پێش چاندنەوەی ددان، ئەمانە بزانە

دکتۆر بەسۆز یونس، پزیشکی پسپۆڕی نەشتەرگەریی دەم و چاندنەوەی ددان بە رووداوی راگەیاند، بەشێکی زۆری ئەوانەی چاندنەوەی ددانەکانیان کێشەی تێدەکەوێت ئەوەیە کە کەسەکە دوای پڕۆسەوکە چەند هەڵەیەکە دەکات کە باوترینی (جگەرەکێشان و نەشۆردنی دەم و ددانەکانە).

دکتۆر بەسۆز یونس: بەهۆی هەڵەکانی دوای چاندنەوەی ددان ئەگەری سەرکەوتنی پڕۆسەکە کەم دەبێتەوە و ئەگەری تووشبوون بە هەوکردنیش زیاد دەبێت. باوترین ئەو هەڵانەی کە چارەخواز دوای چاندنەوەی ددان دەیکاتە بریتین لەمانە؛

- جگەرە، نێرگەلە و ڤەیپکێشان

- نەشۆردنی دەم و ددانەکان

- خواردنی خۆراکی رەق بە ددانە چاندراوەکان (ماوەیەک لەدوای چاندنی ددان)

- پشتگوێخستنی دووبارە سەردانکردنەوە بۆ لای پزیشک

دکتۆر بەسۆز یونس: جیاوازی لە نرخەکان پەیوەندیی بە کواڵیتیی مادەکان و ئەزموونی پزیشکەکەوەیە، هەندێک چاندنەوە هەن کە پێویستە ئێسکی دەستکردی بۆ دابنرێت کە لێرەدا نرخەکەی گرانتر دەبێت، دواتریش جۆری ئەو مادەیەش جیاوازە کە ددانەکەی لێ دروستدەکرێت و ئەمەش نرخەکەی دەگۆڕێت. بەڵام مەرج نییە کە نرخزۆری مانای سەرکەوتنی پڕۆسەکە بێت.

دکتۆر بەسۆز یونس: پێویستە پێش چاندنەوەی ددان، چارەخواز دەم و ددانی پاک رابگرێت و پێویستیشە بزانێت کە ئەو پڕۆسەیە پێویستی بە کات هەیە تاوەکو ددانە چاندراوەکان لەگەڵ ئێسکی کەسەکە یەک دەگرێت، ئەگەر نەخۆشیی درێژخایەنیشی هەبێت کاریگەریی دەبێت.

دکتۆر بەسۆز یونس: چاندنەوەی ددان بۆ خانمان لەدوای 18 ساڵییەوە و بۆ پیاوان لەدوای 20 ساڵی ئاساییە بکرێت. بەتایبەت گرنگترین مەرج ئەوەیە کە گەشەی ئێسکی شەویلگەی کەسەکە وەستا بێت.

دکتۆر بەسۆز یونس: سەرەکیترین هۆکار بۆ لەدەستدانی ددانەکان ئەمانەن؛

- نەخۆشییەکانی پووک

- زۆریی ژمارەی ددانە کلۆرەکان

- داخورانی پووک

- کەوتنی ددانەکان بە هۆکاری دیکە