووپا، ئانتی پوتکۆنێن گوتی، "ئێستا هیچ پلانێکمان نییە بۆ کردنەوەی کۆنسووڵخانە لە هەولێر، بەڵام بەردەوام سەردانی هەولێر و سلێمانی دەکەین. نەبوونی کۆنسووڵخانە نابێتە رێگر لەبەردەم پەیوەندییە دووقۆڵییەکانمان لەگەڵ حکومەتی هەرێمی کوردستان و هەمیشە لەلایەن بەرپرسان و گەلی کوردەوە پێشوازییەکی گەرممان لێکراوە."
سەبارەت بە پرۆسەی سیاسی و دواکەوتنی پێکهێنانی کابینەی نوێی حکومەتی هەرێمی کوردستان، باڵیۆزی فینلاند پەیامێکی ئاراستەی لایەنە سیاسییەکان کرد و رایگەیاند، "هەڵبژاردنەکان لێرە نزیکەی دوو ساڵ لەمەوبەر ئەنجامدران؛ لە هەر پرۆسەیەکی دیموکراسیدا پێویستە لە کاتی گونجاودا هەنگاوەکانی کۆتایی لە رووی کاراکردنی پەرلەمان و پێکهێنانی حکومەتەوە بنرێن، بۆیە هیوادارین هەنگاوی باش بەرەوپێشەوە بنرێن بۆ گەیشتن بەو ئامانجە."
دەقی هەڤپەیڤینەکە:
رووداو: بینەرانی خۆشەویستی رووداو، من نمە نەبەزم. لێرەین لە هەڤپەیڤینێکی تایبەتدا لەگەڵ بەڕێز ئانتی پوتکۆنێن، باڵیۆزی فینلاند لە عێراق. بابەتی زۆر هەن قسەیان لەسەر بکەین؛ پرسی کشانەوەی هاوپەیمانان کە فینلاند بەشێکی سەرەکی بوو تێیدا، بەردەوامیی پەیوەندییەکان لەدوای ئەم قۆناخە لە عێراق و هەرێمی کوردستان، هەروەها پرسی کۆچبەران و ئەوەی کە ئایا دواجار کۆنسوڵخانەی خۆیان لە هەولێر دەکەنەوە یان نا. زۆر سوپاس کە لەگەڵمانیت، خۆشحاڵین.
ئانتی پوتکۆنێن: سوپاس بۆ بانگهێشتەکەتان. خۆشحاڵم کە لێرەم.
رووداو: با بە باسکردنی پەیوەندییە دووقۆڵییەکانی نێوان فینلاند و عێراق، بەتایبەتیش هەرێمی کوردستان دەستپێبکەین. ئێستا گرنگترین کاری لەپێشینەی فینلاند لە کوێدا دەبینن، بەتایبەت لە رووی دیپلۆماسی و سیاسییەوە، بە دیاریکراویش لە هەرێمی کوردستانی عێراق؟ کارە لەپێشینەکانتان لێرە چین؟
ئانتی پوتکۆنێن: وەکو هەر نێردەیەکی دیکەی دیپلۆماسی، بێگومان کاری سەرەکی و لەپێشینەمان پاراستن و بەهێزترکردنی پەیوەندییە دووقۆڵییەکانە لەگەڵ حکومەتی خانەخوێ. لەم دۆخەشدا، ئەمە حکومەتی فیدراڵی لە بەغدا و حکومەتی هەرێمیش لێرە لە هەولێر دەگرێتەوە. ئەمەش بەو واتایەیە کە من هەوڵدەدەم بەردەوام لەگەڵ بەرپرسانی حکومەت چ لە بەغدا و چ لێرە لە هەرێمی کوردستان کۆببمەوە و تاوتوێی رێگە و شێوازەکانی چۆنیەتیی بەهێزترکردن، هەمەچەشنکردن و بەرەوپێشبردنی زیاتری پەیوەندییە دووقۆڵییەکانی نێوان فینلاند و عێراق بکەم. بێگومان کاری هەرە لەپێشینە لەم کاتەدا پشتگیریکردن، یان با بڵێین سوودوەرگرتنە لەو ئاسایش و سەقامگیرییەی کە زیاتر بووە بۆ پەرەپێدانی پەیوەندییە بازرگانییەکانیش. هیوادارین ئەم رەوتە باشە بەردەوام بێت و لە داهاتوودا کۆمپانیا و بازرگانیی زیاتری فینلاندی ببینین کە لە بازاڕی عێراقدا چالاک بن، ئەوەش بێگومان هەرێمی کوردستانیش دەگرێتەوە.
رووداو: باشە. لە دیداری مێری گوێبیستی گوتاری بەرپرسانی عێراق و هەروەها سەرۆکی هەرێمی کوردستان بووین. دەمانەوێت بزانین، وەک چۆن ئێوە لێرە بەشێک بوون لە هێزەکانی هاوپەیمانان دژی داعش بۆ بەرگریکردن لە عێراق و هەرێمی کوردستان و هاوکاریکردنیان بۆئەوەی بەرگری لە خۆیان بکەن دژی داعش، ئایا ئێستا پێتان وایە لەم قۆناخەدا هێزە نێوخۆییەکان، چ سوپای عێراق و چ هێزەکانی پێشمەرگە، توانای ئەوەیان هەیە بەرگری لە خۆیان بکەن لەبەرامبەر ئەو هەڕەشە دەرەکییانەدا؟
ئانتی پوتکۆنێن: بەڵێ. وەک چۆن بە دروستی ئاماژەت پێکرد، فینلاند بۆ ماوەی 10 ساڵ، نزیکەی 10 ساڵ، بەشێک بوو لە هاوپەیمانیی نێودەوڵەتیی دژی داعش. ئێمە هێزمان لێرە لە هەولێر جێگیر ببوو و بە درێژایی ئەو ساڵانە لە چەندین قۆناخی ئۆپەراسیۆنەکەدا بەشدار بوون. دواتر کشاینەوە؛ بەشداریی ئێمە لە ئۆپەراسیۆنەکە لە کانوونی یەکەمی 2024 کۆتایی هات. لەئێستاشدا لە قۆناخێکداین کە تەواوی ئۆپەراسیۆنەکە لەسەر خاکی عێراق کۆتایی هاتووە. هەر ساڵێک لەمەوبەر، هەڵسەنگاندنێک بۆ هێزە چەکدارەکانی عێراق کرا، چ لە بەغدا و چ لەگەڵ پێشمەرگە، سەبارەت بە توانای بەرگریکردن و تێکشکاندنی تیرۆر لەنێو عێراقدا، و ئەو هەڵسەنگاندنە دەریخست کە ئەو توانایە هەیە. ئۆپەراسیۆنی هاوپەیمانان توانی مەشق و راهێنان بکات و هاوکار بێت لە پەرەپێدانی تواناکان چ بۆ هێزە ئەمنییەکانی عێراق و چ بۆ پێشمەرگە، و پێموایە ئێستا توانای ئەوەیان هەیە بە شێوەیەکی بەهێزتر و سەربەخۆتر ئاسایش و سەلامەتیی خەڵک لێرە بپارێزن، بە هەرێمی کوردستانیشەوە. پێویستە چاوکراوە بین و ئامادە بین بۆ رووبەڕووبوونەوەی هەر تیرۆرێک کە رەنگە سەرهەڵبداتەوە، بۆیە بێگومان ئەو کارە هێشتا بەردەوامە. هاوپەیمانان کشانەوە، بەڵام بێگومان هاوبەشییەکان بەردەوامن؛ زۆر لە وڵاتان بەردەوامن لە پێشکێشکردنی پشتگیریی دووقۆڵیی خۆیان لە کەرتی ئەمنی و بەرگریدا.
رووداو: ئەگەر بە دیاریکراوی باسی فینلاند بکەین، چ جۆرە پابەندییەک و بەرپرسیارێتییەکتان لەبەرچاوە کە لە داهاتوودا پێشکێشی هێزەکانی پێشمەرگەی بکەن؟ چ جۆرە هاوبەشییەک دەبێت، ئایا راوێژکاری دەبێت یان چ جۆرە...
ئانتی پوتکۆنێن: ئێستا سەرنجی ئێمە لەسەر نێردەی راوێژکاریی یەکێتیی ئەورووپایە، کە ئەوانیش بنکەیان لێرەیە لە هەولێر و راوێژکاری پۆلیسیان هەیە. ئەمە کاری ئێمەیە بۆ بەشداریکردن لە پاراستنی ئاسایش و بنیاتنان و پەرەپێدانی زیاتری توانای هێزە ئەمنییەکان لەنێو عێراق و هەروەها لێرە لە هەرێمی کوردستانیش. ئێمە راوێژکاری فینلاندیمان هەن کە چالاکن و وەک راوێژکار لە نێردەی راوێژکاریی یەکێتیی ئەورووپادا کار دەکەن.
رووداو: باشە، هاوکات فینلاند ئەندامی ناتۆشە.
ئانتی پوتکۆنێن: راستە.
رووداو: وەک ناتۆ، پێتان وایە هاوپەیمانیی ناتۆ چۆن دەبێت زیاتر مامەڵە و هاوئاهەنگی لەگەڵ وڵاتانی رۆژهەڵاتی نێوەڕاست و بەتایبەتیش عێراق و هەرێمی کوردستان بکات، وەک کارەکتەرێکی نێو هاوپەیمانێتییەکە؟
ئانتی پوتکۆنێن: ئەمەش پرسیارێکی زۆر لەجێی خۆیدایە. نێردەی ناتۆ لە عێراق هێشتا بەردەوامە لە پشتگیریکردنی دامەزراوە ئەمنی و بەرگرییەکانی عێراق و وەزارەتی بەرگری و هەروەها وەزارەتی نێوخۆ لە بەغدا لەڕێگەی پێشکێشکردنی راوێژ و بنیاتنانی تواناکانەوە. ئێستا ئەوان لە ناپۆلییەوە کار دەکەن و لە بەغدا ئامادەییان نییە، بەڵام هیوادارین دەرفەتی ئەوە رێکبکەوێت نێردەی ناتۆ لە عێراق بگەڕێتەوە بۆ عێراق تاوەکو بەردەوام بێت لە کارە راوێژکارییەکانی. هەروەها لەنێو نێردەی ناتۆشدا راوێژکار و سەربازی فینلاندیمان هەن کە خزمەتگوزاریی راوێژکاری پێشکێش دەکەن. کەواتە ئێمە بەردەوام دەبین لە پشتگیریکردنی کەرتی ئەمنی لە عێراق، بە هەرێمی کوردستانیشەوە، بەڵام بە قەبارەیەکی بچووکتر بەراورد بە رابردوو کە هێشتا هێزمان لێرە لە بنکەی هاوپەیماناندا هەبوو.
رووداو: باشە، وڵاتەکەتان تا چەند نیگەرانە سەبارەت بە گرووپە چەکدارەکانی دەرەوەی کۆنترۆڵی دەوڵەت لە عێراق؟ چۆن پشتگیری لە حکومەتی عێراق دەکەن بۆئەوەی ئەم رێچکەیە بگرێتەبەر و ئەو گرووپانە چەک بکات؟ چ هاوکاری و پاڵپشتییەکیان پێشکێش دەکەن؟ و تا ئێستا چۆن دەڕواننە پرۆسەکە؟ وەک دەزانن وادەی کۆتایی بۆ ساڵی داهاتوو دواخراوە.
ئانتی پوتکۆنێن: پرۆسەکە زۆر گرنگە. لە راستیدا من ئەمڕۆ پێشتر لەو پانێڵەشدا کە تێیدا بەشدار بووم، ئەم بابەتەم ورووژاند و بێگومان ئێمە هەموو پشتگیرییەک پێشکێش دەکەین. پشتگیریی ئێمە بۆ حکومەتی عێراق دیپلۆماسی و سیاسییە لەکاتێکدا هەوڵی چەککردنی ئەو گرووپانە و خستنەژێر کۆنترۆڵی چەک دەدەن بۆ ژێر دەستی دامەزراوە ئەمنییەکانی دەوڵەت. ئەمە هەنگاوێکی زۆر گرنگە بۆ هەر وڵاتێکی خاوەن سەروەری کە تەنیا خۆی بەرپرسیارێتیی هەڵگرتنی ئەو جۆرە چەکانەی لەئەستۆدا بێت. ئێمە بەڕاستی پشتگیری لەو پرۆسەیە دەکەین کە حکومەت دەستیپێکردووە. تێدەگەین کە بێگومان پرۆسەکە ئێستا چەند مانگێک دەخایەنێت، بەڵام ئەنجامیش پێویستە. ئەنجامەکان پێویستن بۆئەوەی لە کۆتاییدا، کاتێک لە هاوینی داهاتوودا لە وادەی دیاریکراو نزیک دەبینەوە، هیوادارین لە پێگەیەکدا بین کە زۆربەی گرووپەکان چەکە قورسەکانیان رادەستی دامەزراوە ئەمنییەکانی دەوڵەت کردبێت.
رووداو: رەوەندێکی کوردی لە فینلاند و پێموایە بەگشتی لە وڵاتانی ئەسکەندەناڤیا هەن. ئێستا حکومەت چۆن مامەڵە لەگەڵ داواکارییەکانی مافی پەنابەرێتی و کۆچدا دەکات؟ چ جۆرە هاوئاهەنگییەکتان لەگەڵ هەرێمی کوردستان و حکومەتی عێراق هەیە بۆ دڵنیابوونەوە لە سەلامەتیی کۆچبەران، هەروەها پرۆسەکە بەلای ئێوەوە چۆنە؟
ئانتی پوتکۆنێن: رەوەندێکی بەرچاو لە فینلاند هەن و بە درێژایی ساڵان خەڵکێکی زۆر کۆچیان کردووە بۆ فینلاند و هەندێکیشیان بوونەتە هاووڵاتیی فینلاندی. بەڵام هەموویان لە رووی یاساییەوە رێگەیان پێنادرێت لە فینلاند بمێننەوە، و ئێستا بێگومان دۆسیەی کۆچ و گەڕانەوە بەشێکە لە پەیوەندییە دووقۆڵییەکانمان لەگەڵ عێراق، کە بێگومان ئەمە هەرێمی کوردستانیش دەگرێتەوە. بۆیە ئێمە بەردەوامین لە گفتوگۆکردن؛ هاوئاهەنگییەکی باشمان لەگەڵ بەرپرسانی عێراق هەیە کاتێک بابەتەکە پەیوەندیی بە هاندانی گەڕانەوەی ئارەزوومەندانەوە هەبێت بۆ ئەوانەی مافی مانەوەی یاساییان لە فینلاند نییە، بەڵام هاوکات دیپۆرتکردنەوەش هەیە بۆ ئەو کەسانەی کە تاوانیان ئەنجامداوە و هتد. لە راستیدا ئەو هاوئاهەنگییە زۆر بە باشی بەڕێوەدەچێت. کۆچ پرسێکە تەنیا کاریگەریی لەسەر ئەم ناوچەیە نییە، بەڵکو کاریگەریی لەسەر ئەورووپاش هەیە. من تاڕادەیەک هانی ئەو گەنجانە دەدەم کە رەنگە بیر لە گەڕان بەدوای بەختێکی باشتردا بکەنەوە لە ئەورووپا، کە بەڕاستی خەونەکانیان لێرە لە کوردستان بنیات بنێن و بەهێزی بکەن. پێموایە جەنابی سەرۆک نێچیرڤان بارزانیش لە گوتەکەیدا ئاماژەی بەمە کرد، کە گەنجان پێویستە لێرە لە عێراق و لەپێناو سوودی کوردستاندا بەدوای خەونەکانیاندا بچن.
رووداو: جگە لەو رۆڵە ئەمنی و سەربازی و راوێژکارییە قورسەی کە هەتانە، لە چ کەرتێکی دیکەدا، بۆ نموونە ئابووری، پەروەردە یان بواری دیکە خوازیارن زیاتر لە عێراق و بەتایبەتیش لە هەرێمی کوردستان کاری لەسەر بکەن، و بۆ نموونە پەیوەندییە کولتوورییەکانی نێوان هەردوو کۆمەڵگە بەهێز بکەن؟
ئانتی پوتکۆنێن: ئەمە پرسیارێکی زۆر فراوانە. زۆر شت هەن لەو چوارچێوەیەدا باس بکرێن، بەڵام بە دڵنیاییەوە هیوادارین وەک چۆن ئاماژەم پێکرد، پەرە بە پەیوەندییە بازرگانی و ئابوورییەکان بدەین، بە جۆرێک کە کۆمپانیای زیاتری فینلاندی بێنە نێو بازاڕەکەوە و کاڵا و خزمەتگوزارییەکانیان پێشکێشی بەکاربەرانی ئێرەش بکەن. بێگومان لەم رووەوە رەوەندی کوردیش گرنگن؛ ئەوان زانیاریی خۆیان لەسەر دۆخی نێوخۆیی و کارامەیی زمان و کولتووری خۆیان دەخەنە خزمەتی کۆمپانیا فینلاندییەکانەوە. تەنانەت هەندێک لەوانە لە راستیدا گەڕاونەتەوە بۆئەوەی کار و بازرگانیی تایبەت بە خۆیان لێرە دابمەزرێنن، بۆیە پێموایە بەشێک لە کارەکانی ئێمە پشتگیریکردنی ئەوانیشە. بەڵام بەڵێ، بێگومان پەیوەندییە کولتوورییەکان و با بڵێین پەیوەندییەکانی دیپلۆماسیی نەرم هێشتا پێویستن. فینلاند وەک دڵخۆشترین وڵاتی جیهان دەناسرێت و هیوادارین لە داهاتووشدا پارێزگاری لەو پێگەیە بکەین. ئێمە دەتوانین زۆر لە نموونە و ئەزموونەکانی خۆمان لە بواری پەروەردە، هەروەها لە تەکنەلۆژیای زانیاری، دیجیتاڵکردن، ژینگەی پاک، بەڕێوەبردنی پاشماوە و بەرهەمهێنانی وزەدا بگوازینەوە. کەواتە بواری زۆر هەن کە پێموایە فینلاند دەتوانێت تێیاندا چالاک بێت و ئەمە هەمیشە تەواوی عێراق دەگرێتەوە. پێشموایە هیوادارین لەگەڵ بەرەوپێشچوونی زیاتری ئاسایش و سەقامگیری، ئەم جۆرە پەیوەندییانە لەنێوان هەردوو وڵاتدا زیاتر ببن.
رووداو: ئێوە نوێنەرایەتییەکی دیپلۆماسیی بەهێزتان لە عێراق و هەرێمی کوردستان هەیە. چۆن دەڕواننە ناکۆکییەکانی ئێستا، ئەو ناکۆکییە بەردەوامانەی لەنێوان حکومەتی عێراق و حکومەتی هەرێمی کوردستاندا لەسەر داهاتی نەوت، مووچە و گفتوگۆکانی دیکە کە هەمیشە لەنێوان هەردوو حکومەتدا بەردەوامن؟ خوێندنەوەی ئێوە بۆ ئەمە چییە؟
ئانتی پوتکۆنێن: وەک نێردەیەکی دیپلۆماسی، بێگومان ئێمە چاودێرین؛ ئێمە چاودێری رووداو و پێشهاتەکانی هەر وڵاتێکین کە تێیداین. بێگومان وەک باڵیۆزێکیش، هەوڵدەدەم لەگەڵ لایەنە جیاوازەکان چ لە بەغدا و چ لێرە لە هەرێمی کوردستان کۆببمەوە. رەنگە من تەنیا بەو شێوەیە بتوانم لێدوان لەسەر ئەم بابەتە بدەم کە بێگومان ئێمە هانی بەردەوامبوونی دیالۆگ دەدەین. تێدەگەم کە کۆدەنگییەک هەیە بۆ هەوڵدان و گەیشتن بە چارەسەر و یەکلاکردنەوەی کێشە و ئاڵنگارییە هەڵپەسێردراوەکان چ بۆ هەرێم و چ بۆ پێکهاتەی فیدراڵی، تەنانەت ئەگەر پەیوەندیی بە شێوازی لێکدانەوەی دەستووریشەوە هەبێت. کەواتە ئەمانە کێشەگەلێکن کە بڕیاردان لەسەریان بۆ کارەکتەر و سیاسییە عێراقییەکان دەگەڕێتەوە، بەڵام وەک نێردە دیپلۆماسییەکان، بێگومان هانیان دەدەین بەردەوام بن لە دیالۆگ و بگەنە سازان و کۆدەنگی بۆ چارەسەرکردنیان.
رووداو: سەبارەت بە لێکەوتەکانی پاشماوەی داعش لەسەر ئەم وڵاتە، هەرێمی کوردستان و هەروەها لەسەر ئەورووپاش؛ پێموایە بەم دواییانە یەکێک لە هاووڵاتییە نەوجەوانەکانتان وەرگرتەوە کە پێشتر پەیوەندیی بە داعشەوە هەبووە. ئایا پلانتان هەیە ئەم جۆرە پرۆژانە ئەنجام بدەن یان زیاتر پەرەیان پێبدەن؟ یان ئەم پرۆسەیە بەرەو کوێ دەچێت؟
ئانتی پوتکۆنێن: فینلاند یەکێکە لەو وڵاتە کەمانەی کە هەر چەندین ساڵ لەمەوبەر بڕیاریدا بە شێوەیەکی کارا هەوڵی یارمەتیدانی منداڵە فینلاندییەکانی نێو کەمپەکانی باکووری رۆژهەڵاتی سووریا بدات، و ژمارەیەکی زۆر لەوان و دایکیشیانمان گەڕاندەوە بۆ فینلاند. بەڵێ، تەنانەت لەمساڵیشدا کەسێک هەبوو کە وەک مێرمنداڵێک لە باکووری رۆژهەڵاتی سووریاوە گواسترایەوە بۆ بەغدا. لێرەدا پێویستە ئەوەش بڵێم کە ئەو کەسە کاتێک برابووە باکووری رۆژهەڵاتی سووریا منداڵێکی زۆر بچووک بوو، بۆیە ئەرک لەسەر شانمان بوو. هیچ تۆمەتێکی تاوانکاریی رووبەڕوو نەکرایەوە، بۆیە توانیمان بیگەڕێنینەوە بۆ فینلاند. ئێستا ئەمە وەڵام و شێوازی مامەڵەکردنی ئێمە بووە لەگەڵ هەڕەشەی داعش و لێکەوتەکانی ئەو قۆناخە، و لە پرۆسەی گەڕاندنەوەی هاووڵاتییەکانماندا تاڕادەیەکی باش چالاک بووین.
رووداو: سەبارەت بە شتێک کە پێشتر باست کرد، گوتت هیواداریت تیمی ناتۆتان ببینیت بگەڕێنەوە بۆ بەغدا و عێراق. بە دیاریکراوی کەی دەبێت، یان ئایا هیچ بیرۆکەیەکتان لەبارەی کاتەکەیەوە هەیە یان نا، یاخود پێتان وایە چ مەرجێک دەبێت بێتەدی بۆئەوەی تیمی ناتۆ بگەڕێنەوە بۆ بەغدا؟
ئانتی پوتکۆنێن: پێموایە بێگومان نێردەی ناتۆ لە عێراق لەسەر بانگهێشتی حکومەتی عێراق کار دەکات. ئەوەش دەکەوێتە سەر بارەگای سەرەکیی ناتۆ و بەرپرسانی ئەمنیی عێراق کە کاتێکی گونجاو و لەبار بۆ گەڕانەوەی ئەو نێردەیە دیاری بکەن. بێگومان ئێمە هیوادارین ئەوە بەزوویی رووبدات، بەڵام ئێستا هیچ وردەکارییەک لەبارەی گەڕانەوەی نێردەی ناتۆ بۆ بەغدا لەبەردەستدا نییە.
رووداو: لەبارەی پێکهێنانی حکومەتی هەرێمی کوردستانەوە، وەک نێردەی دیپلۆماسیی فینلاند لە عێراق، چ پەیامێک ئاراستەی لایەنە کوردییەکان دەکەن؟
ئانتی پوتکۆنێن: دووبارە، من لێرە چاودێری پرۆسە سیاسییەکانی ئەم وڵاتەم و بێگومان ئەمە بابەتێکە کاتێک لەگەڵیاندا کۆدەبمەوە گفتوگۆی لەسەر دەکەین، بەڵام هێندە بەسە بڵێم کە هەڵبژاردنەکان لێرە نزیکەی دوو ساڵ لەمەوبەر ئەنجامدران و، لە هەر پرۆسەیەکی دیموکراسیدا پێویستە پرۆسەکە لە کاتی گونجاوی خۆیدا هەنگاوەکانی کۆتایی بنێت لە رووی کاراکردنی پەرلەمان و پێکهێنانی حکومەتەوە. بۆیە هیوادارین هەنگاوی باش بەرەوپێشەوە بنرێن بۆ گەیشتن بەو ئامانجە. ئەنجامدانی هەڵبژاردن و دواتر کۆبوونەوەی پەرلەمان و پێکهێنانی حکومەت بەشێکن لە پرۆسەی دیموکراسی، بۆیە با هیواخواز بین ئەو پرۆسەیە بەرەوپێش بچێت.
رووداو: ئایا پلانتان هەیە کۆنسووڵخانەی خۆتان لە هەولێر بکەنەوە؟
ئانتی پوتکۆنێن: ئەم پرسیارەم زۆر لێ دەکرێت. هەر کاتێک سەردانی هەولێر دەکەم ئەو پرسیارەم لێ دەکرێت و پرسیارێکی سرووشتیشە. زۆر لە وڵاتانی یەکێتیی ئەورووپا کۆنسووڵخانەی گشتیی خۆیان لێرە لە هەولێر هەیە. ئێستا هیچ پلانێکمان نییە بۆ کردنەوەی کۆنسووڵخانە. ئێمە چالاکین لە سەردانکردنمان بۆ ئێرە، چ لێرە لە هەولێر و چ لە سلێمانی، و هیوادارین ئەمە رێگەی ئێمە بێت بۆ پیشاندانی ئەوەی کە دەمانەوێت لێرە ئامادە بین و ئامادەیی خۆمان بسەلمێنین؛ خۆ ئەگەر هەندێک خزمەتگوزاریش لە ئێمە پێویست بێت، ئەوا هەمیشە لە بەغداش ئامادەین بۆ پێشوازیکردن لە سەردانیکاران.
رووداو: ئەمە بە چ واتایەک دێت کە کۆنسووڵخانەتان نییە، واتای چییە بۆ پەیوەندییەکانتان لەگەڵ حکومەتی هەرێمی کوردستان و کۆمەڵگەی ئێرە؟ ئایا پێتان وایە سەرەڕای ئەوەی کۆنسووڵخانە یان نوێنەرایەتییەکی فەرمیتان لە کوردستان نییە، هێشتا پەیوەندییەکی باش و نزیکتان هەیە؟
ئانتی پوتکۆنێن: من باڵیۆزم بۆ تەواوی عێراق بە هەرێمی کوردستانیشەوە، هەمیشە پێشوازییەکی زۆر گەرمم لێکراوە، چ لەلایەن بەرپرسانی حکومەتەوە لێرە و چ لەلایەن گەلی کوردیشەوە؛ پێشوازی و میواندۆستییەکە هەمیشە زۆر گەرمە. بۆیە نەخێر، پێموانییە ئەمە ببێتە رێگر لەبەردەم پەیوەندییە دووقۆڵییەکانمان یان پەیوەندیمان لەگەڵ حکومەتی هەرێمی کوردستان. بەپێچەوانەوە، ئێمە دەمانەوێت بە شێوەیەکی کارا لێرە بین، دەمانەوێت بەشدار بین و تاوەکو بکرێت زوو زوو لێرە بین بۆ گوێگرتن لە کاروبار و پێشهاتەکانی ئێستای کوردستان.
رووداو: بەڕێز ئانتی پوتکۆنێن، زۆر سوپاس بۆ کاتەکەت. سوپاس بۆ ئەم هەڤپەیڤینە، پێزانینمان هەیە.
ئانتی پوتکۆنێن: زۆر سوپاس. خۆشحاڵ بووم کە لێرە بووم.
