رووداو دیجیتاڵ
پۆستەکەی رۆژی سێشەممەی دۆناڵد ترەمپ لەبارەی بەربژێرکردنی نووری مالیکی بۆ سەرۆکوەزیرانی عێراق، کاریگەرییەکی کەمی لەسەر بەهای دینار هەبووە. گوتەبێژی سەندیکای دراوفرۆشانی هەولێر دەڵێت: "دۆخی سیاسی باش بێت، بەهای دۆلاریش دادەبەزێ."
رۆژی چوارشەممە، 28-01-2026، حاجی سابیر باواجی، ئاڵوگۆڕکاری دراو لە هەولێر بە رووداوی گوت: "نرخی دۆلار جێگیرە و 100 دۆلار بە 153 هەزار و 750 دینار دەکڕین و بە 154 هەزار دەیفرۆشین."
حاجی سابیر باواجی هۆکاری هەڵبەز و دابەزی بەهای دینار لەم رۆژانەدا بۆ دۆخی عێراق دەگەڕێنێتەوە و دەڵێت: "حکومەتی عێراق خۆی هۆکاری بەرزبووەنەوەیە. ئەگەر حکومەت پێکبهێندرێ و لەگەڵ ئەمریکا رێکبکەون، بەهای دیناریش بەرز دەبێتەوە، ئەگەر نا 100 دۆلار بۆ 165 تاوەکو 170 هەزار دینار بەرزدەبێتەوە."
بە گوتەی ئاڵوگۆڕکارەکەی هەولێر، دۆخی لیرەی سووری و تورکیش جێگیرە، بە جۆرێک هەزار لیرەی سووری بە 111 هەزار دینارە و 100 دۆلاریش بەرامبەرە بە 4 هەزار و 250 لیرەی تورکی.
هاوکات دانا مەولوود، ئاڵوگۆڕکاری دراو لە بازاڕی دۆلارەکەی سلێمانی بە رووداوی گوت: "کڕین و فرۆشتنی دۆلار 250 دیناری عێراقی جیاوازە، بە جۆرێک بە 153 و 750 دینار دەکڕین و بە 154 هەزار دەیفرۆشین. نرخی لیرەی سووری و تورکیش جێگیرە."
بە گوتەی ئەو ئاڵوگۆڕکارەی بازاڕی دۆلارەکەی سلێمانی، 1000 لیرەی سووری 111 هەزارە و 100 دۆلاریش بە 4200 لیرەی تورکییە؛ هاوکات 100 دۆلار دەکاتە 13 ملیۆن و 500 تمەن.
.jpg&w=3840&q=75)