رووداو دیجیتاڵ
بانکی رەشید لە ئێوارەی ئەمڕۆ دووشەممەوە، سەکۆی فرۆشتنی دۆلار بە شێوەی ئەلیکترۆنی دەکاتەوە.
بانکی رەشید کە بانکێکی حکومییە، لە راگەیێندراوێکدا دەڵێت، کاژێر 08:00ـی ئێوارەی رۆژی دووشەممە، 13-11-2023 سەکۆکە دەکاتەوە.
وەک لە راگەیێندراوی بانکی رەشید هاتووە، ئەوانەی گەشیارن و خوازیاری دۆلارن دەتوانن سەردانی ماڵپەڕەکەیان بکەن بۆ پێشکێشکردنی داواکارییەکەیان.
بەگوێرەى رێنوێنییەکانى بانکى ناوەندیى عێراق، هەر گەشتیارێکى عێراقى بۆى هەیە لە مانگێکدا بڕى 3000 دۆلار بە نرخى فەرمى لە بانکە مۆڵەتپێدراوەکان بکڕنەوە بۆ گەشتی دەرەوەى وڵات کە نرخەکەى 1320 دینارە بەرامبەر یەک دۆلار.
رۆژی 6ى ئەیلوولی 2023 ئامال شوەیلی، گوتەبێژى بانکى رەشید بە تۆڕى میدیایی رووداوى راگەیاند، بەگوێرەى رێنوێنییەکانى بانکى ناوەندیى عێراق هیچ بڕە دۆلارێک نادەنە گەشتیار بەبێ ئامادەبوونى خۆى لەکاتى رادەستکردنى دراوى عێراقی؛ بە هەمان شێوەش بڕە دۆلارەکەى پێنادرێت تاوەکو مۆرى دەرچوونى لە فڕۆکەخانە لەسەر پاسپۆرتەکەى نەدرێت.
هەفتەی رابردوو بەهای دینار لە بەرامبەر دۆلاری ئەمریکی زیاتر رووی لە دابەزین کرد، بە جۆرێک نرخی 100 دۆلار 165 هەزار دیناری تێپەڕاند.
ئەمڕۆ دووشەممە، 13.11.2023، حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە تۆڕی میدیایی رووداوی راگەیاند، ئەمڕۆ لەکاتی کردنەوەی بازاڕدا، 100 دۆلار بە 161 هەزار دینار بوو، بەڵام لەکاتی داخستندا بەهای دینار بەرزبووەوە و 100 دۆلار بە 160 هەزار و 400 دینار مامەڵەی پێوەکرا.
لە ئێوارەی دوێنێ یەکشەممەوە بەهای دینار لە بازاڕەکانی هەرێمی کوردستان بەرامبەر دۆلار بەرزبووەتەوە و 100 دۆلار بە 159 هەزار دیناریش مامەڵەی پێوەکرا.
بەرزبوونەوەی بەهای دینار دوای ئەوە هات کە دوێنێ ئاژانسی هەواڵی فەرمیی عێراق لە زاری سەرچاوەیەکەوە بڵاویکردەوە، لە کۆبوونەوەیەکدا لە شاری ئەبوزەبی لە ئیمارات، عێراق و ئەمریکا لەسەر ئەوە رێککەوتوون بانکی زیاتری عێراقی دۆلار لە بانکی ناوەندیی ئەمریکا وەربگرن.
رۆژی یەکشەممە 12-11-2023، سەرچاوەیەکی بانکی ناوەندیی عێراق لەبارەی زیادکردنی ژمارەی ئەو بانکانەی لەلایەن ئەمریکاوە دۆلاریان پێ دەدرێت، بە تۆڕی میدیایی رووداوی گوت، "بەپێی رێککەوتنی نێوان بانکی ناوەندیی عێراق و بانکی فیدراڵیی ئەمریکا، ژمارەی ئەو بانکە عێراقییانەی وەرگرتنی دۆلار دەیانگرێتەوە و دەتوانن راستەوخۆ لە وەرگرتنی دۆلار لە ئەمریکاوە سوودمەندبن، بۆ 10 بانک زیادکراون".
ئەم هەواڵە، وەک حاجی سابیر باسی لێوەدەکات، هۆکاری سەرەکیی بەرزبوونەوەی بەهای دیناری عێراقییە بەرامبەر دۆلار.
حاجی سابیر دەشڵێت، رەنگە بەهای دینار زیاتریش بەرزبێتەوە، بەڵام هەڵبەز و دابەزی بەهاکەی بەرامبەر دۆلار تاوەکو کۆتایی ئەمساڵ و چوونە واری جێبەجێکردنی رێکارە نوێیەکانی بانکی ناوەندی لە گۆڕینی مامەڵە نێوخۆییەکان لە دۆلارەوە بۆ دینار بەردەوام دەبێت.
ئەو ئەندامەی ئەنجوومەنی دراوی هەولێر باسی لەوەشکرد، دۆخە سیاسییەکەش هێور بووەتەوە، ئەوەش کاریگەریی ئەرێنیی لەسەر بەرزبوونەوەی بەهای دینار داناوە.
ئەمڕۆ بانکی ناوەندیی عێراق 230 ملیۆن و 744 هەزار و 244 دۆلاری خستەڕوو؛ لەو بڕە 212 ملیۆن و 84 هەزار و 444 دۆلاری بە شێوەی حەواڵە و 18 ملیۆن و 659 هەزار و 800 دۆلاریشی بەشێوەی نەخت بوو.
زیاتر لە ساڵێکە بانکی ناوەندیی عێراق چەندین رێکاری گرتووەتەبەر بۆ بەرزکردنەوەی بەهای دینار، بەڵام تاوەکو ئەمڕۆ بەهای دینار لە نزمیدایە.
بانکی ناوەندیی عێراق رۆژانی دەوام نزیکەی 200 ملیۆن دۆلار بە نرخی فەرمی دەفرۆشێت و 100 دۆلار بە 132 هەزار دینار دەفرۆشێت، بەڵام زۆرینەی پارەکەی بۆ حەواڵەیە و نایەتە نێو بازاڕەکانی کوردستان و عێراقەوە.
