هەڵەیەک لە بەکارهێنانی توالێتی رۆژئاواییدا دەبێتە هۆی ژەهراویبوون

رووداو - تەندروستی

توێژینەوەیەک لە زانکۆی فلیندەرز لە ئوسترالیا دەریخستووە، دەستدان لە سەری توالێتی رۆژئاوایی یاخود سیفۆنەکەی رێگەیەکە بۆ بڵاوبوونەوەی نەخۆشی و ژەهراویبوون بە بەکتریا و ڤایرۆسە مەترسیدارەکان. 

توێژینەوەکە دەریخستووە، ئەو میکرۆبانەی لەنێو ئاوی توالێتەکاندان وەک گەردیلەی هەوایی بڵاو دەبنەوە کە هەڵگری ڤایرۆس و بەکتریان بەتایبەت لیجیۆنێلا، ئەنفلەوەنزا و نۆرۆڤایرۆس.

د. لیرا ئادیانی، سەرپەرشتیاری توێژینەوەکە دەڵێت، لەکاتی ئاوپێداکردن بە توالێتدا، پێویستە سەرەکەی دابخرێت بۆ ئەوەی وردەگەردیلەکان بەنێو هەوا و رووکەشی دەوروبەردا بڵاو نەبنەوە.

بە گوتەی د. لیرا ئادیانی، دەرگەی توالێتەکە، زەوییەکەی و هەموو روویەک میکرۆبی لەسەرە. ئەو دەڵێت، "50٪ بۆ 80٪ـی خەڵکی، مۆبایلەکانیان لە توالێتدا بەکاردەهێنن. ئەوان مۆبایل و پەنجەکانیان بە میکرۆبی پیسایی وەک سالمۆنێلا و کامپیلۆباکتەر و هەموو جۆرە بەکتریا و ڤایرۆسێک پیس دەکەن''.

لە کۆتایدا توێژەرانی زانکۆ ئوسترالییەکە هۆشداری دەدەن، دوای بەکارهێنانی توالێت دەست بشۆرێت و موبایل بەکارنەهێنرێت و کەمترین بەرکەوتن لەگەڵ روو و زەوی دەستشۆرەکاندا هەبێت.