رووداو دیجیتاڵ
بەرپرسی ناوەندی یەکینەکانی پاراستنی ژنان (یەپەژە) بە رووداوی گوت، گەیشتوونەتە لێکتێگەیشتنێکی سەرەتایی لەگەڵ حکومەتی سووریا بۆ تێکەڵکردنی هێزەکەیان بە وەزارەتی ناوخۆ وەک یەکەیەکی ئەرکە تایبەتەکان.
رۆژی دووشەممە 07-09-2026 رووکەن جەمال بە نالین حەسەن، پێشکێشکاری تۆڕی میدیایی رووداوی راگەیاند، لە کۆبوونەوەکانی کۆتایی مانگی ئاب لەگەڵ بەرپرسانی وەزارەتی ناوخۆی سووریا لە دیمەشق، بەرپرسان "بەشێوەیەکی بنچینەیی" پێشنیازی یەپەژەیان پەسند کرد بۆ ئەوەی وەک هێزێکی یەکگرتووی ئەرکە تایبەتەکان بچنە نێو وەزارەتەکە، نەوەک ئەوەی شەڕڤانەکانیان بەشێوەی تاکەکەسی یان لەژێر ناوی دیکەدا تێکەڵ ببن.
شاندی یەپەژە کە پێکهاتبوو لە نەورۆز ئەحمەد، فەرماندەی گشتیی هێزەکە و رووکەن جەمال، بە بەرپرسانی حکومەتی سووریایان راگەیاندووە (لەنێویاندا وەزیری ناوخۆ)، کە هێزەکە سەرەتا هەوڵی دابوو بچێتە سەر وەزارەتی بەرگری، بەڵام پێشنیازەکەیان رەتکرایەوە. ئێستا یەپەژە تێکەڵبوون بە وەزارەتی ناوخۆ وەک جێگرەوەیەکی "گونجاو" دەبینێت.
رووکەن جەمال گوتی: "بە گونجاومان زانی بچینە سەر وەزارەتی ناوخۆ. بۆ ئێمە، لەپێشینەی کارەکانمان پاراستنی پێگەمانە وەک قەوارەیەکی رێکخراو، واتە هێشتنەوەی شەڕڤانان، دامەزراوەکان و فەرماندەکانمان وەک خۆیان. کاتێک بینیمان وەزارەتی ناوخۆ بە شێوەیەکی ئەرێنی مامەڵەی کرد بۆ تێکەڵکردنمان وەک هێزێکی ئەرکە تایبەتەکان، بە گونجاومان زانی."
دیمەشق تاوەکو ئێستا هیچ لێدوانێکی فەرمی لەسەر ئەم لێکتێگەیشتنە نەداوە.
بەرپرسی ناوەندی راگەیاندنی یەپەژە ئاماژەی بەوە کرد، بەرپرسانی وەزارەتی ناوخۆ بە شاندەکەیان گوتووە، پێش دەرکردنی بڕیاری کۆتایی، لێکۆڵینەوە لە ئەگەری رێگەدان بە یەپەژە دەکەن بۆ ئەوەی وەک یەکەیەکی ئەرکە تایبەتەکان بەشداری بکات.
ئەوەشی خستەڕوو، یەپەژە تاوەکو ئێستا رووبەڕووی هیچ کۆسپێک نەبووەتەوە سەبارەت بە پێشنیازەکە؛ ئاماژەی بەوەش کرد، یەکەیەکی لەو شێوەیە دەبێتە یەکەم یەکە لە جۆری خۆی لە سووریادا؛ هەروەها گوتی، هێزە پێشنیازکراوەکە لە شارەکانی رۆژئاوای کوردستان جێگیر دەکرێت.
کۆتایی مانگی رابردوو، مەزڵووم عەبدی هەڵوەشاندنەوەی هێزەکانی سووریای دیموکرات (هەسەدە)ـی راگەیاند، ئەوەش چەند رۆژێک دوای ئەوەی رایگەیاند کە پرۆسەی تێکەڵکردنی دامەزراوە سەربازی، ئەمنی و کارگێڕییەکانی رۆژئاوا بە دەوڵەتی سووریا کۆتایی هاتووە.
یەپەژە باڵی ژنانی یەکینەکانی پاراستنی گەل (YPG)ـە.
پرۆسەی تێکەڵکردنەکە ئەنجامی رێککەوتنێکی مانگی کانوونی دووەمی نێوان هەسەدە و حکومەتی سووریایە دوای چەند هەفتەیەک لە پێکدادان.
بە گوتەی رووکەن جەمال، کاتێک یەپەژە لە پێکدادانەکانی مانگی کانوونی دووەمدا چووە نێو هەسەدە، نزیکەی 3 هەزار و 500 شەڕڤانی هەبوو، بەڵام لەو کاتەوە ژمارەیان بۆ نزیکەی هەزار و 500 شەڕڤان دابەزیوە.
رووکەن جەمال ئاماژەی بەوەدا گوتیشی، هەندێک لە شەڕڤانان "بە ویستی خۆیان و دوای رەزامەندیی ئێمە" بۆ هێزەکانی ئاسایشی ناوخۆی سەر بە دەوڵەت گوێزراونەتەوە، لە کاتێکدا هەندێکی دیکە بڕیاریان داوە لە دامەزراوە مەدەنییەکانی رۆژئاوادا کاربکەن یان بگەڕێنەوە بۆ ژیانی مەدەنی.
یەپەژە رۆڵێکی بەرچاوی گێڕا لە شەڕی دژی رێکخراوی دەوڵەتی ئیسلامی (داعش)، کە لە ساڵی 2019 دوایین پێگەی خۆی لە سووریا لەدەستدا.
بەرپرسی ناوەندی راگەیاندنی یەپەژە ئاماژەی بەوە کرد، 979 ئەندامی یەپەژە لە سەرجەم شەڕەکاندا گیانیان لەدەستداوە؛ هەروەها رایگەیاند، شەش ئەندامی یەپەژە هێشتا لە زیندانن.
دەقی هەڤپەیڤینەکە:
رووداو: با هەر لە دوایین کۆبوونەوەتان لە شام دەست پێ بکەین. لە رۆژانی 25 و 26ی ئابی رابردوودا، لە نێوان شاندەکەتان و وەزارەتی ناوخۆی سووریا کۆبوونەوە و گفتوگۆ هەبوون. بەتایبەتی لەگەڵ کام بەرپرسی حکوومەتی سووریا کۆبوونەوە؟
رووکەن جەمال: بێگومان وەک ئێوەش ئاماژەتان پێدا، لە 25 و 26ی مانگدا لە شام چەندین کۆبوونەوە لە نێوان بەڕێوەبەرانی رۆژئاوای کوردستان و بەرپرسانی حکومەتی شام بەڕێوەچوون. لەم چوارچێوەیەدا، وەک نوێنەری یەپەژە (YPJ)، فەرماندەی گشتی یەکینەکانی پاراستنی ژن، هەڤاڵ نەورۆز ئەحمەد لەگەڵ شاندەکەدا بەشدار بوو. ئێوەش لە نزیکەوە بەدواداچوونتان بۆ گۆڕانکارییەکانی شام کرد. بێگومان کارنامەی سەرەکی، هەڵسەنگاندنی دۆخی سیاسی بوو، ئێستا لە ناوچەکەدا دەگوزەرێت و کاریگەرییەکانی بەتایبەت لەسەر سووریا. لە بەرامبەر ئەم گۆڕانکارییانەدا، وەک رۆژئاوای کوردستان و وەک سووریا، چۆن دەتوانین پێکەوە سووریایەکی نوێ بنیاد بنێین؛ چ لە رووی ئیداری و چ لە رووی ئەمنییەوە چۆن دەتوانین پێکەوە پارێزگاری لێ بکەین؛ ئەمانە تەوەرە سەرەکییەکانی کۆبوونەوەکان بوون. هەروەها زمانی کوردیش یەکێک بوو لە بابەتە بنەڕەتییەکان؛ کە چۆن زمانی کوردی لە کەرتی پەروەردەدا جێگەی ببێتەوە. وەک ئەنجامی شۆڕش، 14-15 ساڵە نەوەیەکی نوێ بە زمانی دایکی دەخوێنێت. ئەو دەرفەتە دروست بووە و ئەمڕۆش لە چوارچێوەی رێککەوتنی 29ی کانوونی دووەمی ئەمساڵدا لە بوارەکانی سیاسی، ئیداری، زمان، کولتوور و پاراستندا بوونی هەیە. هەڤاڵ نەورۆزیش کە بەشدار بوو، یەکێک لە بابەتەکانی ئەو لەم کۆبوونەوانەدا دیسان یەپەژە بوو.
رووداو: بۆ یەپەژە، گرنگترین ئەنجامەکانی ئەم کۆبوونەوانەی شام چی بوون؟
رووکەن جەمال: لە کۆبوونەوەی 25 و 26ی مانگدا، فەرماندەی یەپەژە، هەڤاڵ نەورۆز ئەحمەد، جارێکی دیکە پرسی یەپەژەی خستە رۆژەڤەوە. پێشنیازمان هەبوو کە چۆن دەتوانین وەک یەپەژە هەم بوونی خۆمان بپارێزین، هەمیش بە شێوەیەکی فەرمی لە ناو وەزارەتی بەرگریدا جێگەی خۆمان بگرین. لەسەر بنەمای ئەم دیدارانە، لە 27ی ئابدا کۆبوونەوەیەکمان وەک شاندێکی تایبەتی یەپەژە لەگەڵ وەزارەتی ناوخۆ ئەنجامدا. لە فەرماندەیی یەپەژەوە، هەڤاڵ نەورۆز ئەحمەد و هەڤاڵ سۆزدار حاجی کە ئەندامی فەرماندەیی یەپەژەن، هەروەها فەرماندەی کەتیبەی یەپەژەی قامیشلۆ، هەڤاڵ زیلان جەسوور بەشدار بوون. ئێمە پێکەوە چووینە وەزارەتی ناوخۆ و لەوێ لەگەڵ وەزیری ناوخۆ، بەڕێز ئەنەس ئەلخەتتاب و جێگرەکەی کۆبووینەوە. هەروەها دوو ژنە ئەفسەری پلەبەرزیش ئامادە بوون کە پلەیان "عەقید" بوو. ئێمە پرسی تێکەڵبوونی یەپەژەمان خستە ناو گفتوگۆکان و بە شێوەیەکی دوولایەنە و بە وردی لەسەر ئەم بابەتە وەستاین.
رووداو: واتە ئێستا بەشداریکردنتان لە ناو وەزارەتی ناوخۆی سووریادا پەسەند کراوە؟ ئایا وەک هێزێکی ئەرکە تایبەتەکان بەشدار دەبن یان چۆن؟
رووکەن جەمال: بەڵێ، دەتوانین بڵێین وەک دەستپێک پەسەند کرا و نزیکبوونەوەیەکی ئەرێنی نیشان درا. بێگومان لەوێ جارێکی دیکە باسی ئەوە کرا، کە ئێمە لەگەڵ وەزارەتی بەرگریی سووریاشدا دیدارمان هەبووە و داواکاری سەرەکیمان چی بووە. یەپەژە لە ناو هێزەکانی سووریای دیموکرات (هەسەدە)دا چ رۆڵێکی گێڕاوە. بەڵام لەوێ، وەک راستی ئەو سوپایانەی لە ناوچەکەدا هەن و هەروەها وەک ئەو حکوومەتەی ئێستا سووریا بەڕێوە دەبات، چ لە رووی عەقڵییەت و چ لە رووی ئیدارییەوە، بۆ ئەوەی ژنان بتوانن بە شێوەیەکی کارا لە ناو دامەزراوەکانیاندا جێگیر بن، وەک دیارە هێشتا قبووڵنەکردنێکی تەواو هەیە. ئەمە پرۆسەیەکە کە ئێمە خەباتی بۆ دەکەین و زۆر کەمپەین لە رۆژئاوای کوردستان، باشووری کوردستان و ئەوروپا بۆ گرنگیی بەشداربوونی یەپەژە لە ناو سوپای سووریا و پاراستنیدا کران. ئێمەش بە گونجاومان زانی کە تێکەڵی وەزارەتی ناوخۆ ببین. بۆ ئێمە ئەسڵ ئەوەیە کە چۆن دەتوانین خۆمان وەک گرووپێکی رێکخراو بپارێزین؛ بە شەڕڤانان، دامەزراوەکان و فەرماندەکانییەوە. کاتێک بینیمان لەم لایەنەوە نزیکبوونەوەیەکی ئەرێنی لەلایەن وەزارەتی ناوخۆوە هەیە، بەتایبەتی وەک "هێزی ئەرکە تایبەتەکان"، ئەمەمان بە گونجاو زانی. ئەوانیش لەم بارەیەوە سوورن و ئەمە بۆ ئێمە نابێتە کێشە. ئامانجمان ئەوەیە بەشداری لە بنیادنانی سووریایەکی نوێدا بکەین و پارێزگاری لە ژنان بکەین. لەسەر ئەو بنەمایە، نزیکبوونەوەیەکی ئەرێنی لە هەردوولا نیشان درا، کە یەپەژە وەک هێزێکی دژەتیرۆر تێکەڵی وەزارەتی ناوخۆ بێت.
رووداو: ئایا هێزی دژەتیرۆر هەمان هێزی ئەرکە تایبەتەکانە؟ واتە جەوهەری ئەم هێزە چییە؟
رووکەن جەمال: راستە، واتە هێزی ئەرکە تایبەتەکان وەک هێزێک کە لە بارودۆخە نائاساییەکاندا، چ هێرشێکی ناوخۆیی بێت یان دەرەکی، ئامادەیە و وەک هێزێکی ئۆپەراسیۆنەکان ناودەبرێت. بۆیە، ئەمەمان بە نزیک لە کاراکتەری خۆمان دیت. لە هەمان کاتدا، بەتایبەت بۆ پاراستنی ژنان لە بەرامبەر هەموو جۆرە تووندوتیژی و بێمافییەک، ئەم هێزەی ئەرکە تایبەتەکان خاوەنی دەسەڵاتێکی زۆرە. بینیمان کە ئەمە لە ئەرک و ئامانجەکانی ئێمە نزیکە، کە لە ماوەی ساڵانی رابردوودا چۆن خەباتمان بۆ کرد و چۆن شەڕی رێکخراوە تیرۆریستییەکانی وەک داعشمان کرد. خۆی لە پەیڕەوی ناوخۆی یەپەژەدا هاتووە، کە بۆ ئەوەی بتوانین سووریا بکەینە سووریایەکی دیموکرات، کە ژنان بە یەکسانی لە هەموو بوارەکانی ژیان و دامەزراوەکاندا جێگەیان ببێتەوە، یەپەژە تا کۆتایی بە هەر شێوەیەک بێت بەردەوام دەبێت؛ رەنگە شێوازی رێکخستنی بگۆڕدرێت یان ناوەکەی بگۆڕدرێت، بەڵام خەباتەکەی بۆ ئەم مەبەستە بەردەوام دەبێت.
رووداو: ئایا ئێوە وەک فیرقە یان لیوا بەشدار دەبن؟ چۆن خۆتان وەک پێکهاتەیەکی سەربەخۆ دەپارێزن لە کاتی تێکەڵبووندا؟
رووکەن جەمال: گفتوگۆمان لەگەڵ وەزارەتی ناوخۆ لەسەر ئەو بنەمایە بوو، کە دەمانەوێت وەک گرووپ (کوتلە) لە ناویاندا جێ بگرین؛ بە هێز، فەرماندەیی و بەشە جیاوازەکانییەوە. ئێمە لەم لایەنەوە روونین کە دەمانەوێت بەم شێوەیە بەشدار بین. وەک پرەنسیپ، ئەوانیش بە ئەرێنی نزیک بوونەوە، بەڵام بڕیاری کۆتایی نییە. گوترا کە ئەوان زیاتر وردەکارییەکانی ئەم دۆسیەیەی یەپەژە تاوتوێ دەکەن و لەگەڵ فەرماندەییەکانی ئاسایشی ناوخۆ لە حەسەکە و حەلەب قسە دەکەن. لەسەر ئەو بنەمایە جارێکی دیکە دیدارمان دەبێت و دەگەینە بڕیاری کۆتایی. واتە دەتوانین بڵێین هێشتا بە تەواوی بڕیاری کۆتایی نییە.
رووداو: ئایا ئەم رێککەوتنە، گەرەنتیکردنی مووچە و پلەی سەربازیی شەڕڤانانی ژن لەلایەن وەزارەتی ناوخۆوە دەگرێتەوە؟
رووکەن جەمال: چونكە ئەمە یەکەمین گفتوگۆ بوو، ئامانج ئەوە بوو کە بوونی یەپەژە پەسەند بکرێت و بپارێزرێت، بۆیە زۆر نەچووینە ناو ئەم وردەکارییانەوە، بەڵام بڕوامان وایە لە داهاتوودا، لەو دیدارانەی کە ئەنجام دەدرێن، هەموو ئەمانەش بە فراوانی باس دەکرێن.
رووداو: ئایا هیچ خاڵێک هەیە کە جێگەی مشتومڕ بێت یان وەک ئاستەنگ بێت لەم رێککەوتنەدا؟
رووکەن جەمال: تاوەکو ئێستا ئاستەنگێکی گەورەمان نەبینیوە. تەنیا ئەوە باس کرا کە لە ناوچەکانی ئێمەدا ئەمە دەکرێت وەک هێزێکی ئەرکە تایبەتەکان رێک بخرێت و ئەمە قبووڵ کرا، بەڵام بۆ سەرتاسەری سووریا، ئەم دۆخە هێشتا زووە. لە ئەسڵدا گوتیان "ئێمە بۆ ئەمە ئامادە نین". ئەمەش وەک قۆناغێکی تێکۆشانە کە چۆن دەتوانین تەواوکەری یەکتر بین و ئەزموونەکان بگۆڕینەوە.
رووداو: گەڕی داهاتووی دانوستانەکان لە شام کەی دەبێت؟
رووکەن جەمال: ئێستا دیار نییە، بەڵام دەتوانین بڵێین لە رۆژانی داهاتوودا دەبێت. کاتێکی نزیکەی هەفتەیەک بۆ دە رۆژمان دیاری کردووە بۆ ئەوەی گفتوگۆکان بکرێن و دوای ئەوە پەیوەندی دروست بکرێت و کاتەکەی دیاری بکرێت.
رووداو: دەمەوێت هەندێک ئامار و ژمارەش بزانم.ئێستا ژمارەی شەڕڤانانی یەپەژە چەندە و چەندیان تێکەڵی وەزارەتی ناوخۆ دەبن؟
رووکەن جەمال: تاوەکو دوایین شەڕ کە تێیکەوتین و یارییەکی چەپەڵ بوو، لەوێشدا یەپەژە بەشدار بوو و رۆڵێکی زۆری هەبوو لە حەلەبەوە تا فورات و تەبقە و دێرەزوور. تا پێش ئەم شەڕە ژمارەمان دەگەیشتە ٣٥٠٠ شەڕڤان، بەڵام لەگەڵ قۆناغە نوێیەکەدا، بەشێک لە شەڕڤانانی یەپەژە، هەم بە ویستی خۆیان و هەم بە رەزامەندی فەرماندەییمان، چوونە ناو ریزەکانی ئاسایش (هێزەکانی ئەمنی ناوخۆ). بەشێکیشیان ویستیان لە دامەزراوەکانی بەڕێوەبەریی خۆسەردا کار بکەن، یان بگەڕێنەوە بۆ ژیانی مەدەنی. دواجار، ئەو ژمارەیەی کە لەگەڵ وەزارەتی ناوخۆدا باسمان کردووە بۆ ئەوەی تێکەڵ ببن، ١٥٠٠ شەڕڤانی یەپەژەن کە لەگەڵ فەرماندەییەکەیاندا وەک هێزی ئەرکە تایبەتەکان تێکەڵی وەزارەتی ناوخۆ دەبن.
رووداو: ئەوان لە کوێ بڵاو دەبنەوە و ئێستا شوێنی بڵاوبوونەوەی شەڕڤانان لە کوێیە؟
رووکەن جەمال: شەڕڤانانی یەپەژە لە کۆبانێ، حەسەکە، قامیشلۆ و تا دێریک جێگیر بوون. وەک دەستپێک، گفتوگۆکە ئەوەیە کە لەم ناوچانەدا، وەک یەکینەی دژەتیرۆر یان هێزی ئەرکە تایبەتەکان، رۆڵی خۆیان بگێڕن.
رووداو: لەبەر ئەوەی لە سوپای سووریادا یەکینەی ژنانی شەڕکەر نییە، ئایا وەزارەتی ناوخۆ تاقە بژاردە بوو لەبەردەم یەپەژەدا؟
رووکەن جەمال: بژاردەی دیکە هەبوون، بۆ نموونە تێکەڵبوون بە هێزەکانی ئاسایشی ناوخۆ. تەنانەت ئەمەش لە کۆبوونەوەکەدا باس کرا. بەڵام ئێمە وەک هێزێکی رێکخراو، ویستمان بوونی خۆمان بپارێزین و بەتایبەتی ویستمان لە ناو یەکینەی ئەرکە تایبەتەکاندا بین. ئەم بژاردەیەمان بۆ خۆمان بە راستتر دیت.
رووداو: ئایا لەناو هێزی ئەرکە تایبەتەکاندا پێشتر ئەندامیان هەبووە، یان ئێوە دایدەمەزرێنن؟
رووکەن جەمال: ئەندامی خۆیان هەیە لە هەموو پارێزگاکانی سووریا، بەڵام وەک ژن نین یان وەک یەکینەیەکی سەربەخۆی ژنان نییە. ئەگەر پەسەند بکرێت، دەبێتە یەکەمین یەکینە تایبەتەکانی ژنان، کە بەشێوەی کەتیبە رێک بخرێن و بەم شێوەیە دەبێتە یەکەم هێزی ژنان، کە بە فەرماندەیی خۆیانەوە تێکەڵی وەزارەتی ناوخۆ ببن، بێگومان لە ناوچەکانی رۆژئاوای کوردستان.
رووداو: راستیی دەنگۆی کردنەوەی ناوەندی نوێی مەشق و راهێنان بۆ ئێوە لە شام یان پارێزگاکانی دیکە چییە؟
رووکەن جەمال: ئەمە یەکەمین دیدارمان بوو و هێشتا هیچ شتێک بە فەرمی نەکراوە. ئێمە هێشتا بە فەرمی نەچووینەتە ناو وەزارەتی ناوخۆ، چۆن دەبێت ئەکادیمیاکانمان کرابێتنەوە؟ بێگومان تا ئێستا شتی وا نییە، بەڵام ئەگەر پەسەند کرا، لە داهاتوودا رەنگە لە شام، یان شوێنانی دیکە یان لە ناوچەکانی خۆمان ئەکادیمیا بکرێنەوە. ئێمەش بچین و ئەوانیش بێن و ئێمەی ژنان یەکتر بناسین؛ ئەمە دەبێتە هەنگاوێکی نوێ و ئێمە بە ئەرێنی دەبینین.
رووداو: با کەمێک لە دۆسیەی تێکەڵبوون دوور بکەوینەوە. لە ساڵانی رابردوودا ژمارەیەک لە شەڕڤانانی ژنی یەپەژە لەلایەن حکوومەتەوە دەستگیر کران. ژمارەی کۆتایی چەندە و لەسەر بنەمای رێککەوتنی دوایی چەندیان ئازاد کراون؟
رووکەن جەمال: بە گشتی، لە سەرەتای شۆڕشی رۆژئاوای کوردستانەوە تا ئێستا و شەڕی داعش و ئەم دواییانە، 52 هەڤاڵمان لە شەڕڤانانی یەپەژە دیل ببوون. ئێستا زۆربەی هەڤاڵەکانمان رزگار کراون، بەڵام 6 هەڤاڵمان هێشتا گیراون و چارەنووسیان نادیارە. لە ساڵی 2025دا (مەبەست ساڵی رابردوو یان ئەمساڵە بەپێی دەقەکە) 13هەڤاڵمان لە ئەنجامی هەوڵ و سووربوونی ئێمە ئازاد کران. ئەمساڵیش لە چوارچێوەی رێککەوتنی 29ی کانوونی دووەمدا، 33 هەڤاڵی ژنمان رزگار کران کە لە شەڕی دواییدا گیرابوون. لەو 6 هەڤاڵە، 3 هەڤاڵمان لە کاتی شەڕی عەفریندا (2018) ئەسیر کراون. هەڤاڵێکمان بە ناوی "چیچەک کۆبانێ" لە شەڕی گرێ سپیدا کەوتە دەست گرووپە چەکدارەکانی سەر بە تورکیا و بەداخەوە سزای تاهەتایی بەسەردا سەپێنراوە. بیانووەکەشی ئەوەیە کە چووەتە خاکی تورکیا و هەڕەشەی لەسەر تورکیا دروست کردووە، لە کاتێکدا ئەو لە گرێ سپی لەسەر خاکی رۆژئاوای کوردستان دیل کرا. دوو هەڤاڵی دیکەیشمان لە هێرشەکانی سەر منبجدا ئەسیر کران؛ "نەوال قامیشلۆ" و "رێژین لەزگین" کە برینداری شەڕی کۆبانێ بوو و لە کاتی هێرشەکاندا لە منبج کاری راگەیاندنی دەکرد و لەوێ لە ساڵی 2024دا دیل کرا لەلایەن ئەو گرووپانەی سەر بە تورکیا. ئێمە دەمانەوێت لە رێگەی ئێوەوە بانگی هەموو لایەنەکان و رای گشتی بکەین، کە خاوەندارێتی لەمانە بکەن و هاوکار بن بۆ رزگارکردنی ئەم 6 هەڤاڵەمان.
رووداو: لە کاتی دامەزراندنی یەپەژەوە تا ئێستا چەند شەڕڤانی یەپەژە شەهید بوون؟
رووکەن جەمال: بەپێی دوایین ئامار، 979 شەڕڤانی یەپەژە شەهید بوون لە هێرشە ئاسمانییە سەختەکانی سەرێ کانی و گرێ سپی. لە تەنیشت ئەوەش، بە دەیان و سەدان هەڤاڵمان هەن کە بریندار و کەمئەندامی شەڕن، پرسی تێکەڵکردنی ئەوان و پێدانی گەرەنتی بۆ چارەسەری تەندروستییان بابەتێکە کاری لەسەر دەکرێت. هەروەها شەهیدی ئینتەرناسیۆناڵیشمان هەیە لە ئینگلتەرا، ئەرجەنتین، ئەڵمانیا و باشووری ئەفریقاوە؛ یەکەم شەهیدی ئینتەرناسیۆناڵ "ئیڤانا هۆفمان" بوو کە لە هێرشی سەر کۆبانێ شەهید بوو. هەروەها شەڕڤانی عەرەبیشمان هەبوون کە لە شەڕی ئەم ساڵانەدا بە پاڵەوانی شەڕیان کرد و شەهید بوون. لە ئەنجامی تێکۆشان و قوربانییەکی گەورەدا ئێمە ئەمڕۆ گەیشتووینەتە ئەم قۆناغە و بەم بەرپرسیارێتییەوە خاوەندارێتی لەم رەنجە دەکەین؛ پێویستە ئەم تێکۆشانە بگەیەنینە سەرکەوتن و ژیانێکی ئارام بۆ هەموو ژنان دابین بکەین.
