رووداو دیجیتاڵ
لە هەڤپەیڤینێکی تایبەتدا لەگەڵ تۆڕی میدیایی رووداو کە لە بەغدا تۆمارکراوە، هۆشیار زێباری، ئەندامی مەکتەبی سیاسیی پارتی دیموکراتی کوردستان و بەرپرسی ناوەندی سەرکردایەتیی حیزبەکەی لە بەغدا، تیشک دەخاتە سەر دۆخی سیاسیی عێراق و هەرێمی کوردستان و ئەو گۆڕانکارییانەی کە لەگەڵ کشانەوەی هێزەکانی ئەمریکا لە وڵاتەکە روودەدەن. زێباری، جەخت لەوە دەکاتەوە کە بوونی کورد لە بەغدا "پێویستییە نەک لەبەر ئەمریکا یان لایەنێکی دیکە، بەڵکو لەبەر بەرژەوەندیی خۆمان."
سەبارەت بە کشانەوەی هێزەکانی ئەمریکا تاوەکو 30ی ئەیلوولی 2026، زێباری روونیکردەوە، کە ئەمە بڕیارێکی ئاشکرایە و لە چوارچێوەی رێککەوتنی حکومەتی عێراق و لایەنی ئەمریکیدایە. بە بڕوای ئەو، کۆتاییهاتنی ئەرکی شەڕکەریی هێزەکان بە واتای کۆتاییهاتنی هەژموون و کاریگەریی ئەمریکا نییە، چونکە ئەمریکا بەرژەوەندیی گەورەی ئابووری و سیاسی لە عێراق و هەرێمی کوردستان هەیە و خاوەنی گەورەترین باڵیۆزخانە و کونسوڵخانەیە لە بەغدا و هەولێر. ئەو دەڵێت، "کاریگەری و هەژموونی ئەمریکا لە کوردستان و عێراق هەر دەمێنێت."
گرنگیی یەکڕیزیی نێوان پارتی دیموکراتی کوردستان و یەکێتیی نیشتمانیی کوردستان تەوەرێکی دیکەی قسەکانیەتی و زێباری، ئاماژەی بەوەدا کە هەم دۆستە نێودەوڵەتییەکان و هەم دۆخی سیاسیی عێراقیش وا دەخوازێت کورد لە بەغدا یەکگرتوو و بەهێز بێت. ئەو گوتی، "بێگومان ئێمە بەهێزتر دەبین لە بەغدا ئەگەر ئێمە یەک بین." هەروەها ئاشکرای کرد کە هەوڵێکی جیدی لەنێوان هەردوو لایەندا هەیە بۆ پێکهێنانی حکومەتی هەرێمی کوردستان و تێپەڕاندنی ئەو دۆخە چەقبەستووییەی کە هەیە، چونکە گەیشتوونەتە ئەو باوەڕەی کە دۆخی ئێستا مەترسییە بۆ سەر هەرێمی کوردستان.
لە کۆتاییدا، زێباری هیوا و دەرفەتەکان بۆ بەهێزکردنەوەی پێگەی کورد لە بەغدا دەخاتەڕوو. ئەو پێیوایە دەستوور گرنگترین کارتی دەستی کورد و هەموو عێراقییەکانە و دەبێت وەک مەرجەعێک بۆ چارەسەرکردنی کێشەکان مامەڵەی لەگەڵدا بکرێت. زێباری جەخت لەوە دەکاتەوە کە کورد هێزێکی لاواز نییە و خاوەنی هەرێمێکی دەستووری، هێز و پەیوەندیی نێودەوڵەتییە و دەبێت ئەم خاڵە بەهێزانە بۆ پاراستنی مافەکانی و بەشداریکردن لە بڕیاری سیاسیی عێراقدا بەکاربهێنێت و دەڵێت، "کلیلی چارەسەرەکەش لە کوردستانە."
دەقی هەڤپەیڤینەکە:
رووداو: کاک هۆشیار من زۆر خۆشحاڵم کە لە بەغدا ئەم چاوپێکەوتنە دەکەین. لەسەر هێزی کورد و گەڕانەوەی بۆ بەغدا بە بەهێزی، کە ئێستا عێراق لە قۆناخێکی زۆر هەستیاردایە. ئەمریکا وەکو راگەیەندراوە 30 ئەیلوول لە عێراق و لە هەرێمی کوردستانیش دەکشێتەوە. دەگوترێت ئەمریکا کە لە عێراق دەڕوات بە کوردی گوتووە؛ "بڕۆن بۆ بەغدا و خۆتان لە بەغدا بەهێز بکەنەوە" کە خۆی لە عێراق دەڕوات بۆچی بە کورد دەڵێن بە بەهێزتر بگەڕێنەوە بەغدا؟
هۆشیار زێباری: زۆر سوپاس، گەلێک خۆشحاڵم کە لە بەغدا دەتبینم، ئەوە یەکەمین چاوپێکەوتنی منە لە بەغدا لەگەڵ کەناڵێکی کوردی. رەوشی بەغدا جیاوازە لە رەوشی هەرێمی کوردستان، تۆ خۆت دوو سێ رۆژە لێرەی و دەیبینی، کارێکی زۆر هەیە لە بەغدا. کاروبارەکانمان گەلێک گرێدراوی حکومەتی عێراقن، لەبەر ئەوە بوونی ئێمە لە بەغدا و بوونی کورد بەشێوەیەکی گشتی لە بەغدا پێویستییە. نەک لەبەر ئەمریکا یان لایەنێکی دیکە، بەڵکو لەبەر بەرژەوەندیی خۆمان، چونکە ئێمە خۆمان بە خاوەنی ئەم وڵاتە دەزانین و دەبێت دەور و رۆڵمان هەبێت لە دروستکردنی ئەم عێراقە نوێیەدا. ئێمە پشکمان تێدا هەیە، بەشێکمان تێدا هەیە، ئەو دەستوورەی ئێستا عێراق کاری پێدەکات لەم باڵەخانەیەدا نووسراوەتەوە، کە ئێستا من و تۆ لێی دانیشتووین، ئەوە بارەگای جەنابی سەرۆک بوو کە کاتی خۆی زۆربەی کۆبوونەوەکانی لێ دەکرا. سەبارەت بە مەسەلەی چوونەدەرەوەی ئەمریکا، ئەمە بڕیارێکی ئاشکرایە و شاراوە نییە. پێش دوو ساڵ حکومەتی سوودانی رێککەوتنی لەگەڵ لایەنی ئەمریکی کردووە، کە ئەم دوو ساڵە دەبێتە قۆناخێکی گواستنەوە، تاوەکو کۆتایی مانگی ئەیلوولی 2026 هیچ بوونێکی سەربازیی یان شەڕکەر لە عێراق نامێنێتەوە، لە عێراق بە گشتی و هەرێمی کوردستانیش لەو چوارچێوەیەدا، هەروەها کۆتایی بە ئۆپەراسیۆنی ئیرادەی پۆڵایین دێت (هاوپەیمانیی نێودەوڵەتی / Operation Inherent Resolve) کاتی خۆی کە لەلایەن زیاتر لە 30 وڵات درووستکرابوو بۆ شەڕی دژی داعش لە عێراق و ناوچەکە، ئینجا ئەم ئۆپەراسیۆنە رەنگە لە عێراق کۆتایی بێت، مەرج نییە لە سووریا و ئوردن کۆتایی بێت، تاوەکو ئێستا رانەگەیەندراوە کە لە هەموو شوێنێک کۆتایی دێت، بەڵام لە عێراق ئەو بەڵێنەیان داوە بە حکومەتی ئێرە، حکومەتەکەی بەڕێز سوودانیش ئەو بەڵێنەی داوە بە خەڵکی خۆی، کە لە کۆتایی مانگی ئەیلوولی ساڵی 2026 هیچ بوونێکی سەربازیی ئەمریکی یان هاوپەیمانان لێرە نامێنێت. لەبەرئەوە ئەو رێککەوتنە دەبێتە خاڵێکی دەستپێکردن کە ئەو هێزە چەکدارە نایاسایی و ناقانوونییانەش نەمێنن کە لە عێراق هەن. بێگومان ئەمە کێشەیەکە کە تاوەکو ئێستا چارەسەر نەبووە!
رووداو: بە ئاسانیش چارەسەر نابێت...
هۆشیار زێباری: بە ئاسانیش چارەسەر نابێت، بەڵام راگەیاندنی کۆتاییهێنانی ئۆپەراسیۆنەکە لەلایەن ئەمریکاوە لە کۆتایی ئەیلوول، بەو مانایە نییە کە ئەمریکا بە تەواوی دەستبەرداری پابەندبوونەکانی دەبێت. ئەمریکاش بەرژەوەندیی خۆی هەیە، یەکێک لە گەورەترین باڵیۆزخانەکانی ئەمریکا لە جیهان لە بەغدایە، یەکێک لە گەورەترین کۆنسووڵخانەکانی ئەمریکا لە جیهان لە هەولێرە، بەرژەوەندیی ئابووریی هەیە، کۆمپانیاکانی خۆی هەیە، پێداویستیی خۆی هەیە. ئەگەری هەیە شێوەی هاریکاری و هاوکارییەکە بێتە گۆڕین، یان ناوەکەی گۆڕانکاریی تێدا بکرێت. با ئەوەمان لەبیر نەچێت، ئەمریکا بابەتەکە تەنها ژمارە نییە کە چەند سەربازی هەیە، بەتایبەتی لەم سەردەمەدا کە شەڕی ئێستا شەڕی تەکنەلۆجیایە، شەڕی هەواڵگرییە، شەڕی ئاسمانی و فڕۆکەی بێفڕۆکەوانە، شەڕی دۆلارە، لەبەر ئەوە کاریگەری و هەژموونی ئەمریکا لە کوردستان و عێراق هەر دەمێنێت.
رووداو: بۆچی داوا لە کورد دەکات، بەتایبەتی پارتی و یەکێتی، بگەڕێنەوە بەغدا؟ دەڵێت بەغدا بەهێزە و ئێوەش بەهێز بن لە بەغدا، خۆ ئێستاش پارتی لە بەغدایە، بەڵام داوایان لێدەکات بەهێز بن!
هۆشیار زێباری: ئاخر ئێمە هاوپەیمانیانین، دۆستیانین، بەدڵنیاییەوە تا ئێمە بەهێز بین لێرە لە بەغدا، دەورمان هەبێت، دەنگمان هەبێت، رای خۆمان هەبێت، ئەمە بەرژەوەندییەکی هاوبەشە.
رووداو: لەگەڵ ئەمریکا؟
هۆشیار زێباری: لەگەڵ ئەمریکا و لەگەڵ حکومەتی عێراقیش بەدڵنیاییەوە، چونکە ئێمەش خۆمان بە بەشێک لەم وڵاتە دەزانین. بەڵام بێگومان ئێمە بەهێزتر دەبین لە بەغدا ئەگەر ئێمە یەک بین.
رووداو: پارتی و یەکێتی؟
هۆشیار زێباری: پارتی و یەکێتی و هێزەکانی دیکەش، ئێمە بە چاوێکی کەم سەیری کەس ناکەین، بەڵام بێگومان بە مێژووش بۆ هەموو لایەک سەلمێندراوە تا زیاتر ئێمە یەک بین، یەک دەنگ بین و یەک هەڵوێست بین، ئێمە بەهێزترین.
رووداو: دەگوترێت ئەمریکییەکان گوتوویانە شەمەندەفەرەکە لە بەغداوە جووڵە دەکات و با پارتی و یەکێتی بەیەکەوە سەرکەون ئەگەرنا بەجێدەهێڵدرێن. دەتوانیت پێمان بڵێیت بۆچی بۆ ئەمریکا ئەوەندە گرنگە کورد بگەڕێتەوە بەغدا؟
هۆشیار زێباری: هاتنەوەی ئێمە یان بوونی ئێمە لە بەغدا، بڕیارێکی ناوخۆیی خۆمانە نەک ئەمریکا، راستە وەکو دۆستێک گوێیان لێدەگرین، بەڵام بەرژەوەندییەکانی خۆشمان دەبینین، لێرە بەرژەوەندییەکانمان یەکدەگرنەوە، ئەوە نییە کە فەرمانمان پێکرابێت. بەڵام ئێمەش وەکو کورد بەرژەوەندیی خۆمان دەبینین و دەزانین. بەڕاستی بەغداش بێ کەموکوڕی نەبووە، بەغدا رۆڵی هەبووە کە ئەم دوورکەوتنەوەیە دروست بێت. ئەو سیاسەتە و ئەو یاسا و ئەو هەوڵانەی دەدران بۆ لە قاڵبدانی هەرێم لەناو سیستمی نوێی عێراقدا، ئەوە هۆکار بوو. نەک ئەوەی لایەنی دیکە هۆکار بن، بەڵام ئێمەش کەموکوڕیمان هەبووە، لەبەر ئەوە ئێمە لێرەین و هەوڵ دەدەین ئەو کەموکوڕییانە چارەسەر بکەین، یان نەیهێڵین.
رووداو: ئایا قۆناخێکی نوێی سیاسی لە عێراق دەستپێدەکات دوای 30ی ئەیلوول؟
هۆشیار زێباری: بەدڵنیاییەوە، بە بۆچوونی من قۆناخێکی زۆر گرنگە دوای 30ی ئەیلوول، ئاسان نابێ و زەحمەت دەبێت.
رووداو: مەترسی هەن؟
هۆشیار زێباری: مەترسیی هەیە بێگومان، بەڵام هەوڵیش هەیە رەوشەکە بەرەو ئارامبوونەوە بڕوات، کەس دڵی بەوە خۆش نەبێت، کە شەڕ دروست ببێت لەنێوان گرووپە چەکدارەکان و حکومەت، یان شیعە و شیعە. کەس هانی شتێکی وا نادات، چونکە ئەگەر تێکبچێت لە هەموو لایەک تێکدەچێت، بەڵام بێگومان ئەگەر ئەم دەوڵەت و ئەم حکومەتە بیەوێت رێزی خۆی بپارێزێت، دەبێت دەسەڵات، چەک، بڕیاری شەڕ و ئاشتی لەدەستی خۆیدا بێت، نابێت هێزی هاوتەریب هەبێت.
تەنانەت ئەگەر سەیری رەوشی عێراق لە روویەکی دیکەوە بکەین، رەوشی ئابووری زۆر خراپە، رەوشی دارایی هەتا بڵێی خراپە، پارەی کاش (سیولە) نەماوە، داهاتەکان زۆر کەم بوونەتەوە و کێشەی گەورە هەیە، بەڵام عێراق وەکو دەوڵەت ئامرازی هەیە، توانای هەیە، دەتوانێت قەرز بکات یان لە پارەی یەدەگی خۆی رابکێشێت بۆ ئەوەی مووچە بدات. بەڵام ئەم دوو سێ مانگەی داهاتوو، پێموایە دوو سێ مانگێکی زەحمەت دەبن.
رووداو: پێویستە خۆمان ئامادە بکەین؟
هۆشیار زێباری: بەڕاستی پێویستە خۆمان باش ئامادە بکەین، چونکە هەندێک شت هەیە لە دەستی ئێمەدا نییە. یانی ئەم شەڕەی کە هەیە ئێستا هێشتا تەواو نەبووە، هێشتا ماویەتی و دەکوڵێت، کەسیش ناتوانێت بزانێت لەکوێ دەوەستێت.
رووداو: کاک هۆشیار باسی ئەوەت کرد کە لەم باڵەخانەیەدا دەستوور نووسراوەتەوە و کورد بەهێز بوون و سیاسەتی ئەوکاتی کورد زۆر مافی کوردی لە دەستووردا زامن کرد. ئەو دەستوورە کێشە و گفتوگۆی زۆری لەسەرە، چی جێبەجێ بوو و چی جێبەجێ نەبوو؟ ئێستا کورد بە چ ئامرازێکی بەهێز دەگەڕێتەوە بەغدا؟
هۆشیار زێباری: کارتی زۆر بەهێزی دەستی ئێمە و هەموو لایەک، کورد، عەرەب و هەموو عێراقییەکان، هەموو ئایین و پێکهاتەکانیش دەستوورە! دەستوور وەکو چەترێکە کە هەموو خەڵک کۆدەکاتەوە، رەنگە ناکۆکی و لێکدانەوەی جیاواز هەبێت، بەڵام مەرجەع (لێڤەگەر) دەستوورە.
رووداو: بەڵام بەس کورد وادەڵێت.
هۆشیار زێباری: نا نا، نەک تەنیا ئێمە، بەڵکو هەموو دنیا وا دەڵێت، جیهانیش مامەڵە لەگەڵ عێراق و ئەو وڵاتە دەکات لەسەر بنەمای ئەوەی یاسایەک هەیە و ئەو یاسایەش دەستوورە کە بنەمای مامەڵەکردنە. ئینجا بۆ جێبەجێکردنەکەی، بەدڵنیاییەوە لە رێگەی یاسادانانەوە دەبێت.
رووداو: ئەوە دەستوور کارتێکە، چیدیکەش هەیە وەک کارت؟
هۆشیار زێباری: بەشداریی ئێمە! هەبوونی ئێمە لە بەغدا، یانی ئێمە خۆمان لێرە بە نامۆ نەزانین، ئەمە وڵاتی ئێمەیە، موڵکی ئێمەیە و پشکمان تێدا هەیە، ئێمە هاوبەشین، ئێمە ئەم عێراقە نوێیەمان دروست کرد.
رووداو: ئەوە پێش 23 ساڵ بوو.
هۆشیار زێباری: نا نا ئێستاش، ئەگەر خەڵکی دیکە ببینی، بەو چاوە سەیری دەکات.
رووداو: کورد هاوپەیمانی بەهێزی هەیە لەناو پێکهاتەی شیعە؟
هۆشیار زێباری: هەمانە.
رووداو: ئەمریکا لە ساڵی 2003 شیعەی لە عێراق کردە حاکم و ساڵی 2014 بەهێز بوون و هێزی سەربازیی درووستکرد ئێستاش ئەو وڵاتە رادەستی ئەوان (شیعە) دەکرێت. دوو دۆسیەی گرنگ لە عێراق بەدەستی شیعەکانەوەیە؛ دۆسیەی ئەمنی کە هەموو سەرکردایەتییەکەی یەک کورد و سووننەی تێدا نییە، هەروەها دۆسیەی ئابووری، کە نەوت و بودجەیە. ئێوە چۆن مامەڵە لەگەڵ ئەمە دەکەن؟
هۆشیار زێباری: زۆر مافی ئێمە هەیە کە پەراوێز خراوە، لە زۆر وەزارەت و دەستە و دەزگاکان نوێنەرایەتیی ئێمە فەرامۆش کراوە و حەقی ئێمە خوراوە. بەڕاستی ئەوە نییە کە هاوسەنگییەکی دادپەروەرانە هەبێت، بەڵام ئەم شتانە هەمووی لە دەستووردا باس کراوە. سەیرکە، ئەم دەستوورە لەسەر ئەو بنەمایە دانراوە، کە یەک پێکهاتە، یەک نەتەوە، یان یەک حیزب ناتوانێت بەتەنیا حوکمڕانیی عێراق بکات.
رووداو: عێراق ناگەڕێتەوە بۆ مەرکەزییەت و سیستمی حوکمڕانیەت لە عێراق بگۆڕدرێت؟
هۆشیار زێباری: هەوڵدان هەیە بۆ ئەوە، بەڵام هەوڵی دژیش هەیە بۆ رێگریکردن. ئەوە تەنیا لایەنێک نییە، لەسەر تۆ دەمێنێتەوە کە تۆ تا چەند دەتوانی داوای مافی خۆت بکەیت و بەرگری لەو مافەی خۆت بکەیت و بەشداری بکەیت لە داڕشتنەوە و دروستکردنی بڕیارەکاندا. بوونت هەبێت و دادپەروەرییەک تێیدا هەبێت، ئەمە ئەو بنەمایەیە کە ئەو دەستوور و یاسایەی لەسەری داڕێژراوە.
رووداو: کاک هۆشیار، جەنابت وەزیر بوویت و ناوێکی دیاریت لە عێراقدا، عەرەبەکان دەڵێن یاساکانی یارییەکە لە بەغدا گۆڕاوە و هێزی دیکە سەرکەوتوون. ئێوە گلەییتان بەردەوام لە بەغدا هەبوو، کە دەگەڕێنەوە لەگەڵ کێ هاوپەیمانی دروست دەکەن بۆ ئەوەی پێکەوە قۆناخی داهاتوو بەڕێوەببەن؟
هۆشیار زێباری: نا نا، ئێمە هاوپەیمانیی زۆرمان هەیە لەگەڵ زۆربەی هێزە شیعی و سوننەکان. تەنانەت سەبارەت بە هێزە کوردییەکانیش، راستە ناکۆکیی سیاسی، ململانێ و کێشە هەیە، بەڵام دەرفەت هەیە لێرە لەسەر هەندێک کێشەی ئەساسی و ستراتیجی لێکتێگەیشتن هەبێت. ئینجا چ لەسەر ئاستی پەرلەمان بێت، یان ئاستی حکومەت، یانی ئەو زەمینەیە هەیە و با خۆمان بێهیوا نەکەین.
رووداو: ئەها یانی کورد خۆی بێهیوا نەکات؟
هۆشیار زێباری: هیچ کاتێک.
رووداو: کورد هاوبەشیی بەهێزی هەیە لە بەغدا؟
هۆشیار زێباری: هاوبەشمان هەیە، کوردیش هێزە و لاواز نییە، با بەو چاوە سەیری خۆمان نەکەین.
رووداو: کەواتە هەر ئەوە نییە کە پۆستی هەیە.. دەتوانێت بڕیار درووست بکات؟
هۆشیار زێباری: دەتوانێت... بەدڵنیاییەوە دەتوانێت، لە لایەکی دیکەشەوە، سەبارەت بە ئێمە هیچ شتێک نییە کە ئێمە شەرمی لێبکەین، مێژووی ئێمە، بوونی ئێمە، دەوری ئێمە، پەیوەندییەکانمان، هێزەکەمان لە هەرێمی کوردستان، ئێمە بێهێز نین.
رووداو: خاڵە بەهێزەکانی کورد لە عێراق چین؟
هۆشیار زێباری: زۆرن... خاڵی بەهێزی زۆرە، هەرێمی خۆتت هەیە، مافی دەستووریی خۆی هەیە، هێزی خۆی هەیە، پەیوەندیی باشی هەیە لەگەڵ دەوروبەر و لەگەڵ دنیادا، ئەمە هەمووی هێزە کە دەبێت بەکاری بهێنین، خەڵکی دیکە ئەم شتانەیان نییە.
رووداو: کاک هۆشیار، پێشتر لە چاوپێکەوتنێکدا لە رووداو کە پێکەوە کردمان، گوتت ئێمەی کورد لاوازین و ئەو لاوازییەش کاریگەریی لێکردووین لە بەغدا و واشنتنیش. ئێستا کە لە بەغدای، ئەمە چارەسەر کراوە یان چۆن چارەسەر دەکرێت؟
هۆشیار زێباری: بەدڵنیاییەوە دەبێت چارەسەر بکرێت، دەزانی ئامۆژگاریی هەموو دۆستێکی کورد ئەوەیە: کاتێک ئێوە یەکدەست و یەکگرتووبن، بەهێز دەبن و ئێمەش دەتوانین زیاتر هاوکارتان بین. ئەمە راستییە، چ باسی کوردستان، بەغدا یان واشنتن بکەم هەمان شت راستە.
رووداو: ئینجا ئەگەر هاونشتمانییەکی کورد ئەم پرسیارە بکات و بڵێت مادام ئەم راستییە دەزانن، بۆچی جێبەجێی ناکەن؟
هۆشیار زێباری: هەوڵمانداوە جێبەجێیبکەین و خۆشتان شاهیدن.. ئەوە دوو ساڵ زیاتر بەسەر هەڵبژاردنی پەرلەمانی کوردستان تێپدەپەڕێت و ئێمە هەوڵێکی زۆر جیدیمان دا کە حکومەتەکەمان پێکبهێنین، قەوارەکەمان بپارێزین و شەرعییەت بگەڕێنینەوە بۆ دامودەزگاکان... دواکەوت، راستە زۆر دواکەوت، بەڵام ئێستاش هەوڵێکی زۆر جیدی هەیە.. پەیوەندییەکی زۆر باش درووستبووە لە نێوان پارتی و یەکێتی لەسەر پێکهێنانی حکومەت و تێپەڕاندنی ئەم قۆناخە، سەرکردایەتی پارتی لەژێر ئیحراجیەکی گەورەدایە بەهۆی پێگە و ئەو بەرپرسیاریەتییەی هەیەتی. سەرکردایەتی یەکێتیش خوا هەڵناگرێت بە هەمان شێوە گەیشتوونەتە ئەو قەناعەتەی کە ئەم رەوشە مەترسییە بۆ سەر هەرێم و بۆ سەر هەردوو حیزب و سەرانسەری عێراقیش.
رووداو: کەواتە چی دەکەن؟
هۆشیار زێباری: لەو ماوەیەدا ئینشائەڵڵا هەواڵی باش دەبیستین.
رووداو: ئایا ئەمە بە نێوەندگیری نێودەوڵەتی و دەرەوە بووە؟ یان...
هۆشیار زێباری: نا زیاتر هەوڵی نێوخۆیی بووە، بەڵام هەست و بەرپرسیارەتییەکی هاوبەش بووە، کە پێویست دەکات لەو چەقبەستووییە دەربازمان بێت.
رووداو: کشانەوەی ئەمریکا لە 30ی ئەیلوول وایکرد پارتی و یەکێتی ناچاری ئەوە بن؟
هۆشیار زێباری: نەخێر، بابەتی 30 ئەیلوول ئێستا نییە، دوو ساڵە باسدەکرێت، ئەم مێژووە دوو ساڵە دیاریکراوە، بابەتەکە جیدییە و لەلایەن دۆستەکانیشمانەوە پێمانگوتراوە و نەشاردراوەتەوە.. بەڵام وەک لە سەرەتاوە بۆم باس کردی، نەمانی هێزی سەربازیی ئەمریکی بەو مانایە نییە، کە هەژموون و کاریگەری ئەمریکا نامێنێت، ئەمانە دوو شتی جیاوازن.
رووداو: بەڵام دەگوترێت لەدوای ساڵی 1991ـەوە یەکەم جارە هەرێمی کوردستان بەبێ چەتر و پاڵپشتی هێزی ئەمریکی لە عێراق دەمێنێتەوە.
هۆشیار زێباری: نا نا بەمشێوەیە نییە...
رووداو: کەواتە ئەم مەترسییە نەبوو کە پارتی و یەکێتی لەیەکتر نزیک کردەوە؟
هۆشیار زێباری: نا نا .. دەزانی ساڵانی 1991 و 1992، تەنیا شەش حەوت ئەفسەری ئەمریکی و هاوپەیمانان لە زاخۆ بوون، بەڵام هێزی ئەوکاتی سەدام چوارەمین گەورەترین هێز بوو، ساڵی 2003 نزیکەی 170 هەزار سەربازیان (ئەمریکا) لە عێراق هەبوو، بۆیە مەسەلەکە ژمارە نییە، بەڵکو هەژموون و کاریگەرییە، بۆیە ئەو هەژموون و کاریگەرییە تەواو نابێت و بەردەوام دەبێت.
رووداو: دەتوانین بڵێین پێش کۆتایی ئەمساڵ لە کوردستان حکومەت پێکدەهێنرێت، بۆئەوەی کورد لە بەغدا بەهێزتر سەیربکرێت؟
هۆشیار زێباری: وەڵا هێڤیدار، هێڤیدارم.. ئینشاڵلا زووتریش، چونکە لە بەرژەوەندی هەموو لایەکدایە.
رووداو: تۆ وایدەبینی درووست ببێت؟
هۆشیار زێباری: ئەوە بڕیارێکی ناوخۆییە، بەڵام ئەگەر دووربین بین و سەیری رەوشی خۆمان لە ناوخۆ وعێراقیش بکەین، پێویست دەکات پەلەی لێبکەین..
رووداو: دەتوانی پێمبڵێی.. دەبێت یان نابێت رێککەوتنی پارتی و یەکێتی؟ چونکە بەهێزی کورد لە بەغدا پەیوەستە بەوەوە.
هۆشیار زێباری: بەتەئکید ئەگەر لەوێ و لێرەش یەک بین بەهێزتر دەبین، گومان لەوەدا نییە، بەڵام کلیلی چارەسەرەکەش لە کوردستانە.
رووداو: دەتانەوێت لە بەغدا چی بکەن بۆ ئەم قۆناخەی کورد؟
هۆشیار زێباری: دەمانەوێت مافی کورد بپارێزین، نوێنەرایەتیی کورد بپارێزین. بەرگری لەو مافە دەستوورییانە بکەین، کە لە دەستووردا هاتوون، شەریک و بەشدار بین و خێر و سامانی ئەم وڵاتە بۆ هەموو لایەک بێت، ئەوە ئەو شتەیە کە ئێمە رێککەوتنمان لەسەری کردووە و دەبێت جێبەجێی بکەین.
رووداو: ئەو ئومێدە هەیە لە بەغدا؟
هۆشیار زێباری: هەیە، دەرفەتیش هەیە بۆ کارکردن لێرە لە بەغدا.
رووداو: ئایا لەگەڵ گرووپە چەکدارەکان (فەسائیل) دانوستاندتان هەیە، کە پێیان بڵێن ئەمریکا رۆیشت ئیتر وازمان لێبهێنن؟
هۆشیار زێباری: حەزدەکەم بزانن کە ئێمە پەیوەندیمان لەگەڵ زۆربەی فەسائیلەکان هەیە. دوێنێ هەندێکمان بینیوە و ئەمڕۆش هەندێکی دیکەیان دەبینین، خەڵک هەیە حەز دەکات گوێ لە ئێمە بگرێت بەڕاستی، هەروەها کاریگەریی ئێمەی کوردیش دەزانن لێرە، وەکو کورد، حیسابێکی دیکە بۆ ئێمە دەکەن.
رووداو: ئایا هیچ بەڵێنێکیان داوە کە ئیدی هێرش نەکەنە سەر هەرێمی کوردستان و درۆن نەنێرن؟ چونکە وا ئەمریکا دەڕوات و بیانوویان نامێنێت.
هۆشیار زێباری: سەیرکە بابەتەکە ئەوە نییە، هەندێک شت کە روودەدات لە دەرەوەی ئیرادەی ئەوانیشە هەندێکجار.
رووداو: باشە لەم چاوپێکەوتنەدا بە ناوی پارتی و یەکێتیشەوە قسەت کرد کاک هۆشیار؟
هۆشیار زێباری: تەقریبەن، من وەکیلم (بە پێکەنینەوە).
