رووداو دیجیتاڵ
بانکی ناوەندیی عێراق رێنمایی نوێی لەبارەی پشکی دۆلاری گەشتیاران دەرکرد و بڕەکەی لە 3000 دۆلارەوە بۆ 2000 دۆلار کەمکردەوە. بانکەکە دەڵێ، "ئامانجمان رێکخستنەوەی بازاڕ و هاندانی سیستمی ئەلیکترۆنییە."
رۆژی چوارشەممە 8ی تەممووزی 2026، نووسینگەی راگەیاندنی بانکی ناوەندیی عێراق رایگەیاند، رێنماییە نوێیەکان تایبەتن بە رێکخستنی میکانیزمی دابینکردنی دراوی بیانی بۆ ئەو هاووڵاتییانەی گەشت بۆ دەرەوەی وڵات دەکەن.
بەپێی رێنماییەکان، پشکی هەر گەشتیارێکی سەروو 18 ساڵ، مانگانە بووەتە 2000 دۆلاری ئەمریکی، لە کاتێکدا پێشتر 3000 دۆلار بوو.
بانکی ناوەندی روونی کردووەتەوە کە ئەم هەنگاوە لە چوارچێوەی پەرەپێدانی پرۆسەی فرۆشتنی نەختینەی بیانی و بەرزکردنەوەی کارایی دابەشکردنی سەرچاوەکانە، بە جۆرێک کە لەگەڵ باشترین پەیڕەوە بانکییە نێودەوڵەتییەکاندا بگونجێت.
لە راگەیێندراوەکەدا هاتووە: "ئەم رێکارە بەشێکە لە زنجیرەیەک چاکسازی بۆ دڵنیابوونەوە لە گەیشتنی دۆلار بە دەستی هاووڵاتییان، ئەمەش رۆڵی دەبێت لە سەقامگیرکردنی بازاڕی دراو و بەرزکردنەوەی توانای بانک بۆ رووبەڕووبوونەوەی گۆڕانکارییە ئابوورییەکان."
بانکی ناوەندیی عێراق جەخت لەوە دەکاتەوە کە ئەم رێکارانە تەنیا رێکخستنن و ئامانج لێیان هاندانی هاووڵاتییانە بۆ بەکارهێنانی کارتە ئەلیکترۆنییەکان وەک رێگەیەکی سەرەکی و پارێزراو بۆ دابینکردنی خەرجییەکانیان لە دەرەوەی وڵات.
ئەم بڕیارە وەک هەوڵێک بۆ گۆڕینی ئابووریی عێراق بۆ ئابوورییەکی دیجیتاڵی و هاوتەریببوونی لەگەڵ پێوەرە جیهانییەکان دەبینرێت.
