رووداو دیجیتاڵ
نرخی نەوت، ئەمڕۆ هەندێ لە زیانەکانی رۆژی رابردووی خۆی قەرەبوو کردەوە و گەیشتە نزیکەی 91 دۆلار.
بەرزبوونەوەی نرخی نەوت دوای ئەوە هات؛ نادڵنیاییەکانی پەیوەست بە شەڕی نێوان ئیسرائیل و چەکدارانی غەززە، پەرەی سەندووە.
بەرەبەیانیی ئەمڕۆ (سێشەممە، 24-10-2023) هەر بەرمیلێک نەوتی برێنتی دەریای باکوور 57 سەنت بەرزبووەوە و بە 90 دۆلار و 70 سەنت مامەڵەی پێوەکرا، هەروەها نرخی نەوتی سووکی تەکساسی ئەمریکا 54 سەنت بەرزبووەوە و، بە 86 دۆلار و سێ سەنت مامەڵەی پێوەکرا.
یوکی تاکاشیما، شرۆڤەکاری سەر بە کۆمپانیای راوێژکاریی نۆمۆرا سیکیۆریتی لەو بارەیەوە رایگەیاند، "بازاڕ، خۆڕاستکردنەوەی پێوەدیارە، دوای ئەوەی لە دوو رۆژی رابردوودا نرخی نەوت دابەزیبوو."
بەهۆی هەوڵە دیپلۆماسییەکان بۆ کۆتاییێهێنان بە شەڕی نێوان ئیسرائیل و چەکدارانی غەززە، نرخی نەوت رۆژی دووشەممە بەڕێژەی 2٪ دابەزی.
بزووتنەوەی حەماس، دوێنێ دوو بارمتەی ئیسرائیلی ئازادکرد، هاوکات ویلایەتە یەکگرتووەکانی ئەمریکا داوای لە ئیسرائیل کردووە هێرشی زەمینی بۆ نێو خاکی غەززە دوابخات بۆ ئەوەی دەرفەتێک بە ئازادکردنی بارمتەکان بدات.
ڤاندانا هاری، دامەزرێنەری کۆمپانیا راوێژکاریی ڤاندا گرووپ لەو بارەیەوە رایگەیاند، "بازرگانان بەسەر دوو بەرەدا دابەش بوون؛ هەندێکیان پێیانوایە شەڕەکە سارد دەبێتەوە و چەکدارانی غەززە بارمتەی زیاتر ئازاد دەکەن، ئەوانی دیکەش پێیانوایە ئاڵۆزتر دەبێت."
