رووداو دیجیتاڵ
حکومەتی هەرێمی کوردستان دەڵێت، سبەی وەزیری نەوت و تیمێکی وەزارەتی نەوتی عێراق سەردانی هەرێمی کوردستان دەکەن.
ئەمڕۆ (شەممە 11-11-2023) حکومەتی هەرێمی کوردستان رایگەیاند، سبەی حەییان عەبدولغەنی، وەزیری نەوتی عێراق و تیمێکی وەزارەتی نەوتی فیدراڵ، "سەردانی هەرێمی کوردستان دەکەن و ئەم سەردانە لە سەر رێککەوتنی هەردوو سەرۆکوەزیران بووە تاوەکو بێنە ئێرە و لەگەڵ وەزارەتی سامانە سرووشتییەکانی حکومەتی هەرێمی کوردستان دۆسیەی نەوتی هەرێم و کێشەکانی پێکەوە چارەسەر بکەن".
بەگوێرەی راگەیێنراوەکەی حکومەتی هەرێمی کوردستان، "بابەتی سەرەکیی کۆبوونەوەکان؛ کێشەی تێچووی بەرهەمهێنانی نەوت و رێکارەکانی هەناردەکردنەوەی نەوتی هەرێمە و بۆ ئەم پرسە، شاندەکە دوو بۆ سێ رۆژ دەمێننەوە".
رۆژی چوارشەممە، 08-11-2023، بۆ یەکەمجار بەرپرسانی وەزارەتی نەوتیی حکومەتی عێراق لەبارەی هەناردەکردنەوەی نەوتی هەرێمی کوردستان لەگەڵ نوێنەرانی کۆمەڵەی پیشەسازیی نەوتی هەرێمی کوردستان (ئەپیکور) کۆبوونەوە.
لە کۆبوونەوەکەدا، هەریەک لە نوێنەرانی ئەپیکور و بەرپرسانی حکومەتی عێراق جەختیان لەسەر پێویستیی دەستپێکردنەوەی تەواوەتیی بەرهەمهێنان و هەناردەی نەوتی هەرێمی کوردستان کردووەتەوە، بەپێی رێککەوتنی هاوبەشی بازرگانی کە جێی رەزامەندیی هەردوولا بێت.
9ـی تشرینی دووەمی 2023، محەممەد شیاع سوودانی سەرۆکوەزیرانی عێراق بە سەردانێکی فەڕمی گەیشتە هەولێر و لەلایەن مەسرور بارزانی، سەرۆکی حکومەتی هەرێمی کوردستان پێشوازی لێکرا، دواتر سوودانی لەگەڵ هەریەکە لە مەسرور بارزانی، سەرۆکوەزیران و نێچیرڤان بارزانی، سەرۆکی هەرێمی کوردستان کۆبووەوە.
بەگوێرەی حکومەت و سەرۆکایەتیی هەرێمی کوردستان، لە کۆبوونەوەکاندا باسی پرسی ئاڵۆزیی و شەڕی چەکدارانی فەلەستین و ئیسرائیل کراوە و پرسی شایستە داراییەکان و مووچەی مووچەخۆران یەکێکی دیکە بووە لە تەوەری کۆبوونەوەکان.
هەرچەندە لە رۆژی 25ـی مانگی ئاداری 2023ـەوە، هەناردەکردنی نەوتی هەرێمی کوردستان و کەرکووک بەهۆی بڕیارێکی دادگەی نێوبژیوانیی نێودەوڵەتی لە پاریس راگیراوە، بەڵام رۆژی 04-04-2023، بە ئامادەبوونی محەممەد شیاع سوودانی، سەرۆکوەزیرانی عێراق و مەسرور بارزانی، سەرۆکوەزیرانی هەرێمی کوردستان لە بەغدا، رێککەوتنێک واژۆکرا، کە هەناردەکردنی نەوتی هەرێمی کوردستان دەستپێبکاتەوە، بەڵام دوای تێپەڕینی نزیکەی هەشت مانگ، هێشتا هەناردە دەستی پێنەکردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ