رووداو دیجیتاڵ
ئەپیکور دەڵێت، ئەوان بۆ دەسپێکردنەوەی هەناردەی نەوت پەلەیانە و وەبەرهێنانیان بەبڕی "400 ملیۆن دۆلار" وەستاندووە.
رۆژی پێنجشەممە، 03-04-2025 کۆمەڵەی پیشەسازیی نەوتی کوردستان (ئەپیکور) لە تۆڕی کۆمەڵایەتیی ئێکس بڵاویکردەوە: "کۆمپانیا ئەندامەکانی ئەپیکور بۆ دەستپێکردنەوەی هەناردەی نەوت پەلەیانە. لە هەوڵەکانی گفتوگۆ لەگەڵ بەغدا لە پێشی پێشەوەین."
ئەپیکور رایگەیاند، بەھۆی داخستنی بۆریی نەوتی عێراق-تورکیاوە: "وەبەرھێنانەکانمان زیانی زۆریان بەرکەوتووە و ناچارکراوین بە داشکاندنێکی بەرچاو لە نرخی بازاڕە جیھانییەکاندا نەوت بفرۆشین. نرخی جیھانی دوو ئەوەندەی ئەو نرخەیە کە لە نێوخۆ دەفرۆشرێت."
بەگوتەی ئەپیکور، کۆمپانیاکان بەھۆی وەستانی ھەناردەی نەوتەوە، وەبەرھێنانی 400 ملیۆن دۆلاریان وەستاندووە. ئەگەر بۆریی نەوتی عێراق-تورکیا بکرێنەوە و دڵنیایی بە کۆمپانیا نێودەوڵەتییەکان لە مافە گرێبەستییەکانیان بدرێت، ئەوکات وەبەرھێنانەکان بەردەوام دەبن.
ئەو کۆمەڵەیە رایگەیاند: "ئێمە ئامادەین رێککەوتن لەگەڵ حکومەتی عێراق و حکومەتی ھەرێمی کوردستان بکەین و دەست بە ھەناردەکردن بکەینەوە. پاراستنی ماف و وەبەرھێنانەکانمان زۆر گرنگە. ئێمە ئەم خاڵانەمان بە ھەموو لایەنە پەیوەندیدارەکان راگەیاندووە."
دوای بڕیارێکی دادگەیەکی نێوبژیوانیی نێودەوڵەتی لە پاریس، لە ئاداری 2023ـەوە هەناردەی نەوتى هەرێمی کوردستان و کەرکووک لە رێگەی تورکیاوە راگیرا.
تائێستا چەند جارێک کۆبوونەوە بە مەبەستی هەناردەکردنەوەی نەوتی هەرێمی کوردستان لەگەڵ حکومەتی عێراق هەبووە، بەڵام کۆبوونەوەکان نەبوونەتە هۆی دەستپێکردنەوەی هەناردەی نەوت.
رۆژی چوارشەممە 19-03-2025 مایڵز کاگنز، گوتەبێژی (ئەپیکور) بە رووداوی راگەیاند: "هێشتا هیچ رێککەوتنێک نییە، کۆبوونەوەی زیاتر پێویستن. ئەپیکور سوپاسی سەرۆکوەزیران سوودانی و بەرپرسانی حکومەتی ئەمریکا دەکات کە هەناردەکردنەوەی نەوتیان لە رێگەی بۆریی نەوتی عێراق- تورکیا خستووەتە پێشینەی کارەکانیان."
لێدوانەکەی کاگنز دوای ئەوە هات، هەمان رۆژ تامی برووس، گوتەبێژی وەزارەتی دەرەوەی ئەمریکا بە دیار کوردە، بەرپرسی نووسینگەی رووداوی لە واشنتن گوت: "ئێمە داوا لە حکومەتی عێراق دەکەین لەگەڵ کۆمپانیا نەوتییە نێودەوڵەتییەکان، بۆ دەستپێکردنەوەی هەناردەی نەوت لە رێگەی بۆریی نەوتی عێراق تورکیا بە زووترین کات بگاتە رێککەوتنێک و رێز لە گرێبەستە ھەنووکەیییەکان لەگەڵ کۆمپانیاکانی ئەمریکا بگرێت."
