رووداو- تەندروستی
کۆمپانیای ئەسترازێنیکا رایدەگەیێنێت، دەزگای خۆراک و دەرمانی ئەمریکی رەزامەندیی بۆ دەرمانی ئۆلتۆمیرس دەرکردووە، کە بۆ چارەسەری نەخۆشیی نیفرۆپاتیی ئیمیونۆگلۆبیولین A بەکاردێت، ئەمەش نەخۆشییەکی دەگمەنی گورچیلەیە و دەکرێت ببێتە هۆی سستبوونی گورچیلەکان.
ئەسترازێنیکا رایگەیاند، چارەسەرەکە (ئۆلتۆمیرس) بە بەراورد بەو کەسانەی دەرمانی بەتاڵیان وەرگرتووە توانیویەتی رێژەی پرۆتینی زیادەی نێو میز بە رێژەی 43.4% کەمبکاتەوە.
دەرمانەکە یەکەمین و تاکە رێگریکاری C5ـە بۆ ئەم نەخۆشییە، کە ئامانج لە رێڕەوێکی سیستمی بەرگری دەگرێت کە پەیوەستە بە هەوکردنی گورچیلەکانەوە.
کۆمپانیاکە دەڵێت، زیاتر لە 200 هەزار کەس لە ئەمریکا تووشبووی ئەم نەخۆشییەن و نزیکەی نیوەی ئەو کەسانەی رێژەی پرۆتینی میزەکەیان بەرزە یان فرمانی گورچیلەیان کەمبووەتەوە، مەترسیی تووشبوونیان بە سستبوونی گورچیلە لە ماوەی 10 ساڵدا زۆرە.
